LUNGLEI UNIVERSITY: HMASAWNNA NGE PARTY INBEIHNA?
Mizoram politics kalphungah hian thil pawi tak, hmasawnna daltu lian tak a awm a; chu chu mahni party sorkar a nih loh vanga ram hmasawnna kawng dâltu nih tlat hi a ni. Tun hnai khan MNF General Secretary Prof. F. Lalnunmawia’n Lungleia State University din tur chungchangah ‘A hautak’ a ti tlat mai hi a lungchhiatthlak a, hmasawnna dâltu mizia dik tak a ni. Mizoram hmasawnna tura sorkar hmalakna apiang, mahni party sorkar a nih loh vanga dodal tlat hi ram leh hnam hmangaihtu zia a ni thei dawn em ni?
Khawvel chanchin kan thlir chuan, hmasawnna tak tak hi hautak lo a awm ngai lo. Zirna leh infrastructure hmasawnna hian sum leh pai, tha leh zung a heh ṭhin reng a. Mahse, ‘A hautak dawn’ tih chhuanlama chhim lam mipui tana kawngpui pawimawh dan tlat hi engtia sawifiah chi nge ni ang?
Prof. Lalnunmawia hian Aizawl leh Hmar lam aṭanga Lunglei kal chu hautak dawn hlein a sawi a. Hmasawnna ruhrel hi Aizawl leh a chhehvel tan chauh em ni an phal? Lungleiin hmasawnna a chan dawna ‘A hautak’ n ti tlat hi chhim lam mipui hmuhsitna a ni.
COVID-19 hripui lên lai khan Lungleiin RT-PCR khawl an mamawh em em a nih kha. MNF sorkar khan chhuanlam hrang hrang siamin a lo dang tawh. Tunah university hmunhma atan Lunglei thlan a ni ve leh a, chumi dâltu hmasa berah MNF hruaitu lian a rawn ṭang leh hi pawi tak a ni. Opposition nih vanga sorkar hmalakna apiang dodal hrim hrim hi tunlai politics kalphung tur a ni tawh lo; a 5G hlawl lo!
Lunglei hi Mizoram second capital a ni a, mahse, hmasawnna tak tak a thlen dawn meuh chuan, ‘An dâwl zo ang em?’ tiin kan hmu hniam leh si em? MNF hmanraw lian ber ‘A hautak’ tih leh ‘A hlá’ tih hi hmasawnna dâltu hmanraw tling a ni lo.
Party politics avanga ram hmasawnna ruhrel lo 'kalh' tlat hi chhim lam mipui hian an enliam mai lo tawp ang. MNF hruaitute hian an party hmasawnna nge an duh a, Mizoram mipuite hmasawnna? Party politics vanga hmasawnna dâltu nih hi politics thianghlim a ni thei lo.
Mizoram ang tlang ram leh inbiakpawhna thlenga harsatna la awmna hmunah hian decentralization (thuneihna leh hmasawnna sem rual) hi hmasawnna tak tak thlentu tur chahbi pawimawh ber a ni. Mizoram University (MZU) hi kan innghahna a ni a, mahse, MZU chauh hian kan mamawh a phuhru zo tawh lo. Lunglei hi khawpui pahnihna a nihna angin, zirna hmasawnna (academic hub) atana duan a hun tawh tak zet a ni.
Lunglei-a State University kan neih hian, zirlai tam zawk tan hun leh sum a hek lo ang, zirlai tam takin hun leh sum hek lo zawngin, chhim lam hmun hrang hrang aṭangin zirna an chhunzawm thei ang. Zirna ṭha a insem rual ang a, state puma zirna a san phah dawn a ni. Inelna thianghlim a awm ang a, zirna leh research lamah hmasawnna chak zawk a thlen thei ang.
Lungleia zirna in sang leh infrastructure din hi political promise satliah ni lovin, Mizoram kilkhawr ber thlenga hmasawnna insem rual (inclusive growth) kan neih theihna tura pawimawh a ni. Chhim lam mipuite hian kan hmasawnna tur dâltu leh min ngai tlawmru tlattute hi i thliar hrang thiam ang u!
- Thangtea Thawmte