Tourism Director buaina chungchang

A boruak reh tawh mah se, Tourism Department Director atana Pi R. Lalrodingi dah chungchang kha i'n sawi ve tah eng. Pi R Lalrodingi hi April 30, 2026 thleng sawrkar hnathawk (govt. employee) a ni a, May 1, 2026 aṭangin a pension a, sawrkar hnathawk a ni tawh lo. A pension lai hian Tourism Director leh OSD to CM ni mah se, a thawhna department dik tak chu Commerce & Industries Department a ni.

A pension hma, April 24, 2026-ah DPAR-in Pi Rodingi chu May 1, 2026 aṭanga Tourism Director ni zui (re-employ) tur leh OSD to CM ni zui zel tura tihna order a chhuah. May 15-ah DPAR-in order chhuah lehin, Pi R Lalrodingi chu OSD to CM atan a ruat a, Tourism Director atan a ruat tawh lo. May 22-ah DPAR-in order a chhuah leh a, OSD to CM Pi R Lalrodingi chu Tourism Director charge la tura tih a ni.

Tourism Director charge la tura Pi Rodingi dah a nih avangin MZP-in May 25-28 chhung Tourism Directorate-a pisa kai tur an dang a; May 29-ah Pi Rodingi'n Tourism Director aṭanga bânna a thehluh avangin MZP chuan an titawp nghal.

Pi R Lalrodingi hi sawrkar hna aṭanga a pension tawh avangin govt. employee a ni tawh lo. Sawrkar hnaa regular employee (a ngheta thawk)-te awmna tura sawrkar hnathawk ni lo dah hi thil tih loh tawp turah ka ngai a; dan (CCS Rules emaw) kalh a nih ka ring. Sawrkar hnathawk lovin sawrkar hna a thawh hi thil dik lo a nih avangin he ZPM sawrkar hian aikal lâk pawh a titâwp rêng a ni lo'm ni?

Sawrkar hnathawk nghet post pawimawh lutuk–head of department atana sawrkar hnathawk ni lo dah hi a dik lo, a dik lo hulhual. Tourism Director atana Pi R Lalrodingi dah a ni pawh kha a dik lo. Tun hnuah chuan tih tawh loh tawp chi a ni.

DPAR order-ah khan Pi Rodingi kha Tourism 'Director' ni lovin, 'Director charge' la tura tih a ni. Director ni thei an awm rih lo a, mi dang charge an laktir a nih tho si chuan, Joint Director ni mek hnenah charge laktir mai âwm tak a ni.

Joint Director hi Director-ah la kai pha lo mah se, 'charge laktir' erawh a theih lohna tur a awm lo a, tih ngai loh a ni lo. Post hniam zawka awm hnena post sang zawk 'charge laktir' hi Mizoram sawrkarah hian a tam tawh. Mizoram sawrkar college-a Principal anga thawk mek zawng zawng deuhthaw hi Principal tak tak ni lo, 'Principal charge laktir' an ni.

Mizoram Tourism Service Association (MTSA)-in Pi Rodingi Tourism Director atana dah leh a nih avanga an lawm thu press release hmanga an puang kha a zahthlak ka ti a, ka lo zahpui. Anmahni an intithangtlâwm a, an inti-cheap hleah ka ngai. Officer 'kei ka ni' inti ve tan chuan a tlâwmthlak a ni.

Tourism Department hi Pi Rodingi awm hmain rei tak a kal tawh a, thil tam tak an lo ti tawh a; a tel lovin an kal zel dawn. Tourism dept-a thawkte hian mi pakhat avanga kala kal lo tur an ni lo tih hi an hre chiang tâwk lo nge? An hre reng a, eng emaw avangin Department-in a mamawh angin an ngai lui pawh a ni mai thei e.

MTSA-in Tourism Director charge Pi R Lalrodingi laktirin mi dang kaisanna leh ṭhalaite sawrkar hnaa luhna tur a dâl lo, an tih erawh kha chu 100%-in a dik tih ka'n sawi tel ve hrâm teh ang.

- Zoramchhana