Ka dáwn kîr ṭhin

Puitlin hnuah rualban lo nihna, sorkhar leh Civil Hospital, Aizawl doctor ten Unique Disability ID pek ka ni a, ka pianpui sakhmel tak kha duhthusama ṭha a ni hauh lo mah se, tuna zawng, ‘Thimin lei a tuam lai’ leh, ‘Leilung rêng a din chhuah hmaa piang tawh’ ni awm tak hmel ka put chhante hi ka thlir let ṭhin a. Hlim hmela mittui a luan châng a va tam si em; theih ni se, hlim lai ni leh vanglai nite kha ka liamtir bik lo tur. Tuaithara din ṭhat leh theih a ni tawh si lo.

Hringnun hi engmah lova ngaitute nun pikzia ka hre tawh a, dam thlakhlelhna reng nei tawh lote nun thlengin ka hai lo. Hmangaihtu phûm boin an awm a, khawvelah hian mal leh khawhar tak tura duan em ni ka nih? Chak lohnaa thuam, famkim tura duan ka ni bik lo va, chan tawka lungawi zir turin hringnun hi ka chhiar bek bek a. Lungngaihna chhûm dum phêna Lalpa’n ka tan hlimna ni chhuak êng mawi tak chu min la hmuhtir ve ang, tiin, a êng zawngin ka thlir hram hram ṭhin a. A harsat lai ber pawhin vuithu ka chham ngai lo. Mahse, mahni chauh hi chuan hrehawm tih châng hi ava tam si em.

Ka hawi vel a, ka tawrhnate avanga ka insit viau lai hian, pian tirh aṭanga khawvel mawina leh Pathian thil siam ropuizia la hmuh miah lote’n hlim tak maia Pathian an fak ka hmuh hian, ka vânneihzia ka hre thar leh ṭhin a. Nun beidawngin, phunchawng par tlana mumang bo ṭhak khawpa ka mut zante awm ve bawk ṭhin mah se, a tawpah chuan ‘Lalpa, nang lo chu’ ka ti leh ngê ngê ṭhin a nih hi.

Tute pawn nun hlui chhui kir tur kan nei vek a. Chu kan nun hluiah chuan kan chêng reng tur a ni lo va, a ṭha lo laite siam ṭha turin Lalpa’n hun min la pekah hian mawhphurhna kan nei a ni. Hamṭhat duh luata dâwt hmanga kan lo hlâwknate a lo awm a nih pawhin, kan hma hunah chuan chutiang laka fihlim tura dikna vanga chân ngam turin kan inbuatsaih a ngai a ni.

Biakin khata kan lawipuite nen politic huangah dâwtin kan inbei a, kan rawngbawlna hian rah a chhuah thei lo a nih hi. Ngawlhveite’n kohhran mite pawh engmah an ni lo, min tihna chhan hi a dik asin. Thlarau rah hi a hun leh hmuna kan hman si loh chuan, kan thusawi ṭha tak tak te, kan ṭawngṭai thu mawi tak takte hian Van a han thleng pha mawlh lo a nih hi.

Kan ramah hian biakin engzat nge awm ka hre lo va, zing ṭawngṭai dar riin a koh harh zawh tawh loh sang tam tak zingah hian, kum lama chawhnu tawhte’n thlasik khawvâwt tak leh ruahsur karah pawh kan ram leh hnam tan chunglama meikhu ang maiin, dilna an thlen chho reng a, chu chuan kan ram hi a la hum hram hram a ni.

Politician-te u, in sûlhnu in la thlir kir ang a, in lung a awiin in ring em? Kan rin Pathian, chawlhkar tina biakina kan inkhawm chhan hre rengin politic hi dâwt tel lo hian, thianghlim takin a khelh theih tih hi hre reng rawh u. Ukil leh judge, magistrate-te u, thil sual ti te, mi fanu duat pawngsualtu te, kan nula tlangvalte nun suattu ruihhlo tawlh ṭhinte leh zuar ṭhintute in chhan him a vang hian in nun a nuam em? Mi dik chauh tan ding u la, misual chu a phu tawk hremna tuar turin thlah liam tawh rawh u. Jail aṭanga i chhan chhuahte hnen aṭangin no. 4 in fanu fapate’n an lei ni a lo thlen hunah chuan inchhirin awmzia a nei lo vang. A tlai kan tih chuan a pawi lutuk tawh ṭhin. In sulhnu, hlawkna in lo tel tawhna ngei chuan in mittui a la luantir ngei dawn a ni.

Hringnun hi a ngai rengin a kal lo va, vawin ni hi her liam thuai thuai se kan tih lai hian, ṭhenkhatin vawinah hian chêng reng ila tiin, hlim takin hun an hmang mek a. Vawinah hian engmah tih tur kan hre lo a nih pawhin, kan tih loh tur pawh kan hriat a ṭha a nia. Vawinah hian thil ṭha sawi tur kan nei lo a nih chuan, sawi loh tur pawh kan hriat a ṭha ngai e. Kan ṭawngkam hian mi nun a tichau thei tih hria ila, zir tawp ni nei lo hringnun kan zirlai hi ni tina kan zir a, kan nun kan bih nawn reng zawngin, he kan ram leh hnam hian hmasawnna leh ram nuam takah min hruai lut ngei ang, tiin ka dáwn kîr ṭhin.

- Zothansanga, Chhiahtlang Kawnveng. 9612333536.