HRINGNUN ZIN KAWNG

Khawvela mihring lo piang chhuakte hi vun rawng inang lo tak takte kan ni hlawm a, Kan fuke chungchangah pawh hian, a ṭhen beng ngawng te, a ṭhen mit del te, ban bul te, ke bul te, ṭawng thei lo leh pianphunga rual ban lohna chi hrang hrang neite pawh kan awm nuk mai a ni. Kan vun rawng a in ang lo emaw pianphungah rual kan ban zo lo pawh ni se, atu-a-mah hi kan bang thei lo hrim hrim a, Mihringa kan lo pian chhuah tawh hi chuan, kan duh emaw duh lo emaw, hringnun zin kawng hi kan zawh ngei ngei a ngai a. Mi tam takte chuan he hringnun zin kawng kan zawhah hian, Thlen tumna hmun an nei a, thlen tumna hmun nei fumfe lem lova kal ve mai mai pawh mi tam tak an awm bawk a ni.

Tin, mi ṭhenkhat chu buaina leh harsatna nei vak lo a, hringnun zin kawng zawh thei an awm laiin, mi ṭhenkhat ve thung erawh chu buaina leh harsatna namen loin a chim vel, mahni pawha kal hleithei lo, mi dangte buaipui ngai reng renga nung, rualban lo kan tih ang chite zingah hian, thil tum nei rana hringnun hmang pawh an awm bawk a. Mitdel ṭhenkhatte leh beng-ngawng te, ke bul te, kut bulte leh ṭawng thei lo pawh ni se, an mahni thil tum thlen tuma bei hram hram a, hlawhtling ta hi sawi tur an awm ṭeuh a ni. He tih lai hian fuke kim biaia piang ni si, mi pangngai tak, mahni tum ram thleng zo lo pawh mi tam tak an awm bawk a ni. Kan tum ram thleng tur chuan chhel tak leh taima taka kan tih hram hram a ngai a ni ber awm e.

Hman lai aṭangin, tun lai thlengin he hringnun zin kawng zawh hi kan awm reng a. Kan hmaah mi tam tak an lo kal tawh a, kan hnungah pawh mi tam tak an la rawn kal leh dawn a ni, Chuvangin, Nang, unau duh tak, Tunah khan i hringnun zin kawng zawhah khan, khawi lai hmun nge i thlen ve tawh le? He hringnun zin kawng hi, kawng awlsam a ni lo a, kawng bumboh tak mai a ni a, ṭahna tuifawnin a chim hlup hlup reng kawng a ni a, Beidawnna khamahte lawn a ngai a, mualphona suar te, khawharna kawnte pawh pal tlang a ngai a ni. Mi huaisen leh tumruhte chuan, heng zawng zawngte hi tluk leh din fawm pawhin an zawh hram hram a, a tawpah hlawhtingna an chang ṭhin a ni. Heng hlawhtlinna chang zingah hian kan sawi tak pianphunga rual ban lote pawh mi tam tak an awm a, An rual ban lohnate dah ṭhain an tumruhna avanga hlawhtlinna hi chang ta an ni. Keini mihringte hi min Siamtuin thil tum nei ngei ngei turin min duh a, he kan hringnun zin kawng kan zawh chhung pawh hian ama siamtu zaingai chung zela kal turin min duh bawk a ni. Chu chu kan hlawhtlinna tur chu a ni e. Nimahsela, mi tam tak chuan Siamtu zaingai loin mahni thu thuin, an kal bawrh bawrh a, Hei hi thil pawi em em chu a ni.

Chuvangin, he hringnun zin kawng kan zawh mekah hian, Mi ṭhenkhat chuan an thil duh tihlawhtling turin pumpelhahte an kal a, kuttling lo hlawhtlinna an chang mai ṭhin a ni, Amaherawhchu, chung hlawhtlinnaah chuan lawmna tluantling siamtu hian a dah lo va, lungawi theih lohna chhumin a bawh khat tir zawk avangin hlimna reng reng an nei chuang lo a ni. Chuvangin, nang unau duh tak, He hringnun zin kawng i zawh hi a awlsam loin. harsatna leh buaina tam tak tawh a ngai tih hre reng la, buaina leh harsatna i tawh avangin beidawng mai suh ang che. Eng tikah mah i zawh leh dawn tawh si lo a. Khawvelah hian vawikhat bak kan piang dawn si lo a ni. Chuvangin, Nang chu, hringnun zin kawng i zawh chhung hian chau leh hah takin awm ṭhin mah la, Siamtu zaingaiin kal hram hram zel ang che aw. Beidawnna hi i hmelma lian ber a ni a, in hneh tir mai lo ang che, Beiseina eng chu en tlat la, I hringnun zin kawng zawh lai hi i hlawhtling ngei ang.

- Hausanga Hauzel