Sick unit ṭhin MIFCO-in hlêp an nei ve ta

Cheng vaibelchhe 1.35 leiba nei saa bul ṭan khan hlêp neiin an kalpui ta a, sorkar tana phurrit ni tawh lovin, sorkar puitu an ni ta mêk. Chu chu Mizoram Food & Allied Industries Corporation Limited (MIFCO) a ni.

MIFCO theitui tuai tharna

May 7, 2026 chawhnu khan MIFCO chuan Chhingchhipa an plant-ah 'Ready to Serve’ beverages lakhuihthei leh sapthei tui an tlangzarh a, in mai theih theitui chi hnih hi Finance Secretary Pu Ramchuana’n a tlangzarh a ni.

Lakhuihthei leh sapthei tuite hi Rs 10 mana siam a ni a, a hmain tui pawlh chawpa in theih tur lakhuihthei leh sapthei tui an lo siam tawh. Tuna mi erawh Rs 10-a leia tui pawlh ngai lova in mai theih tur a ni; hmasâwnna pakhat a ni.

A tlangzarhtu thusawi tawi

Tlangzarhtu Pu Ramchuana chuan, “13th Finance Commission-ah khan sum a harsa a, MIFCO pawh hi private kuta hlan rèl a ni. Sorkar tharin hmalaknate chhawpin mumal deuha kalin product pahnih tlangzarh theiin kan awm leh ta a ni," a ti. Hma la tak takte ṭanpui an inhuam thu sawiin, "Hmalâk tum tak takte ṭanpuina inpêk hi chu kan inhuam em em a ni," a ti a. MIFCO ṭhang zel chu thlâwp tlat turin mipui a sawm bawk.

PSU tihtawp vek duh tawh hnu

Pu C. Lalnunnema, Vice President ZPM Gen. Hqrs. chuan, audit lama awm ṭhin a nih avangin Corporation, PSU-te chu tihtawp vek an duh ṭhin thu a sawi a, “Amaherawhchu, sorkar thara kalphung tharah kan ram tiṭhang lian tura hmasâwnna ropui tak ka hmu a, hmasawn zawnga kan kal ta hi a lawmawm," a ti a. Sorkar puih ngai nih aiin, sorkar ṭanpuitu nih a pawimawh zawk thu pawh a sawi.

Chairman-in hlêp a sawi

MIFCO Chairman Pu Lalṭhazuala Rawite chuan, in tur an siam chhuahte a hrisel a, a thianghlim thu a sawi. Sorkara an leiba an rulh zawh mai bakah, kum 2024-25 khan cheng nuai 14 an hlêp thu a sawi bawk. "Kan siam hi ei tlak, ei atana hrisel leh changkang a ni a, FSSAI certified a ni. Baibing, rawtuai leh mautuai ṭîn siam chhuah thuai kan tum a, kan enchhin mêk," a ti a. Leiba cheng vbc 1.35 awm sa an chhawm chu an rûl zo tawh a, an hlêp mak tawh zawk a ni.

MIFCO hian hmun thumah hmun lian tak tak an nei. Sairanga an hmun chu rel a thlen tâk avangin Warehouse Complex atan siam an tum a. Bungbanglaa ran talhna chu outsource tawhin, Zo Meat kutah an dah a, anni hian vawksa thianghlim an zuar. MIFCO, Chhingchhipah processing unit pahnih an buatsaih leh dawn niin Pu H. Lalrochâma, General Manager chuan a sawi. MIFCO hian sorkar phalnain buhfai an supply a, petrol pump siam turin hma an la mek bawk.

Tlipna

Tun hma chuan kan PSU-te hi 'sick unit' tiin sawi a ni a, hnathawktu tam tak chawlhtir an lo ni tawh. Sorkarin a manganpui a, hmun ṭha leh khawl ṭha tak tak nena a thuam chungin, sorkar sum ei raltu mai an ni ṭhin. Thawktute hlawhah sum a kal ral nasa em em a, senso a tam ṭhin hle.

Tunah chuan MIFCO chu a hlawk zawngin a kal ṭan ta a, ZOHANDCO pawh a hlawk zawnga a kal theih ngei beisei bawk ang.

~ Zoa Tlau, Buannel Cabin