Mizotaxi: Dik taka thil tih duh lotute chu tute maw?

Kan ramah hian a hman nazawngin pawl an din fo chhan hi eng dang vang ni lovin, mipui hmangaihna leh ram hmasawnna tur tak tak lam emaw, mipui hmasawnna tura ṭanrualna tur lam aiin, anmahni hmasialna leh an hlâwk theih dan tur ringawt ngaihtuah tura an ṭanrual theih nan te, an hlâwkna atana sawrkar nawr nan leh mipui thunun theih nana intihropui leh intihhlauhawm der chawp vel nana pawl din hi a tam zawk an nih hmel ṭhin khawp mai.

Sawrkarin eng emaw thil tih dan tur danglam deuh, ram leh mipui, khua leh veng tana ṭha zawk tur leh hmasawnna, changkanna leh awlsamna tur nia a hriat a duan chhuah reng reng kha a dik a dawk pawh thlu lova lo dodal ve ringawt nghal zel kha tun hma aṭang tawha opposition party tinte tih dan tur emaw, lo dodal tur leh buaina siam tura eng pawl emaw lo fuihpawrh kha opposition apiang khan an tih tur ni tlatin an hre ṭhin a ni. Chutiang tur chuan phûr tak leh taima tak, fin kherek tinreng nen an che ṭhin. Chutiang thil tih chu tun sawrkarah pawh a bâng chuang lo va, a nasa zawk hle niin pawhin a lang.

Hei, tunah pawh ram leh mipui hmasawnna tur dik tak, ram changkang leh mi changkang, khawpui changkang kan nih ve zelna tura ruahmanna, Mizotaxi apps chu Aizawla mipui phur chi lirthei chi thum, 4wheeler taxi, 2wheeler taxi leh 3wheeler auto rickshaw ten June 2026 chhungin an hmang vek tur tih sawrkar thupek chu zak map lova lo dodal tum an han awm leh nghal pang rikngawt leh tawh hi. He thil lo dodal tumtute hi sawi vak ngaihna pawh ka hre lo, an zaktheilo hi ka ti lutuk a ni. Sawrkar an zah loh chu thuhran ni se, mipui min zah miah lo leh ram leh mipui mitmei an veng miah lo hi an mâwl hle bawk niin ka hria.

Hetianga hmasawnna leh changkanna, dik taka thil tih dan tur sawrkarin tih a tum an lo duh loh chhan hi ngaihtuah thui buai pawh ngai lo, anmahni pawhin thil dik taka tih aia dik vak lova tih hian an hlawk zawk tih an hriat avanga eng emaw tia sawrkar vau zâm theih mai an inbeisei vang leh, mipui tute emaw support-na hmuh mial an beisei vang mai mai tih hi hai rual a ni lo.

Khawi ramah pawh awm ila, sawrkar awmna hnuaia awm kan nih phawt chuan sawrkar thu chu kan zâwm mai tur a ni. Chu chu khua leh tui ṭha awm dan tur dik tak chu a ni mai. Sawrkar hnuaia thil tih phalna engpawh, intiamkamna neia phalna, permit pek kan nih phei chuan sawrkarin tih tur a tih anga tih leh sawrkar thu awih mai chu kan bat liau liau a ni.

Sawrkar thil tih apianga lo inrawlh ve tum phêt te, lo sawi ve phêt tum te, lo sawisel phêt leh lo dodal phêt tum ve zelte hi changkanna a ni lo. Mahni mimal emaw, mahni party emaw, mahni pawl emaw tihhniamna mai mai, mi min hmuh hniamna mai mai a ni duh ṭhin. Chuvangin, tute pawhin kan vaia tana ṭha tur thilah hi chuan lungrual taka thuawih taka awm i zir zel ang u.

Kan veteran politician Pu AV Pakunga'n, "Pawl thil tih anga lang si, mahse, mi zawng zawng tana ṭha si lo hi chu han chhui han chhui ila, chu pawl zinga tute emaw mi rilru hrisel vak lo mimal aṭanga lo chhuak a ni deuh zel," a lo ti a. Chutiang chuan, tuna taxi pawl hovin sawrkar thil tih dodal an tum pawh hi an member zawng zawng chuan an thlawp kherin a rinawm loh a ni. An zingah mi rilru hrisel tak tak leh rilru changkang tak tak eng emaw zat an awm ve ngei awm si a. Mahse, pawl anga thil tih hi chu a zâwm ve lotu nih kha nuam lo turin kha pawl kha intihlauhawm velna tura din kha a ni ṭhin si a. Amaherawhchu, tunlaiah chuan mi kan changkang tawh a, hmanlai anga mahni pawl thil tih zawng zawng, mi dang tana ṭha lo tur lam thlenga zawm ve duh lo ngam an awm ta niin a lang. Tin, anmahni lam kaihhnawih deuh pawh ni se, pawl nazawnga tel kher duh lo ngam an awm ta bawk.

Tin, sawrkar pawh hian uluk taka a ngaihtuah hnu leh, a hlawhtlin theihna tura thâ leh sum tam tak a sen ral tawhna, ram leh mipui tana ṭha zawk tur ngei ngei thil hi chu huai takin a kal tlangpui zel ngam tur a ni ang. Tun sawrkar phei chu engkim hi mipui tana ṭha tur leh awlsamna lam ngaihtuah ṭhin, sawrkar hmasate aia tih tak takna nei ni khan kan hmuh deuh bawk si che u avang hian, engkim in tih hi chu huai takin kalpui zel u la, mipui pawhin an la thlawp zel che u niin a la lan zel hi.

Tin, chutianga in thil tih lo dodal ṭhintu nazawngte hi chu engahmah ngai lo u la, engtiklai pawhin tute emaw hi chu sawrkar lai sawichhe pawl leh dodal pawl hi chu an awm ve reng tur kha a ni ve tlat si a. Mahse, sawrkar hmalakna leh mipui nunphung tikhaihlak khawpa chête hi chu dîm miah lovin, na takin hrem zel ni se; an chunga hremna, action lak theih chi ho phei hi chu an chunga sawrkar thutheihna ngei hmanga action lak hmak hmak ni zel rawh se. Ram leh hnam hmasawnna tur an tihṭhuanawp fo avangin sawrkar hi a takin che rap rap zel ṭhin se la, ka theih tak emaw tia hetiang tih ching ho hian an sim zel mai ang. Tin, mahni hlawkna tur chauh ngaihtuah avanga buaina siam ching leh mipui nunphung tihbuai ching ho hi chu mipui pawh hian thlawp lo ngam zel ila, kan ram chu kan felfai chho zel mai dawn a, India ram state dangte’n min fak zel mai ang.

Tun kan sawrkar hi chu a danglam deuh bawk a, an sawrkar hnuah tute emaw party angin an member-te tan Aizawlah taxi permit pakhat mah an la pe ve lo ni khan an sawi bawk a ni. Tuna Aizawla taxi tlan ho zawng zawng hi chu tuna opposition party ni mek hote’n an sawrkar laia an mi leh sate uchuak taka an lo pekte kha an la nih hmel hrih a nih chu. Chuvangin, tuna taxi pawl ho dodalna pawh hian awmzia tak tak a neih phei chu ka ring chiah lo nâ a, a engahmah hma, mipui mar pawh dek hmasa eih lova kawhmawh bâwl zawnga thu lo neih ve nghal ringawt hi zahthlak ka tih bakah, fuihpawrhtu an awm ngei ka rin bawk avangin heng thute hi ka han sawi ta duah a nih hi.

Tin, taxi ṭhenkhat hi sawrkar chhut dana permit nei ve si, mahse, mipui tana service ṭha peih tak tak lo, mipui tana chhawrnahawm loh tak tak permit nei ve si eng emaw zat chu an awm niin a hriat bawk. Chu'ngho chu kan ram, a bik takin Aizawla taxi permit pek zat zingah chhiar tel vek an ni tho si a. Sawrkar chhût dan leh sawrkar mit aṭang chuan chu'ngho chuan mi dang tana permit pek tur an dâl lawi si a nih hmel.

A bik takin Aizawla two wheeler taxi eng emaw zat pawh hi mipui tana service ṭha peih lo an awm em? Mahni chhungkaw tan chauhva che chhuak ṭhin, public service permit nei si an awm tam em? Mahni nawmchen nan mai maia public service permit nei an tam em? Mipui mamawhtute’n an hman dawn pawh a, "Ka hman lo, ka peih lo, ka duh lo" ti vel mai maia duhdah taka mipui chhang ṭhinte hi an ni em? Hengte pawh hi sawrkar hian eng agency emaw hmangin zir chian chi a ni tawh mai lo maw? Permit cancel theih dan tam tak a awm kha.

Tin, tih tak takna nei lo tute emaw, party mi an nih vang maia tun hmaa taxi permit an lo pek ve mai mai ho hnen aṭang hian kan state pawn leh India ram pawna mite’n an leisak leh an khalhsak hi tam tak a awmin a hriat a. Hengho leh sawrkar hmasa ho permit lo pek hoin Mizoram hmngaihna nei hauh lova mahni hlâwkna tur chiah ngaihtuaha mipui nunphung tibuai zawng leh sawrkar tibuai zawnga an chet hi sawrkar leh mipui hian kan remti tur a ni lo.

Mi ram changkangte’n motor kal hlat zawng leh chuan man dik tak awlsam taka digital veka an en zung zung theih tawh lai a, helaia rilru zîmtê put vanga tute emaw mi tlemtêin lo dodal ve khanglang hi chu a ṭhing em mai. A dodal ve lo permit neih ve duh hi kan tam tih sawrkar hian lo hre rawh se.

- K. Hmingthankaia