Siallam Dâr an tum AIR-ah

June 8, 2026 khan All India Radio Aizawl chuan AIR kum 90 tlin lawmna Vanapa Hall-ah an nei a nih kha. Pu P.C. Lawmkunga’n dt. 13.06.2026-a Vanglainia a article ngaihnawm tak ‘All India Radio kum 90 tlin lawmna ka chhim ve’ tih han chhiar khan All India Radio leh Mizote inlaichinna chu kan hre theiin kan zêldin thei awm e. Lo la chhiar fuh lo palh kan awm pawhin chhiar ngei ngei chi a ni.

Siallam Dâr hi Mizo dâr zinga pawimawh berte zinga mi a ni ngei ang a. Tunah hian Aizawl khaw dintu lal ropui Lalsavunga Sailo thlah kal zelte zinga mi ka pu Lalrengpuia Sailo, Chanmari West-in a rochun a, a kawl mek a ni.

Keini ang duang tan chuan Siallam Dâr hlutna leh pawimawhna han sawi thiam a har a. Kan hriatnate a tlem em avangin a chanchin chu Mizo historian-te ziah ho kha ring mai ila, sawi zau tum ve vak lo mai ila a hahdamthlak mai awm e.

Aw le, Siallam Dâr hi kum 2021, December ni 29 khan Upa Rinngaia Colney, Hlimen hmalaknain kan pu Lalsavunga Sailo hriatrengna atana siam Lalsavunga Park, Hlimenah ka pu Lalrengpuia Sailo hoin kan tum a, a nuam dangdai ve khawp mai.

Tin, kum 2022 August ni 10 khan Ngopa History bu tlangzarh inkhawmah vanneihthlak takin Siallam Dâr tum turin min sâwm ve leh hlauh mai a. Lawm takin Synod Conference Hall-ah, programme laili-ah ka pu Lalrengpuia Sailo, Chanmari West hoin kan han tum ve leh bang bang mai a. A nuam kan tiin, lungte pawh a leng ve ringawt zu nia!

Ka pu Lalrengpuia Sailo, Chanmari West-in a sawi dan chuan, kum 60 vel kal taah khan Siallam Dâr ngei mai chu Gauhati-a thil hlui entirsiakna tur atan ka Pu Lalrengpuia Sailo nu hnen aṭangin an dil chhuak a, Gauhati-ah an zu keng ta a ni. Chumi hnu aṭang chuan, “Hei hi All India Radio, Shillong-Gauhati a ni,” an rawn tih hmaa dâr tum ri lo lang ta ṭhin hi Siallam Dâr ri ngei chu a ni. Hemi ri kan hriat rual hian a neitupa leh Aizawl sâttu lal ropui Lalsavunga Sailo hi hre thar zel thei bawk ila a duhawm hle mai.

- Hrangchhuana Sailo

MB: 9436352280 / 8837095663

Email: hsailo_pg@yahoo.com