Ngaihthlâk

Chanchin Ṭha Luka 10:41-42 kan en chuan, thil tam tak a ngaihtuah avanga Marthi buai thu leh Isua’n a zilhhauna kan hmu a. Thil pakhat chauh pawimawh hrilhin, amah a nih thu a tarlang a. A kianga awm a, a thu ngaihthlak leh rawngbawlsakte pawh a ni bawk ang.

Mari chu Isua ke bulah a ṭhu a, a thusawi a ngaithla a; Isua a hnaih bik hle. Hetihlai hian Marthi erawh chu hah taka rawngbawlin a buai hle thung. Chuvangin, a thinlungah thîkna a lo piang a, Isua hnenah a zualko ve ta a ni. Mahse, Isua chuan, “Marthi, Marthi, thil tam tak i ngaihtuah a, i buai a nih hi: thil pakhat chauh a pawimawh e; Mari’n chan ṭha chu a thlang a, chu chu laksak tur a ni lo ve,” a ti ta zawk a nih kha! Isua hian a kianga awm a, a thu ngaithla a, uluk taka dawngsawngtute chu a lawm deuh zawk pawh a ni ang. Hretu, hriatpuitu a mamawh pawh a ni ve thei a. Ngaihthla a, hretu dik nih hi rawngbawlna pawimawh tak a ni tih min hriattir a duh pawh a ni thei bawk ang.

Isua chuan ngaihthlak hi rawngbawlna tlingah a lo pawm rêng bawk a. Luka 10:25–11:13 inkar thute hi Isua’n zirtir nihna chungchang a sawina a ni a. Chutianga rawngbawl a zirtir laia chan ṭha tih meuha a sawi chu ngaihthlak hi a ni. Rawngbawlna hlu tak leh ṭangkai, hlâwkthlak leh malsawm dawnna pawimawh tak a lo ni reng mai! Pathian aw hi a kianga mite lo chuan an hre phak/thei ngai lo.

Rawngbawla kan hmanhlelh em em lai leh ṭhahnemngai taka kan theihna zawng zawng nena buai taka hun kan hman mek lai hian, a rawng kan bawl, Pathian hi kan ngaihchan leh ṭhin a ngai a; min duhna leh min hruai a tum dante kan hriat thar fo theih nan a aw hre tura kan insiam rem ve leh ṭhin a ngai bawk. Chuti ang chuan, pâwlna thar changin, thlarau thara rawngbawlna kan ṭan ṭha leh thei ṭhin dawn a ni.

‘Sawi aia ngaihthlak’ a tam chinah mihringte hian puitlin lam kan pan a ni, an ti ṭhin a. Zirtir nihna, Isua hnung kan zuina kawngah pawh hian mi puitling, rawngbawlna puitling zawk nei thei turin ngaithlatu kan nih ve ṭhin a ngai. Pathian aw hriat hi rawngbawlna hlâwkthlak tak a ni reng bawk ang.

Isuan, “Ka rawngbawltu chu ka awmnaah a awm ang,” a tih ang khan kohhran, Pathian ringtu leh rawngbawltute chu Isua kiangah kan awm ṭhin a. Hemi avanga kan vanneihna chu Isua aw hre phak rengtute kan lo ni thei ta hi a ni. Chuvangin, kohhrana awm leh rinawm tlat hi Pathian ram thlenna – keimahni lama Pathian duhzawng tihhlawhtlinna a ni bawk.

Isuan entawn tur min hnutchhiah a. Kan rawngbawlna hrang hrangah hian hretu kan nih a, an mamawh ang taka kan kianga mite tana Pathian hmanraw ṭangkai kan nih ve theihna turin mi dang kan ngaihthlak thiam deuh deuh pawh a ṭha hle ang. Hei hi khawngaihna changtute chanvo a nih angin, Pathianin min khawngaih ṭheuh rawh se.

- H. Lalroluahpuia