Ramri hung hian rulhhlo tawlh leh dan loa pem lutte a dang reng em?

Thla hmasaa US Department of State Foreign Press Center buatsaih Press Tour-a kan kal ṭumin, US chhim lama an ramri hungna leh inkalpawhna luhka te kan tlawh a. Chuta kan thil tawnhriat aṭanga rilrua lian tak chu Mizoram pawhin kan khel nasat em em ramri hung hi a ni. Ramri hung chungchangah hian US ah pawh ngaihdan a phir hle a, mi tam takin ṭha an tih rualin, President Trump-an ram dang mi pem lut a bik takin Mexican mite an huat vang hrim hrim nia ngai te pawh an awm a, an milarte pawhin langsar tak takin ramri hung leh dan loa US-a pemte thawn kir an ni ṭhin chu an duh lohzia te pawh an au chhuahpui fo a ni. Khawvel ram dang aṭang pawhin fakna leh demna ṭawngkam a kat nuk reng a ni.

US - Mexico border hi khawmualah km 3,145- a thui a ni a, khawvela ramri thui zawng tehnaah 10-na a ni. San Diego sector-ah hian km 97-a sei ramri a awm a, helai hmun hi ramri hrula mihring tamna ber pawh a ni. San Diego,US - Tijuana, Mexico ramri chehvelah hian mihring maktaduai 5.5 an khawsa mek. San Diego ramri hi western hemisphere-a ramri kanna luhka lun ber anih avangin hmun pawimawh tak a niin, ramri hung leh ramri ven hna pawh nasa taka thawh niin, sorkar pawhin helai hmun hi a ngai pawimawh hle. San Ysidro Land port of Entry (dan anga ramri kanna luhka) phei hi chu khawvela luhka lun berah an chhal hial a, nitin helai hmunah hian motor sing sarih chuang leh kea kal mi sing 2 chuang an lut ziah nia chinchhiah a ni.

Dan anga ramri kan hi thil awlsam tak a ni a, phalna la tur hian hun rei tak a duh ṭhin. Hei bakah hian luh dil zawng zawngte hi phalna pek an ni vek ngai lo bawk. A chhan tam tak zingah mahni ramchin humhalh duhna vangte, pemlut tam lutukin khau leh tuite tan harsatna a thlen theih vangte a ni ṭhin. Chutiang boruak karah chuan mi zawng zawng tan dan ang luh theih vek a ni a, hei vang hian a ruka luh tum mi tam tak an awm phah a ni. Ramri reng rengah chuan dan anga sumdawnna tam tak a awm rualin, dan loa sumdawngna pawh a hluar tel ziah a, chu tho chu US-ah pawh an buaipui ber a ni. Mihring leh ruihhlo tawlhluh hi sumdawnna lian tak niin, cartel kan tih mai organized crime group (OCG) hrang hrangin he sumdawnna hi an kalpui ṭhin. OGC-te hi sum che vel hian tluklehdingawn a hlawh nia chhut a ni.

OCG-te hi an len ṭhin em avangin mihring leh ruihhlo an tawlhluhna hmanrua pawh an nei ṭhain, ramri vengtu Custom and Border Protection (CBP) te pawh an finkhalh fo ṭhin reng a ni. Hei vang hian ramri hung ṭhat hi a pawimawh nia ngaihna a lian hle.

Amaherawhchu, ramri hung ringawt hi a chhanna a ni lo a, ramri veng hna thawh ṭhat anih loh chuan awmzia a awm thui lutuk lo. CBP officer-te biang biaknaa an sawi ber pawh: Ft 30 a sang bang nei mah ila, lehlamin ft 31-a sei leihlawn an rawn siam ve leh mai ṭhin an ti. Amaherawchu, ramri bang ṭha tak a awm anih chuan awlsan taka kan mai theih a ni lo a, kan hna nasa takin min pui a ni. Ramri hungna bang siam hian hmasawnna tam tak a keng tel a, ramri hrulah kawng ṭha kan nei a, hmunna thlithlaina tur camera-te, motion censor detector-te dahin hei hian ramri ven hna nasa takin min pui a ni. Tin, sorkarin ramri humhalh ngai pawimawhin, policy tharte duan a ni a, ramri kan tum mante pawh an ramah thawn let zung zung an nih bakah, a ṭum hnihnaa an tum leh ani chuan jail-ah dah theihna dante siam a ni a, hei hian dan loa luh tum tam tak a hnawt tiau a ni, tiin an sawi.

Data kan en chuan tunhnaiah danloa luh tum mante hi an tlahlim tawh hle a, kum 2/3 liam taa nitin mi 1000 chuang man ṭhin khan tunah chuan chawrualin mi 30 vel chauh an man tawh a ni. CBP officer-te chuan a ruka lo luh tum zawng zawnga zinga zaa 90 chu an man niin an sawi bawk.

Amaherawchu, ramri venhim hna hi 100% in a hlawhtling thei bik a, nasa taka ṭan lak ani chuang hian mihring leh ruihhlo tawlh luh hi a thleng reng tho. San Diego kawtthlerah pawh hian ruihlo a hluarin, khaw en lai pawhin kaawlaiah rui leh mihring veivak tana him tawk lo boruak siam hmuh tur an kat nuk tho. Eng pawhnise, ramri hungna bang sak hian nasa takin ramri ven him kawngah a pui tih chu a chiang reng a, eng tiang taka hlawhlting nge a ni tih chu hunin a la hril zel ang chu.