Airport road peih ṭep a ni (AIZAWL WEST CORRIDOR BY PASS ROAD)
Kan sawrkar chuan Aizawl West Corridor-ah kawng a lai mup mup mai a. Lengpui Airport kawng hnai zawk (alternative route) pawh Sihhmui Bazar aṭangin kawng chho leh ulh awm miah lovin laih tlang a lo ni ta. He kawngpui hnai zawk tur hi Sakawrtuichhun khaw tlak lamah a kal a ni. Boulder pawh thui fe Sihhmui Bazar aṭangin PTC thleng an rawn phah chho tawh a. He kawngpui thar hian Sihhmui bazar rail station piah lawkah Lengpui Airport kawngpui kha a man a ni. Truck lian trailer hian earth mover Hitachi lian pui pui hi Tuivamit hi a rawn hnuk thleng thei ta. He kawng hi peih a nih hma aṭang hian a ṭangkai em em ta mai a. Vaivakawn to Sairang lam aiin Lengpui Airport hi km 7 velin a hnai leh nghal.
Aizawl West Corridor: Falkawn Zoram Medical College pawh chho tur Aizawl West By Pass Road kawngpui laih mek hi a tlang hunah phei chuan Medical College leh Hospital hian hlawkna duhawm tak a nei dawn a. Lengpui Airport-ah hian visiting professor leh doctor specialist te lo ṭumin, ZMC-ah lecture an han pe ang a. Delhi aṭangte, foreign doctor sprcialist-te kan ko kal thei ang. Kan Cancer Hospital, Zemabawk lamah pawh emergency surgical ti turin mithiam koh a lo awlsam dawn. Chutiang bawkin kan Mizoram University-ah pawh world class education an ti ve ang. Chutih hunah chuan Mizoram pawh surgical lamah a lo sang dawn a. Phai lam sum tak tak senga pan ngai hi mimir tinten mi thiam zawk an râwn theihna tur kawng a ni. Chuvangin, ZPM sawrkar hian kawngpui hi 2028 election thlir ranin ngawrh takin an bei leh mai dawn lawm ni.
Kawng siam vanga mipui tawrhna: Kawngpui laih hi a lawm awm em em a, development a kal chuan mipui pawn a hrehawm lai chu an lo tuar ve ngei tur chu a ni, tih chu ngaihdan pakhat a ni ve reng. Mahse, kawngpui laih hi Tuivamit Local Council ram chhung, Sakawrtuichhun road laih zauh hna hi ramhnuai kawng laih ang tawpin an lai a. Metal road awm chhunte pawh leivungin a chhilh vek a, kawng kam mipui tan kawtkai aṭangin a diak nghal a, khua a ṭhatin a khu luih luih a. A laih dan phung hian veng mipui a ngai pawimawh lo. AMC inthlan dawn chuan kawng khu kha tuiin an rawn leih huh a, a khu a reh a. Tunah erawh mipui tuar dan a nasa leh ta hle.
PHE Department lam side office-ah VC-te’n an han hrilh a, “Kan siam tur a ni lo, a tichhetute siam tur a ni,” an lo ti a. Chutianga thu innawr tawn karah tui chhuah hun a lo thleng leh mai ṭhin a, mipui chu an buai ngai bawkin an buai leh ṭhin. Naupang lehzualte an khawngaihthlak a, Samagra Shiksha Abhiyan te, Beti Bachao Beti Padhao te nen a inhmeh lo khawp mai.
Hetiang reng reng chuan khua leh tui mipui tan a hrehawm lutuk. India Constitution Articles 36-51-in a sawi ‘Welfare state’ kha an tan a hla lutuk deuh a ni. Kan sawrkar chak tak hian JCB pakhat hmangin han siam rual deuh se, mipui chu an lawm ngawt ang. Furpui kan ṭan dawn chauh a ni si.
- C. Vanlal Ruaia,
Ph : 9862569310