Mas boruak dik thâmral ngaiin ka pau e!

Lemchanna Zoram khaw-velah hian kei chu hunpui lo thleng turah hmanlai ngaiin ka kiu lawk veng veng mai. Kum thar kan han chuan kai tirhah zaikhawm nasat avanga aw chhang taka inbiakna thawm duhawm kan hriat ṭhin kha hriat leh châkin ka beng a za leh dawn a ni.

Lal lo pian chhan rilzia sawi-fiahna awm lo chu thil thleng pangngai ve maia ngaihna boruak kârah Lal Isua hi hmâna Bethlehem daia a vakvai ang bawkin hunpuiah hian a hnawng leh dawn a. Hmangaihnaa luangliama’n khawngaihna ril ber nena lei a rawn pan zanah hian Zoramah khawharna bawk a rawn chang leh dawn a ni.

Kohhran ṭhalai rualte chu kawn leh biak in cheiin an hmanhlel leh ang a, thawk ṭha an va inti leh dawn êm! YMA lam chuan misual rual vehin hun an hmang ang a, hun hmang ṭha tih an hlawh ngei ang. Kan khawpuite chu hmuhnawm taka siamin a en turin kan kal hum hum ang a, nula leh tlangval lahin an kawppui leh ṭhiante nena hun nuam hman nân an hmang bawk ang.

Kan culture nena inlai-chinna nei map lo mas tree buaipuiin kan hmanhlel ang a. Chhangban aiah mas cake mawi leh tui ber ber hmangin kan inhrai leh ang. Kan in leh a vel, biak in leh kawn nen kan thinlunga Lal Isua min chhandam tura a lo kal avanga lawmna ril ber chang tak tak si lovin lawmthu sawi nân tiin kan han cheimawi ang a, kan lawmna kan lantirna hmun tur ber Amah fakna hmun, Zaikhawmna In erawhin luahtu a nei tlem leh êm êm si ang!

Presbytery leh ABC inkhawmpuia TV hmaa lam peih êm êm rualte kha chung hunahte chuan an awmna reng reng kan hre lovang. Mi piangthar rual an inti ang, chunglam thutlukna erawh kan hre lo. Kumtluana a kul a taia KṬP leh ṬKP etc lama ṭuanṭul ber berte pawh he Lal lo piang fakna hmunah hian mi tlem tê bak i hmuh ring suh.

Chutiang bawkin Pavalai, BMP, Nuho leh Upa te thlengin hmun 10 a ṭhena hmun khat vel bakin he Lal lo piang hi an fakin an chawimawi peih chuang lovang. Chu ai chuan Mas putar, kan hnam tâna pawimawhna reng nei lo lukhum khumin hlimna dang zawngin kan vak ruai zawk ang. Ni, kristian hi chi thum kan awm a. Pathian tâna mi hrat khawkhêng an awm a, anni hnuaiah active member awm lehin, anni hnuaiah hian normal, an hnuaiah abnormal.

Kan fate chu zaikhawmna hmuna hruai aiin kawn chei en turin kan chhuahpui leh sup sup ang a. Hmanlai kha zawngin a pui a nawiin zaikhawmna in lamah kan fuankhawm ṭhin kha a ni a. Chumi kalsana thil ṭha a hming vuahin kohhran ṭhalai lam lahin gospel concert tiin hun hran an lo hmang bawk ang. Kan culure kalsan tuma kan hmanhlelhna apiang mai hi rawngbawlna tiin kan vuah thlazen a. Nimahsela, chu chu Pathianin a mite a pawl dan a ni lo tih kan man si lo. Korea unaute Pathian pawl dan leh Chinese unaute hun hman dan a inang lo ang bawkin America nen inanna a nei lo.

Heng hunah hian Kohhran Upate rilru a hah ṭhin mang e! Ruaiṭheh dân bik kan neih, balhla hnah chunga ruai eiho dial dial nawmzia kha changkanna kan tih mai hmangin kan hnawl a. Mimalin chaw kan dawhin kan ei hi zawng ruaiṭheh a tling phak lo va ni. Kan lemchan hi kan Pathian lawmzawng a ni hian ka ring lul lo. Kristian kan nih hnuah kan inngaihdam dânte hian phut a nei ta zawk a, kan thiltih ṭhatte chu mipui chhiar turin kan inpholan siak ta zawk a nih hi.

Ni, hunpui lo thlengah rawngbawlna tiin khawvel ngaiha thil ṭha tak tak kan ti leh ngei dawn e. Van lam tehfung aṭang zawk erawh chuan rawngbawlna tling a ni si lovang. Piangthar dik tak thliarna hunpui lo thleng ṭhin hi thlir liam mai suh.

A pasalṭha, mi hrat khawkheng rualte chuan zam hauh lovin, tam leh tlem pawh sawi lovin zaikhawmna hmun an pan ang a, Lal lo piang fakin an chawimawi mai zawk dawn a ni. Chu chu chunglam duhdan pawh niin tawpna ni a lo thlen hunah pawh heng mite hian a ni chawimawina chang zawk dawn ni.

Kalphung fel tak min lo ruatsak diam tawh a, chumi hmang chuan kan mi hmasate chuan Lal piancham hi lawmin hun an lo hmang ṭhin.

Ṭhing hi a la kristian ngawih ngawih a, hmanlai tihdan hi a la Pathian thu ngawih ngawih bawk a ni. Kan nihna dik lo lan zanah hian tuarchhel a, i Lal phatsan zawngin awm suh. Thil ṭha niawma an sawi leh an tih nazawng bawhin i Lal lo lawm suh. Biak in lamah kalin zaikhawm hunah aw chhang vek khawpin i Lal fak mai rawh. Nakinah amah hian a la chawimawi ve dawn si che a.

- Lalremliana Pachuau