Thingtlang mipui lam hawi sawrkar

April 30 khan Pu B. Lalchhanzova Minister chuan Teikhang khuaah Supply kudam hawn pahin thu a sawi a. Chutah chuan a thiltithei zawk minister-te’n thingtlang mipui harsatna leh mamawhte an tapchhak zawlah ngei hmuhpuiin, thingtlang mite hmasawn lehzual nan kan feh chhuak tam tur a ni, a ti a. A sawi dik viau mai.

AMC kan inthlang zo a, mipuiin ZPM party chungah rinna nghatin sawrkarna nghet tak an pe a. Khawpui sawrkar enkawl tur corporation kan nei ta. Khawpui MLA seat awm zawng zawng ZPM-in a nei a, kan khawpuiah minister-te’n pisa hûngin khawpui an ṭhut chilh bawk. Tun aṭang chuan nasa lehzualin thingtlang mipui lam hawi sawrkar nih tum a ṭha hle mai.

Pu Chhanzova hi ZPM Media department Chairman a ni nghal bawk a. ZPM Media department lam pawhin thingtlang feh chhuahna lam prog. tam zawk kan siam chho ang, an ti nghe nghe.

Chutianga sawrkar a kal chuan thawklehkhatah hmasawnna sang takin kal nghal pur pur lo mah se, thingtlang mite hi ram hruaitute’n an khawtualah kan kal chilh tam chuan rilru lamah thlamuanna an nei ang a, lawman, hlimna, rilru hrisel kan intuhsak thei ang. Hetiang kan sawi vang hian kan sawrkar hian thingtlang lam hi a lo ngaithah lutuk ṭhin tihna lam a ni lo.

2026 data en chuan, India ramah Tamil Nadu hian point 96.66 hmuin thingtlang lam hmasawnna (rural development)-ah an ti ṭha ber. Mizoram hi pahnihna niin, point 93.96 kan hmu a; min hnaih takin Uttar Pradesh pathumna niin point 92.97 an hmu.

Tamil Nadu hian faina lamah 'Nirmal Bharat Abhiyan' hnuaia fak an hlawh hle. Chak takin Panchayati Raj System an kal pui bawk. Kerala khuan thingtlang loneitute tan insurance, pension bakah an fate zirna leh an fate nupui pasal neihna ṭanpuina thlengin an kalpui. Odisha state-in KALIA scheme an tih mai, kut hnathawktute tana an kalpui hi an larpui viau.

Keini sawrkar pawh hnathawk ṭha sa kan ni bawk a. Thingtlang mite hi kan ram hruaitute’n an ngai pawimawh a, khawpuiah chauh lo hmasawnna hi a kai rual chuan state nuam, kawng engkima state hmasawn kan ni thei dawn a ni.

PM Narendra Modi hian hmân deuh khan SAGY scheme hawnnaah thingtlang lam hmasawnna atan a ngaihdan hetiang deuh hian a lo sawi tawh; “Kan development model hi supply-driven aṭangin demand-driven zawngin kan kal a ngai, thingtlang mite harsatna leh mamawhte hi an kawtkaiah ngei ṭhukhawmin kan sawipui ṭhin tur a ni,” a ti.

Tun hmaa Jammu& Kashmir state ṭhin chhunga Kupwara district-a thingtlang khaw pakhat Laderwan-ah chuan loneitu mi 379-te mobile phone number la khawmin, scientific agriculture lama hmasawn nan, khawchin, ruahsur dan turte hrilhin, sik leh sa milin KVK lama mithiamte’n eng thlai nge ching se an hlawkpui ang tih kha thurawn an pe ṭhin a. An MP kaltlangin he an project hi an hlawhtlinpui hle a ni awm e.

Chutiang chuan kan minister/MLA leh MP te hian thingtlang mipui hmasawnna tur zawnga hei aia nasa lehzuala ke an pên phawt chuan hmasawnna kai rual, thingtlang mipui pawhin khawpuia khawsate nun an awh bik lohna state, ram khawpui ber aṭanga thingtlang kilkhawr bera mite pawh ei leh bar leh khawsak phunga dinhmun inthlau lutuk lo kan ni thei ang. Chutiang lam vei pha ram hruaitu kan nei chho zel dawn nia lang hi a lawmawm hle a ni.

- Hruaia Kawlni