SIPMIU kawng laih chhiat

Aizawl khawpui thli paih nan SIPMIU chuan hma an la mek a, an hma laknaah, kawngpuiah pipe an phum a, a hma angin an siam ṭha leh si lo a, kum tluanin kawng chhia kan neih phah ta dawn a nih hi.

Pipe phumna an han vur leh hnuah alkatra nen an luan leh a, mahse a hma ang a ni thei tawh lo. Manhole an siamte lah chu kawng chhuat ruala dah awm tak a nih laiin, a poh vung mai a. A ṭhen chu kawngpui lai takah a awm a, motor kal vel tan phei chuan kal a tinuam lo a, mipui himna atan pawn a ṭha lo. Kawngpui a chêp si a, motor veivak a tam si a, kea kal an tam bawk si. Manhole hela kal motor leh mihring kal intihpalh mai a hlauhawm hle a ni.

Kawngpui dung an laihchhiat, alkatra nena an thuam ṭhat leh chu a khawk a, lei a la muk hmaa alkatra luan kha a ni bawk a, tunah chuan chhe tawh tak a ni. Naupang tlakhawlh siama lei an laih khuar ang vela thukin a khuar thluah mai a. Bethlehem leh College Veng pheia kal ṭhin chuan SIPMIU ho hi in rilruin in hauh ve ziah ka ring. Hetilai kawngpui phei hi tun-hma chuan zawh nuam leh kawng ṭha pangngai tak ṭhin kha a ni a, an rawn lai chhe vek mai a, a veng neitu leh hemi kawng zawh ṭhinte tan chuan a huatthlala duh ngei mai.

SIPMIU-in kawng an tihchhiat hi a tir chuan Aizawl khawpui tana nakina thil ṭha zawk thlentu tur alawm tiin ka pawm thiam viau. Mahse fur a liam a,
ṭhal kan thleng chho ṭan a, kawng thawm-ṭhat awm ta reng reng lo chuan a awm ta a, a lungawi thlak loh hlein ka hria. Krismas bazar hun kan thleng chho a, kawng a tawt a, a zawhtu kan tam tial tial a, kawng a chhiat avangin a hma aiin traffic pawh a jam duh hlein ka hria.

Tuna kawng chhia hi siam harsa tak ni pawhin a lang lo. A khuar lai leh pawp laite hi rora leh alkatra nen chhung khat se, kawngpui chhuat pumpuia siam pawh ngai hran loin zawh nuam takin a siam theih.

Fur lo thlen leh hmaa an siam ṭhat loh phei chuan hetilai kawng hi kal hreh-awm khawp a ni leh-zual dawn, tunah mai pawh hian kal hrehawm tawh tak a ni. Duhthlang reng rengin kan buai a ni ber mai, duhthlanna duhawm lo pawl tak a ni.

Manhole an dah dan hrim hrim pawh hi ruahmanna an nei ṭha lo nge niang tih mai turin an thiam lo. Kawngpui chhuat aṭanga inchi 6 vel zeta sang te, chu aia sang mah te a ni a, kawng mam ṭha sa an rawn tichhia a ni ringawt mai. Hetiang em em hi chu a ni lo deuh. Mizoramah hian kawngpuia motor zawh nuam tawk tura manhole siam thiam kan awm lo nge ni, hetiang em ema themthiam loh mai chu mak tak a ni.

- Lalthlamuana