AIZAWL KHAWPUI VAWN FAINA LEH KHAWLAIAI HNAWM BAWM HUN
Aizawl khawpuiin neitu thar, hmangaih taka enkawltu tura Aizawl mipuiin an thlan chhuah corporator-te kan lo lawm a che u. Sap hovin, 'New broom sweeps well' an tih angin, Aizawl khawpui fai zawka phiat turin kan lo beisei che u a ni. Aizawl khawpui thianghlim leh fai taka vawng tur chuan kan hotute hian Aizawl bâl hi in hmai bâl tluka in ngaihmawh ve a ngai.
A hmasawnna kal mek hi chak zawka kaltir turin kan beisei che u a ni. Keini hi Khatla leh Tuikual South inrina, Treasury Square aṭanga kawr lo luang thla kawr kama awm kan ni a. Kum li kum nga kal taah kha chuan ruah a sûr veleha ek in chhuah hmangte an awm a, tukverh kan khar sawk sawk ṭhin. Léngkîr chhâwng a awm a, bawlhhlawh têl lian pui pui hi a tla ri dup dup mai ṭhin a ni. Tin, Aizawl khawpui veng hrang hrangah pawh ṭhâl ruahsur tuihâwkin kawra kan bawlhhlawh thuhruk a rawn len chhuahin hmun hrang hrangah motor kawng a dang thei hial ṭhin a nih kha.
Tunah chuan chutiang chu a awm ta lo. Tuihâwk pawh a lang thianghlim ta deuh. Hman deuh khan tourist ṭhenkhatin, "Aizawl chu a thianghlim tawh viau nâ a, khawlaiah bawlhhlawh paihna tur bâwm kan hmu lo," an ti a. An sweet kawr paihna tur an hmu lo a ni. Hei hi Aizawl faina tura kan hmabak pawimawh tak a ni. Kan ṭhalaite’n mi ram ṭhalaite tih dan an hria a, khawlaiah kal chunga thil in leh ei te an uar ve ṭan a. An ei ruahna paihna tur bâwm a awm si loh avangin kawng sir kil deuhvah an hûng ringawt a. A ṭhenin mi hmuh loh deuh tur laiah an thukru a, lung rem kuaah te an han hnawh lut ngawt a. Khawiah pawh dah se, hnawmhnawk a ni tho tho. Tourist kan ngah tulh tulh a, an lên paha an thil eina kâwrte leh bâwmte an paihna tur hmun pawimawh lai laiah kan hûn ngei a ngai.
Tun hma pawhin khawi maw lai laiah chuan hûn a ni a. Mahse, a paihtu ruahmanna fel tak a awm loh vang a ni ang, hmun ṭawp leh hmuh hrehawm lai an ni deuh zel. An khat thêr thûr a, a velah an tla hnawk neih nuaih a. A bul vel chu hnâwm paihna hmun a chang leh ṭhin. Chuvangin, kan AMC hotu tharte tihmakmawh pakhat chu Aizawl khawpui khawlaiah hnâwm bâwm hûn a, chung khawntu bik hnâwm paih motor pahnih emaw tal ruahman a ni. Chu chuan Aizawl khawlai faina leh thianghlimna kawngah kawngro a su hle dawn a ni.
- Commissioner Lalkiamlova,
President, Clean Aizawl City,