Consultancy firm ṭuan rangte kha

Vanglaini hian in rawn chuk fuh leh kurh ṭhin a, Editorial lama MNF sorkar Chief Minister thil tih dan sawisel si lova siam ṭhat leh ven duhna hawi zawnga (positive criticism) in rawn ziak kha tui hnih ve ṭula hriatna ka nei. 

Vanglaini lama in ziah danin, “PWD changtu chief minister Zoramthanga chuan December 27 leh 28, 2018 khan Aizawl traffic jam tihzia awm dan tur leh Khamrang dungah NH-54 kawng­pui siamṭhat dan tur a enfiah. 

Aizawl khawpui traffic jam tiziaawm tura hmalak dan tur chungchangah CM Zoramthanga chuan Vaivakawn leh Bawng­kawn kawngpui péng­ṭhuam a enfiah a; Aizawl khawpui traffic tâwt lutuk chu khawpuia chengte tan leh Aizawla kalte tan harsatna lian a tling tih sawiin, "Kawng chunga lirthei tlân theihna tur fly-over siam tum a ni. 

Vaivakawn leh Bawngkawn hi motor tan khawmna hmun lian a nih avangin en hmasak a ni a, a tahtawla hmalak zel a ni ang," a ti. 

Chief Minister hi IPR minister Lalruatkima, Aizawl Municipal Corporation mayor PC Lalhmingthanga leh NPEC Consultancy Ltd., Delhi hotute'n an ṭawiawm a ni,” tih a ni. Keiin ka ngaimawh lai ber leh mak ka tih chu ‘NPEC Consultancy Ltd., Delhi hotute'n an ṭawiawm,” tih hi a ni. 

Sorkar tharin hna thar an thawk dawn a, mipui kan phur em em tawh laiin Delhi aṭanga consultancy firm an rawn lut nghal hi chu an che rang lutuk a. A kotu pawh a che rang a, a ruka inthlun zawmna an nei sa a nih loh chuan thil thleng thei lo tluka ngaih a ni. 

December 15-ah MNF sorkar a piang a, December 16 hi Pathianni a ni a, De­cember 18-20 chhung Assembly Session an nei zui a, December 21 hi Zirtawpni a ni a, hei hi sorkar pisa kai ni awm chhun a ni. 

December 24 hi Thawhṭanni a ni leh tawh si a, Krismas kan han hmang a, NPEC-te hi ruaiṭheh ni (December 26) hian an lo chho turah ngai ta ila. December 27 leh 28-ah kan Chief Minister zahawm tak hovin kawngpui leh fly pover an han kawk kual ta a ni. Office pawh an kal hman lo, PWD staff lam pawh an dawr hman lovang, consultancy firm lam an lo lang nawlh mai a, hei hi chu sawifiah deuh chu a ngai ang. 

Eptu party te tehreng pawh hian hengte hi an ngaimawh ngam lo a nih loh chuan a nachang an hre lo tal a nih ka ring ta rum rum. Congress hi chuan an practice ṭhin a nih avangin an sawi ngam lo a nih hmel. ZPM hian a nachang an hre miah lo a nih a rinawm a, BJP hi eptu nge an nih a ruka ruling tih kan hre ta si lo. 

Khati taka rawn che rang NPEC-te kha tu koh nge? He hna hi thawh theih ni se thawk tur an ni nghal em ni? tihte pawh zawh a ngai a, tu te emaw project siam, tu te emaw chiahin an thawh theih, tih Congress sorkar hnuaia an kal dan tho kha MNF hian an kal pui chuan a a kalphungah change awm si lovin a kalpuitu chiah kan change tihna a lo ni dawn si a.