RAMHUAI UM BO THEI

Kan pi leh pute hun lai khan Mizoramah ramhuai an tam em em ni tur a ni. Hmun ṭhenkhat sihah te, thing lu bûlah te, leiruangtuamah te bûng thing kawrawngahte chuan ramhuai chengin an ring a, an hlau hle a ni. Lo atan pawh an nei ngam ngai lo ni tur a ni. Ramhuai tihnat pawh mi tam tak sawi tur an nei a, damlo pum na tam tak chu ramhuai tihnat an ti bawk ṭhin ni tur a ni.

Hengte avang hian ramhuai hnenah an inthawi ṭhin tih pawh kan hre awm e. Saphoin Chanchin ṭha an rawn hril takah khan, "Pathian chuan ramhuai zawng zawng a ngam vek" an tih chu kan pi leh pute khan an ring ta a, Pathian chu ramhuai ai chuan an ṭih zawk ta a, Pathian thu an awih ta a ni.

Kan pi leh pute chuan rinawmna leh dikna kawng an zawh ta mup mup mai a, kan ramah dikna leh rinawmnain par a chhuang ta. Tun hmaa an thil hlau em emte chu hlau tawh loin thlamuang takin an khawsa thei ta a. Pathian tan rinawm taka an nun takah chuan ramhuaite chuan hmun an chang ta lo va, kan ram aṭangin an kal bo zo ta a ni. Rokunga pawhin, "Chanchin ṭhain kan ramah ramhuai a ûm bo ta," a tih hial a nih kha. Hei hian kan ramah dikna a lal ber a, mi tinte an rinawm hle a ni tih a entir. Duhâm tak leh in îtsîka awm loin, "Sem sem dam dam, ei bil thi thi" tiin an nungho ta dial dial mai a ni.

Heng lai huna Mizoram nawm turzia hi sawiin a siak lo. Muanna leh hlimna ni eng mawi tak hnuaiah tlang tin leh mual tin chu Pathian fakna hlain a fan vel a, doral hlau rêng rênga ramṭuan nilênna kha, hlima nui riin a thangkhâwk ta a ni. Zanah pawh zanvâk leh ramhuaite hlau tawh loin lungmuang takin an mu der der a, zu rui hmuh tur an awm tawh lo va, rukru hriat tur an awm tawh lo. Khawtlangah tualthah leh pawngsual thawm hriat tur a awm hek lo. Ṭhalai rual kal khawm pawhin, "Hei ang ram nuam zawk hi ram dang awm ve maw," an ti tuar tuar mai a ni. Khaw tinah hmeithai leh mi harsa an khai chhuakin an chhawmdawl zel bawk si. Mizote chuan remna leh muanna par zu kan tlan mup mup mai a ni ber.

He kan dinhmun nuam leh duhawm tak hi engtik lai aṭang khan nge a lo tlukchhiat a, engin nge min tichhe zo vek ni le? Tunah chuan kan ram chu duhamnain kan khat ta a, eirukna sual a ngampa ta hle mai. Ramhuai an lo pung leh ta a, hmun tin an rawn luah leh ta a nih hi. Heng ramhuaiho kan ram aṭanga Chanchin ṭhain a ûm bo takte kha ko kir a, hruai lehtute chu tute nge ni? Kan kohhran hruaitute nge, politician-te zawk le?

Tunah chuan kan rama office tinahte chuan hlemhletna leh duhamna te, mahni hmasialnate hmangin ramhuai bawlhhlawhte chuan ro an rel leh ta. Kan bazarah leh dawrahte hlêpna uchuak tak hmangin ramhuaite chuan min thunun zo ta si. Kan ramah dikna leh felna an nêk per zel a; zu leh ruihhlo hmathehin kan ṭhalaite chu ramhuai dawi âtin an awm zo ta. Tu nge heng kan rama ramhuai bawlhhlawhte hi ûm bo leh ta ang le?

- Hausanga Hauzel