I ṬAWNGṬAI ANG U

Tlang rama awm kan nih bakah, kan ram leilung hi mithiamte’n a naupang an ti a (tuifinriat chhung aṭanga a lo chhuahna a rei lo ni awm tak a ni). Inkalpawhna kawngpui (national highway, ko sang tak tak bakah, state highway-te pawh kawng ko a sangin, kawng thlang lam ni se, hmun tam tak chu kawr thui tak tak a ni. Chutihlaiin, kan ram a vannei a, fûr ruahtui ṭha tak, thla nga chhung deuhthaw kan nei kum tin a ni. Kumin hi ruahtui kan dawng hma a, June thla thlen hmain khawchêng kan nei ṭan a ni ber mai.

Tlang rama awm, fûr ruahtui ṭha tak dawng kum tin kan nih avang leh kawng ṭha tak tak kan lo neih tak avang hi a ni ber awm e, kum tin ram lamah leh in lamah leimin vanga chhiattâwk, thihna thlengin kan tawk ta fo mai. Ka hriat sual loh chuan, tuilian vanga harsatna tawk, leimin avanga in hnâwl, kawng chhia, min vanga thihna tâwk kan awm kum tin ta mai. Kumin hi ruahtui a ṭha a, Chunglam malsawmna kan tih rualin, khawi lai laiah emaw chuan chhiat kan tawk leh lo vang tih sawi a har hle. Pathianin min veng ang a, chhiatna nasa lehzual tâwk lo turah inngai ang.

Chhiatna, accident a thlen dawn hi chuan pumpelh tak tak theih a nih loh châng a awmin a lang. Chutihlai chuan, chhiatna leh vanduaina thleng thei eng emaw zat hi chu fimkhur leh invent lâwk aṭanga pumpelh theih a ni ang tih ring ila, kumin fûrah pawh theih ang anga inven fimkhur a ṭha hle.

Sawrkar kan nei a, vengtu sipai leh police te, chhiatrupna thleng thei laka hma latu department thlengin kan nei nâin, mihringte theihna hi chuan tih theih chin (limit) a neih tlat avangin kan ven theih loh chhiatna kan tâwk fo ṭhin. Kumin pawh hi chhiatna tawk lovin kum kan vei lo vang tih tuma’n kan sawi thei lo. Fimkhur ila, theih ang angin chhiatna pumpelh dan ngaihven tlang ang u.

Pathian nung ringtute kan ni hi a vanneihthlak hle. Kan ṭawngṭai ṭhin a, Pathianin min chhang ṭhin tih pawh kan hria. Kumin bik atan pawh, fûr chhunga ruahtui vanga chhiatna, thihna hial te thleng lova kum kan vei theih nan kohhran ang leh chhungkua, mimalte pawh i ṭawngṭai ang u. Lalpa’n kan ṭawngṭaina a ngaithlak ṭhin hi.

Kohhran tinah Pathian hnena ṭawngṭai ṭhin mi kan nei ṭha a, zing ṭawngṭai, chhuna ṭawngṭai leh tlai lama ṭawngṭai pawlte thlengin kan nei hlawm. Heng mite avang hian Pathian venna, awmpuina leh malsawmna pawh kan dawng ṭhin. Chutihlai chuan, mite ṭawngṭaina ring mai lovin, ṭawngṭaitu nih ṭheuh i tum ang u.

Mizorama remna (Peace Accord) an signed kha political party-te mimal ang pawhin hma latu kan nei a, chutihlaiin, keiin ka lo hmuh ve dan kawngkhat lian tak chu, khatihlaia Mizorama kohhran hote ṭawngṭaina rah chhuah a ni a, thil dang, mi dang zawngte kha chu a hmanrua an ni, tih hi a ni. Khawvelah remna, peace treaty, accord tam tak a lo awm tawh a, Mizoram Peace Accord tluka hlawhtling a la awm lo ti ila a sualin ka ring lo. A chhan chu ṭawngṭaina hrin chhuah inremna a nih avangin.

Ṭawngṭai pawi-mawhna leh min chhang zel ṭhintu Pathian kan nei hi sawi chiam ngai lova hretute kan ni a. Tlang rama cheng, ruahtui dawng ṭha ramah hian kum tin fûr ruahtui leh khawchêng vanga chhiatna, thihna thlenga tawrhna kuminah a thlen loh nan ringtute kan ni a, i ṭawngṭai ang u.

-Rev. Lalbiaksanga Chinzah