CIVIL SERVICE PAWIMAWHNA

India sawrkar inrêlbâwl danah hian mipui hamṭhatna tur leh enkawlna kawngah sawrkarin sawrkar hnathawk a siam a. Chung sawrkar hnathawk zinga pawimawh em em mai chu Civil Service hi a ni. British-in India a awp lai pawh khan mipui maktaduai têl enkawl nan Indian Civil Service (a hnua Indian Administrative Service tih tak) leh Indian Police Service hmangin administration felfai tak a kengkawh thei a ni.

India ramah hian sawrkar hnathawkin a thlen san theih ber chu Cabinet Secretary a ni a, chu chu IAS-te’n an chelh ṭhin. India ramah state hrang hrang kan awm a, state tin Head of Administration chu Chief Secretary a ni. State chu district hrang hrangah ṭhen darh leh a ni a, district tin head chu DC a ni a, district chu sub-division-ah ṭhen leh a ni a, administration head chu SDO (Civil) a ni. A ṭhen têt berna chu block a ni a, administration head chu BDO a ni.

Civil service kan tihte hi sawrkar hnathawk dang nen an danglamna lian tak chu, mipui nghênga an awm ṭhin hi a ni a. Thingtlang kilkhawr ber ber thlenga hrût chhuaktu, mipui mar dek thiam tura chher an ni. Chuvangin, ‘Backbone of the Government’ tite’n an sawi ṭhin. Ram leh sawrkar ruhrel pawimawh an nih avangin ‘steel frame’ tiin an sawi ṭhin bawk. Chuvangin, sawrkar hnathawk dangte nena an hlawh inanna emaw, level inanna emaw anga khai rual ngawt chi an ni lo.

India sawrkar pawhin IAS leh IPS te hi Mizorama hmun kilkhawr ber thlengin a rawn dah a, BDO, SDO (Civil), etc. hna a chelhtir a; chutianga mipui zinga an tâl hmasak phawt chu kalphung nghet takah a nei a ni. Civil service-te hi khawpui lum laia ṭhu ringawt a, file enkawl ringawt lovin, a tak takin a hmunah an kal chhuak a, mi harsa ber berte dinhmun hre turin an in chhungah an luhchilh a. An mutna dâp chhuatah an han mu vang vang a, an inthiarna hmun thlenga hmuhpuitu an ni. Buaina a awmin ro rel tur leh thutlukna siam turin an ding a, chhiatna a thlenin an awm a ngai a; ziaka awm lo thutlukna leh remruatna siam ngai tam tak a awm ṭhin. Hei hi ‘field experience’ an ti a, sawrkar hnathawk dangin an neih ve loh a ni.

India ramin IAS leh IPS te field experience neia a chher hriam angin state tiin state civil service leh state police service te an nei ve leh a. Anni pawh hian state chhim leh hmar, chhak leh thlang an fang kual reng a. District tin inthlauh dan hre chiang em emtute an ni. Field experience ni 3/4 vel châma va tlawh lam a ni lo a, a kuma kum an chên chilh a ngai a; sik leh sa, fûr leh ṭhâl dinhmun te, fûr chhiat laia an fairêl bêl dinhmun te thlenga hriatthiampui a pawimawh a ni. Infrastructure an mamawh dan te, community hall sa tur pawha hmanrua lak khawm harsat dan te, a ṭhente chu lawnga bungraw phurh ngai an nihzia te hmuhpuitu chu kan civil service-te hi an ni.

Hetianga an chher hriam hnuah hian sawrkarin policy siam turin an ngaihtuahna zau tak, mirethei thleng phak ngaihtuahna kha a hmang ṭangkai ta ṭhin a. Civil service-te’n field experience an neih hnuah chuan an ngaih pawimawh zawng te, public interest dik takte an hrethiam ta a. Chuvangin, Central-ah leh state tam berah chuan policy duannaah te, budget duannahte an tel ngei ngei ṭhin a; tin, decision siamtu ber atan pawh an hmang a ni.

“Indo (war) tih lovah chuan inthlanpui (general election) a pawimawh ber e,” an ti ṭhin a. Election Commission of India hian heng election kaihhnawih khawih tur pawh hian civil service kher a duh ṭhin a. Electoral roll chungchangah phei chuan an thutlukna siam hi court-ah khin theih a ni lo. Inthanpui a awm dawnah pawh civil service-te awmna (posting) thlengin ECI hian a duh dan a rawn sawi ṭhin.

Mizoramah hian hetianga mipui nghênga awmte field experience pawimawhna hi kan la hre fuh tâwk lo deuh niin a lang a. Field experience nei rêng rêng lote thutlukna siamtuah kan hmang fur a, kan ngaihtuahnain Aizawl bak a pêl lo fo rêng a ni. Sawrkarin flagship programme a siamnaah te, hmalakna thar a duannaahte hian field experience nei civil service-te hi hmang ṭangkai thiam lehzual se. Budget duannaahte hian civil service an tel ngai lo nge ni, Aizawl tlang aṭang hian engkim an hisâp emaw tih tur hian a awm leh ṭhin a; Aizawl leh Aizawl pawn danglam dan hretute ngaihtuahna hi a tel lo deuh ṭhin emaw ni aw a tih theih.

Dik taka sawi chuan, kan sawrkar hnathawkte’n Aizawla awm an inchuh luih luihna chhan pawh hi Aizawl leh Aizawl pawn a inthlau êm a ni. Thingtlang tihhmasawn nana pawimawh civil service thuam chak nachang kan hre tawk lo. Tripura state hmasawnzia kan sawi fo a, Damchhera BDO Office khu zu tlawh ila, kan rama DC Office tam tak hian a pha lo chiang a. Mipui nghêngtu civil service-te an thuam chak em em a, development pawh a inkhai rual zawk a ni.

Chuvangin, sawrkar pawh hian Central leh state dangte kalphung hi en chiang se, civil service-te pawimawhna hi kan hriat chian lehzual a, ram hmasawnna atana kan hman thiam a pawimawh a. A lailuma dawhkana ṭhu mai ni lo va, a kilkhawr ber ber thlenga hrûttute an ni a, hmasawnna kawng duannaah pawh tun aia hman ṭangkai a ṭha hle mai.

- T. Lalruatkima