Rajya Sabha MP

June ni 18, 2026-ah hian Rajya Sabha MP thar kan nei dawn a. Rajya Sabha MP hi mipuiin indirect-in kan thlang a, kan aiawh MLA-te’n an thlang ṭhin tih kan hre vek a. Seat khat chauh kan nei bawk nen, ruling party candidate chu MP-ah an tlin mai ṭhin avangin, a vawi khatna atan ZPM party-in Rajya Sabha MP a nei ngei dawn a tih theih.

Rajya Sabha-ah hian a tam berah member 250 bak a awm theih loh va, tunah tak hian member 245 an awm mek. Parliament Upper House kan tih mai Rajya Sabha hi British awpna aṭanga indang kan ni bawk a, thui tak India hian inrelbawlnaah hian kan copy a, England-a House of Lord kan tih ang deuh khu a ni.

Rajya Sabha-ah hian India ram Vice President chu chairman an ni ṭhin a. Lok Sabha angin a ṭhiah (dissolve) ve theih lo va, permanent a ni. MP term hi kum 6 a ni a, member hmun thuma ṭhena hmun khat (one third) hi kum hnih zelah an term a tawp a. Term tawpte aiawhtu tur member thar thlan an ni ṭhin a, member awm sate zawmin, kum hnih dangah hmun thuma ṭhena hmun khat kha an term a tawp zel a, tichuan, a hlui leh thar kha an inbânlek reng ṭhin a ni.

Member 250 zinga 238-te chu thlan an ni a, ruat seat-ah 12 a awm a, India President in a ruat ṭhin (tunah tak chuan mi 233 thlan leh 12 ruat nen 245 an awm mek). Kawng hrang hrang–zirna, sport, thiamna lamahte mi hmingṭha, ram tana chhuanawmte an ruat ṭhin.

State population azirin member neih zat a inang lo hle. Uttar Pradesh chuan Rajya Sabha MP 31 an neih laiin, Mizoram leh Goa te chuan seat khat chauh kan nei thung. UT pariat zingah pawh Delhi, Puducherry leh J&K te chauhin member an nei a, a tê deuh leh Assembly nei hran lo Ladhak te chuan Rajya Sabha MP an nei lo.

Rajya Sabha MP thlan dan hi STV (Single Transferable Vote) an ti a. MLA-te’n candidate an duh ber aṭangin number an pe thla zel ṭhin. STV hi ziak chuan sawifiah thiam a har deuh a, ṭhalai lam tan chuan FIFA Footballer of the Year an thlan dan ang deuh a, duh ber, duh ber dawttu tih ang deuha an vote thla duah ang deuh hi a ni ber.

Mizoramah erawh seat khat chauh kan neih vangin ruling candidate apiang an tling zel a, seat tamna deuh state-ah chuan cross voting (mahni party candidate ni lo thlan/vote) pawh a awm thei a ni. Cross voting hi thil thleng zen zen lo a ni chungin, kum 1998 khan Maharashtra state-a Rajya Sabha MP thlannaah ruling Congress aṭanga an candidate zinga mi tling lote pawh an lo awm tawh a ni.

Rajya Sabha member-te hi minister an ni ve thei vek a, fund pawh Lok Sabha MP-te nen a inzat reng. Money bill reject emaw, amend emaw an thei ve lo va, Demands of Grants-ah vote an la ve thei lo bawk.

Mizoram lam

Mizoram UT tan July 1972 aṭangin Rajya Sabha MP kan nei ṭan a, Pu Lalbuaia kha a hmasa ber niin, July 1978 thleng MP a ni. A dawtah Pu Lalsawia kha a nil eh a, 1978 aṭanga 1984 thleng a ni. Dr C Silvera kha 1984 aṭanga 1990 thleng a ni a, Pu Hipheia kha term hnih MP niin, kum 12 lai, July 1990 aṭanga 2002 thleng a ni. Pu Lalhmingliana kha 2002 aṭanga July 2014 thleng a ni a, term hnih, kum 12 bawk MP a ni. Tichuan, Pu Ronald Sapa Tlau kha 2014 aṭanga 2020 thleng a ni a, July 2020 aṭanga 2026 thleng Pu K. Vanlalvena a ni leh bawk.

Kan Rajya Sabha MP zingah hian term hnih, kum 12 lai ni chu Pu Hiphei, Congress leh Pu Lalhmingliana, MNF te an ni. Dr. C. Silvera kha Rajya Sabha leh Lok Sabha MP ni kawp thei awm chhun a ni a, Union Minister of State kan neih ve tawh awm chhun a ni bawk.

A hmasa ber Pu Lalbuaia hi Mizo Union hun lai a ni a, term hi khawih chet theih a nih loh vangin PC sawrkar lai khan PC hian Rajya Sabha MP an nei hman lo. Pu Hipheia leh Pu Hminga te hi an vannei a, party-in an ruat nawn hman a. Kum 2008 aṭanga 2018 thleng kum 10 lai Congress kha sawrkar mah se, Rajya Sabha MP ruatna hun ṭum khat chauh an nei a, Pu Ronald Sapa chiah an ruat hman a ni.

Rajya Sabha MP-te hi MLA-a candidate ni tawhte an ni fo a, Pu Lalhmingliana, MNF te, Pu Ronald Sapa, Congress leh Pu K. Venlalvena, MNF te pawh MLA ding tawh, tling lo vek an ni. Pu Hiphei hi MP leh MLA ni kawp thei awm chhun a ni âwm e.

Tun ṭumah hian ZPM party aṭangin MP kan nei a nih chuan Mizoram UT hun lai aṭangin Mizo Union, Congress leh MNF ni lo party dang Rajya Sabha MP kan neih hmasak ber tur a ni dawn a ni.

- Hruaia Kawlni