THE BIBLE SAYS SO!

Tuten nge vanram kái ang? Piangtharten an kái ang! Lal Isuan vanramah chuan piangtharte chauh an lût ang A tih kha (Johana 3:3,5). Piangtharte chu tute hi nge ni le? Isua Lal leh Chhandamtua pawmtute hi! Thu leh awka mai ni lova nuna A Lalna kha lak luh tur a ni. Mi hausa pakhat chatuan nunna zawngtu pawh khan Lal Isua thuhnuaia a inpek theih loh avangin, chatuana nunna a miss ta a nih kha (Math 19:16-22). Mi hausa harsatna ber chu sum a ngah a, chû'ng sumte chu Ama duh dân dâna hman a duh a, mi rethei pawh a ngaihsak chuang lo. Hei hi sum ngahte tânna a ni. Pianthar an duh chuan an sum kha Lal Isua thuhnuaiah an pe phal tur a ni. Lal Isua lal theih lohna thil reng reng vanah ken luh theih a ni lo. A neih zawng zawng kalsan lotu chu Pathian lalramah an lut dawn lo (Luka 14:33).

Eden huan kha Pathian lalram leia ding kan hmuh hmasak ber a ni. Kha lalram kha Adamate khan an duhthlanna hmang sualin, Pathian Thu âwih aiin Setana Thu âwih kha an tana thil ṭha leh hlawkna nia an ngaih avangin Pathian lalna an hnâwl a, Setana Lalna chhûngah an lut ta! Chu mihringa A Lalna chu la lêt leh tûrin Pathian chuan A Fapa A rawn tir ta. Thî-ah tho leha Setana chu A hneh hnu khan mihringa A Lalna neih let leh tur chuan tharum leh thiltihtheihna hman A tum lo. Mihringten kan duh leh duh loh kha A dah pawimawh ta a ni.

Eden huanah khân Pathian khan A thu âwih turin emaw A tilui hauh lo. Thil an tih sual loh nan A dang bet hauh lo. A thupek kha A duh tawk a ni. A thu zâwm turin Setana pawhin a tilui bik hauh lo. Setana khan thuin Evi kha a hneh ta a nih kha. Tichuan Eden huan chu khar a ni a, Pathian lalna chu Setana Lalna khan a luahlan ta. Mihring nun leh he lei khawvela lal leh kha Pathian program lianpui a ni ta a. I nuna A Lal leh khan A nei leh ta che a, A Lalram mi i lo ni leh ta tihna a ni dawn a. Lal Isua hi Lal A ni a, Chhandamtu A ni bawk a tiin thil pahnih dah kawp angin i ngai tur a ni lo. Hming pakhat a ni. I Lal A nih khan A Lalram mi i ni ta a, chhandam i ni ta tihna a ni. Chhandamtu atan ka pawm a, Lalah erawh ka la pawm thei lo a ni tiin a sawi theih loh, i Lal A nih tak avanga chhandam ni mai zawk i ni.

I Lal A nih khan, chumi awmzia chu i Lal atana i pawma i nuna i lak luh khan A Lalram chhung mi (Citizen of the Kingdom) i ni ta a, chhandam i ni nghal a ni.

Mi tam tak hian chhandam nih an duh a, Lal Isua thihna leh thawhlehna thu, chhandamna hla an hrethiam a, an duh bawk a, kha an hriat thiamna leh an duhna avang khan piangtharah an inngai fo ṭhin. Chutiang mi chu piangthar (inti), daih rei lohte hi an ni châwk. Isua kutah an nun pumpui kha hlanin A Lalna hnuaiah an intulut chuang si lo. Kha tak kha an pianthar lohna leh Thlarauvin A luah lohna chhan chiah chu a ni. Isua Lal lohnaah Thlarauvin hmun A khuar ngai lo. Kan Lalpa pawh hian pianthar hi Pathian lalram (kingdom) a luhna, mahni thu awm tawh lova Pathian lalna chhunga chên tawh tûr zawk a ni.

Chu Thlarau lam lalram chu tûnah khawvela ṭhang mek zel hi a ni a. He hmuh theih loh lalram hi nakinah chuan khawvel pumpuiah hmuh theih lalram Apostol Johanan kum sâng lalram a tih khan a la rawn zui ang (Thup 20:4). Mahse Lal Isua hi hremhmun laka min chhandamtu atan chauha duh, A thuhnuaia inphah duh chuang hauh lote hi ‘Lalpa Lalpa min ti nazawng’ an nih dawn avangin (Math 7:21,23) hremhmunah an kal vek dawn tho a ni.

Lal Isua hi, a nihna takah chuan, chhandamtu tih tel kher pawh hi compulsory a ni lo. Paulan Phillipi tang vengtu hnenah pawh "Lalpa Isua ring la" a ti mai a ni (Tirh 16:31). Tin Chhandamtu tihah hian A Lalna a tel nghal zawk a ni. Chhandamtu kha Lal a ni "Vawiinah hian Chhandamtu a piang ta, Lal Krista chu" (Luka 2:11). Heta thil chiang tak kan hmuh chu Chhandamtu lo piang kha Lal Messia a ni tih a nih hi! Chhandamtu kha Lal a nih chuan i Lal atana i lak luh loh chuan Chhandamtu chu i nei chuang lo tihna a nih hi! I Lal atana i lo neih hian Isua pumpui – Lal leh Chhandamtu chu a ni ta chiah a ni.

Setana lalram chu a chim chhe ta Pathian lalram chu a lo ding leh ta tihna a ni. Pathian lalnaah hian Amah Lal atana nei lotute chu an lut dawn lo (cf. Johana 3:3,5).

- F Lal Thanzuala, Ph : 9436141242