DAMDAWI HI LO EI VE TA CHE

Natna tih dam theih loh tih dam nâna damdawi mamawh a ni a, a siam chhuaktu chuan a siamna atân thil dang hmang lovin amah vêk chu a inchingral vek a, natna veitu zawng zawng tân a inhlan a ni. A siam zawh rual rualin chu damdawi chu damdawi a nihna lamah chuan a ṭha tâwk nghal êm êm a, natna veitu zawng zawng tâna siam a nih miau avângin, mi zawng zawng tâna damdawi famkim a ni. Natna damna tûra ṭul zawng zawng pawh damdawiah chuan a awm nghal vek bawk. Chu chu a hmingah damna dâwi an ti a. Damna dawi chuan a damna a ken sa nghal avang maiin, natna veitu lam chu an dam nghal vek tihna erawh a ni hauh lo. Natna veitu zawng zawng tâna siam damna dawi erawh a ni si!

He damdawi hi, siam chhuah a nih hma ata tawh natna veitute chu damdawi dang dang hmanga enkawl an lo awm tawh ṭhin a. Chu damdawi chu a thlen phak chinah chuan ṭha hle mah se, a thleng thui lo em em a; a aia ṭha zâwk siam a nih hmaa hman tûr a nih bawk avângin a damdawi chakna chuan tawp hun a nei zui a. Chu damdawi hlui lo ei tawhtute hlei hlei chuan chu damdawi thar chu an lo mamawh a. An damdawi hlui ei avanga an nat belhna lak ata damdawi thar a lo chhuah rual rualin, natna tidam tûrin damdawi hmasa chu damdawi thar chuan thlak nghal a ni. Damdawi hlui eia an taksa lo fan tawh zawng zawng thlak nân damdawi thar chu hman nghal a ni bawk.

Chu damdawi chu natna veitu zawng zawng tân a nih laiin, damdawi pakhat chauh a ni lawi si. Mi tam tak ei phâk turin, chu damdawi ei dân tûr chu ruahmanna siam a ni a, a damdawi eina hmanrua atân hmuh theih lamah chuan tui a ni a, hmuh theih loh lamah chuan thlarau a ni thung. A damdawi leh a damna tak chu a damdawiah khân a ni a. A siamtu hian amah aṭanga a siam miau avângin, amah ngei chu damdawia chu a ni. A eina hmanrua erawh hmanrua a ni mai a, damdawi erawh a ni lo. A hmanruaah chuan damna a awm lo va, a damdawiah zâwk chuan a ni damna a awm ni.

A eina hmanrua hmusit zawnga thlauhthlak chi a ni hauh lo thung a. Mi zawng zawng tâna damdawi ni ngei mah se, a eina hmanrua tel lo chuan ei theih a ni lo. Damdawi thar lo chhuak chu a chanchin hriat ringawt khân awmzia a nei lo va, a chanchin hria a, ei tûra a hmanrua awmna lam pan a, a hmanrua hmanga ei dân tûr bituk ang tak ei chu kan koa innghat a ni.

Mi tin ban phâkah chu damdawi eina hmanrua chu chhawp chhuah niin, a eitute’n chu hmanrua hmanga damdawi chu an ei veleh, damna keng sa damdawi chu an lo dampui ta ṭhin a ni. Amaherawhchu, an ei veleh khan damna dawi a ni chauh tihna ni lovin, damna dawi ni tawh sa reng kha dam nan an lo hmang ta tihna zâwk a ni! Chuvângin, dam nana hmangte chauh tân damna dawi tih hi dik thluamin lang mah se, a damdawi siamtu lam thlirna aṭang chuan damna dawi a nihna hi a eitu an awm hma hauh pawhin damna dawi a ni tho tho. Dam nan a hmangtute’n an damdawi ei hun kha damna dawi a nih tak chauh hun a ni tlat lo.

Khawi hmunah emaw chu damdawi eitute chungchang chu news-ah an rawn puang a. 'A eitute tân chuan damna ni ngei mah se, chu damdawi chu a eitute tân chauhva siam a ni' tih ngawt chi a ni lo. Khawi hmun emaw a damna tûra eitute chanchin an rawn puang a ni chauh zâwk. News pakhata an puan chauhte tân khan chu damdawi chu siam a ni kan tih vaih chuan, a siamtu zah lohna, a siam chhan hmuhsitna a ni hlauh thei a. A siamtu khan mahni taksa hlan meuhva a inhlanna ngainep zâwng chuan a eina hmanrua zâwk fak hliau hliau chu kal sualna a ni. A hmanrua aiin a damdawi zêl hi tuipui ila, mi dang dam nân a hmanrua aiin a damdawi chanchin hi sawi uar bawk ila, a damdawi eina hmanrua hrilhin, hmang ngei ngei tûrin i sawm ang u.

A damdawi eitute chu chi tina mi, hnam tina mi, ṭawng tina mi an ni a. Chu'ng damdawi eia dampuite chauh chu ‘damna dawi ei pâwl' tih an lo ni thung. Chu pâwl chu damna dawi hmanga damte an ti bawk. Damdawi chu mi tin tana siam a nih angin, a siamtu chuan ei tûrin natna veitute zawng zawng hi a duh a. Ṭhenkhat chuan a eina hmanrua chu tui leh thlarau a nih miau avângin an sit a. Damna dawi chanchin erawh an tuipui em em lawi a. A damdawi siamtu lah chuan a barh lui lem hauh lo bawk. Damdawi a nihzia hriaa dam nâna ngaitu, ka ei chuan ka dam ang titute tân a nih tlat vâng a ni.

Damdawi i ei tawh em?

- Samuel Dinté