Zebra crossing-ah din loh tur
Aizawl Traffic Police chuan tun June thla tir aṭang khan zebra crossing-ah din loh tur tiin thu a chhuah a, thu a chhuah mai ni loin, zebra crossing tinah hriattirna a târ a, lirthei khalhtute pawhin an zâwm ṭha viau mai.
He thuchhuah hi zebra crossing-ah din loh tur a ni satliah lo a, a phênah thil tam tak a awm. Zebra crossing hi mihringin kawngpui an kânna tura siam a ni a, kan lirthei khalhtu tam tak hian kea kalte kawng kân laiin an ngaihsak vak lo a, a sut thawi thuak thuak châng a awm fo a, zirtirna ṭha tak an chhawp chhuakah kei chu ka ngai.
Kawngpui hi lirthei tan chauha siam a ni lo a, kea kalte zalen taka an kalna tur a ni tel tih lirthei khalhtute hian kan hriat a ngai. Chu chu Traffice Police pawhin zirtir ṭhat lehna a siam ti ila a sual tam lo ang. A ṭha thlawt a ni. He thupek hian nghawng ṭha tak a nei tih mit ngeiin kan hmu tlang a, lirthei khalhtute pawhin kawngpui kân turte an zah phah em em. Hei hian nasa takin chetsualna a veng ngei ang le.
Zebra crossing-ah lirthei din loh tur tih inzirtir kan la ngai hi kan la changkan loh vangah a ngaih theih bawk awm e. Khawiah pawh zebra crossing-a mihring kawng kân dawnin dimdawi lo an awm mang lo. Kan ramah erawh mihring kawng kân tur pawh lo awm se kan tlan tlang vâwk vâwk zel a, zirtir kan la ngaihzia a tilang.
Tun hnaiah Aizawl khawpui kawng chu PWD-in an siam a, kawngpui a mam ṭha ta hle. Lirthei an tlan chak em em hlawm a, tlaivara duty ngai hial khawpin speed chak mangkhênga tlante an check ta hial a, kawng kân pawh a harsa sawt a ni.
Traffic Police-te'n hma an han la chho ta tak tak a, lirthei speed sang lutuk a ziaawm ta viau a; zan reiah erawh chak tak taka intlansiak ni awm tak an la awm nual. Hengho pawh hi inchhungkhur aṭanga zirtirna pek bakah traffic police-te hian ṭan han la zel teh se.
Zebra crossing-a din phal loh hian nghawng ṭha tak a nei a, kea kal tan pawh a hahdam thlak ta hle. Chutihrual chuan, kea kalte pawh kawngpui kân danah hmasawn a ngai ve tho. Zebra crossing a nih vanga lungmuang tak leh zawiawi lutuka kawng kân loh a ngai.
Zebra crossing chang ni loah pawh upa leh tar te, nau pua leh nau pai thlengin dimdawi erawh lirthei khalhtute’n an ngaih pawimawh zel a ṭul. Ṭhenkhat phei chu rualbanlo leh huihphai deuhte an ni thei a, fimkhur taka lirthei khalh hi kan tihmâkmawh a ni.
Tow wheeler khalhtute mawlh hi an hmanhmawh uchuak fo. Lirthei a tawk zawka intlanpelh laia a laia lo tlan tlat an tam mai. Heng ho hian dan an bawhchhia tih an hriat a ngai. Traffic Police pawh hian khawi lai laiah emaw chuan thlithlai thei se, chutianga tlan vûk vûk an hmuh chuan a hmunah dintir se, dan phal loh a nih thu te, an tan leh an tlan pelh tan a hlauhawmzia te hrilhfiah se an zawm em em ang. Man buai kher loa hetia an tih a nih chuan zawm a hlawh em em ang.
-Lal Rinmawia