RUALBANLOTE TANA TIHMAKMAWH – SIKUL DIN

‘Rualban lohna hi damdawia tihdam theih a ni lo. Dik taka enkawl leh kaihhruai an nih chuan nasa takin hma an sawn thei’ tih hriain Pu Lalmama leh Pi Chhingpuii te nupa, Chhinga Veng, Upa R. Zodingliana leh Pi Neihtluangi te nupa, Dawrpui, Pu David Zama leh Pi Margaret Chalthantluangi te nupa Chawlhhmun, Pu Sangsiama leh Pi Lalhmachhuani te nupa Zarkawt, Pu R. Lalzuala leh Pi Lalsawmliani te nupa Chhinga Veng te chuan Gilead Special School hi April 10, 1990-ah an din a ni. Heng mite lungngaihna, manganna leh tuarna chu mi tam tak tan malsawmna a lo ni ta.

Gilead Special School-a kal zirlai nu leh pa mi 159 kal khawm chuan kan fate dikna leh chanvo Persons With Disabilities Act, 1995-in a pek leh hamṭhatna dangte an hmuh theih nana bei turin January 18, 2010 khan Parents’ Society for Special Children of Mizoram (PASCOM) kan din a, member 300 vel kan awm mek.

Gilead Special School hi rualbanlo sikul awm chhun a ni ṭhin a, a ṭangkaizia leh pawimawhzia chu a kal nu leh pate’n kan hria a ni. Mahni motor-a kal thei, khawsa thei deuh an awm rualin, a tam zawk chu mi rethei tak tak kan ni a. Nu leh pa ṭhenkhat chu mi in luaha eichawp zawngte leh Aizawla rawn pêma fate sikul kaltir ṭâwk ṭâwk an ni hlawm! Thla tin fee, therapy (a hrana chawi) bakah, kal lam leh haw lam motor chuan man nen chawi a tamin phurrit a tling! Fate sikul kaltir thei lo eng emaw zat an awm kum tin ta mai a ni!

PASCOM hian a din tirh aṭangin rualbanlo sikul, senso awm lo, sawrkar emaw, kohhran emaw hian din se tih hi a thupui, a ngaih pawimawh em em a ni a. Congress sawrkar, MNF sawrkar leh ZPM sawrkarah ngenna a lo thlen tawh ṭhin a; mahse, a hlawhtlinna hmuh tur a la awm lo!

Aizawla rualbanlo sikul leh zirlai an neih zat (2025) hetiang hi a ni:

Gilead Special School, Bawngkawn West (Bawngkawn Brigade) - 135

Ephatha Special School for the Deaf and Hard of Hearing, Kulikawn West - 28

Redeem Garden, Durtlang Leitan - 36

Shining Star, Republic Veng - 25

Special Blind School, Durtlang - 34

Heng bakah hian Child Development Centre, Ramhlun South, Mitdel Sikul, Kolasib (Salvation Army), Pu Lal Thanhawla (Ex-Chief Minister) bul tum leh hming chawiin Serchhipah rualbanlo sikul a awm a. TNT-ah eng emaw zat an enkawl reng bawk. Synod-in din rawh se

Kum 1996 Synod-in Rualbanlote Ni hman tura a rel chu Synod Executive Committee-in a bawh zui a, June Pathianni vawi thumnaa hman ṭhin turin a rel zui a (SEC 157:10).

Rualbanlote Ni hmangtu Mizoram Presbyterian Kohhranah beiseina sang tak neia kan thlir reng laiin, Aizawl Hmar Presbytery Inkhawmpuiah “Synod-in rualbanlote sikul din rawh se” tih chu a tlang zo ta lo! Hemi ṭum hian palai ka ni ve a, rilru a kal thui duh khawp mai! Kan pastor senior pakhatin, “Synod policy a ni lo,” a ti a. Policy chu tu siam nge?

Mizoram Christian College hi tun hnai maia rawt a ni a. A rawttute vang nge, Synod Inkhawmpuiin a pass a, chak taka bawhzui nghal a ni a; tunah heti hi a ni tawh. Mizoramah college engzat nge awm tawh? College nge kan mamawh rualbanlo sikul? Synod Inkhawmpui 2018-a General 33-na, ṭawng thei lo leh bengngawngte tana zirna school buatsaih rawtna Aizawl East Presbytery aṭanga lut chu, “.... Kohhranhote’n theih angin anmahni ṭanpui nan hma kan la mek bawk a, kan sawihona hi a tawk e kan ti,” tih a ni leh bawk! Tlumtea thlira kan thlir chu a thâmral leh ta! Presbyterian Kohhranah hian eng nge ka awm ve reng a ṭulna ka ti hial a ni!

Kohhran malin a mite a ṭanpui leh ngaihsakna hi a dawngtu tan a lawmawm hle. Rualbanlote Ni kan hman a, an puala thawhlawm lak khawm kan pek te, thu ṭha tak tak ngaihthlak leh ṭawngṭaipui bak anmahni ṭanpui nan hma kan lak mek chu eng nge? Rualbanlote tan hian Synod hian eng nge a tih tawh? Kohhran hmalakna tur

Mizoramah hian kohhran hi kawng engkima sûlsutu a ni ti ila kan tisual tam awm lo ve. Kohhranin zirna a ngaih pawimawh dan chu sawi ngai lovin a hretu kan ni. Mizoram Presbyterian Kohhran hian PC Girls School, Synod Higher Secondary School, Mizoram Christian College, Missionary Training Centre, Aizawl Theological College, Presbyterian Bible School, Hindi Bible School a nei a. Rawngbawlna atana ṭangkai tak vek a ni. Tin, khaw tin leh Aizawl veng hrang hrang tih theih deuhthawah Presbyterian English School a awm bawk. Heng bakah hian damdawi in te, HIV AIDS vei enkawlna te, nau hnuchham/fahrah enkawlna leh ngawlvei enkawlnate bakah, music zirna, zai zirna leh thiam thil chi hrang hrang zirna a din a. Jordan Centre, Seṭhawn a enkawl dawn bawk.

Kohhran hian tih loh ahleih a nei lo tih tur a ni. Heng zawng zawng hi rilru leh taksa, pianphunga mi pangngai, chhia leh ṭha hriatna neite tana din a ni. Presbyterian Special School cum Vocational Training Centre ṭha tak din a hun ta viau. Baptist Kohhranin an din bawk ang a, kohhran dang tan pawh a harsa lo vang? A tirah senso tam deuh mah se, Rualbanlote Nia kan thawhlawm tling khawm (tur) ringawt pawh hian a enkawl zui theih mai ang. Sawrkarin din rawh se

Social Welfare Department-in rualbanlote mamawh chi hrang hrang a pek bakah seminar a buatsaih ṭhin a, a lawmawm hle. SCERT, Chaltlangah B.Ed. SEDE zirna a awm a. SSA/Samagra hnuaiah rualbanlo zirtirtu, thiamna bik neite’n Children With Special Needs (CWSN) an enkawl a. MZU-ah nen, mithiam an tam tawh. Aizawlah bul ṭanin (Lammualah hian din theih ni se), district khawpui tinah harsa vak lovin a din theih ang? Tun sawrkarah pawh kan thlen tawh a. Chief Minister, Social Welfare leh Education Minister te an inhawng em em. Kohhran nena thawh dun dan awm thei se an ti. Tunlai khawvel hian rualbanlote hi a ngaihsak em em a. Presbyterian Kohhran chuan ‘Rualbanlote Ni’ hial a nei a nih hi! He ni kan hman avanga rualbanlo kan ngaihdan leh hmuh dan, kan biak dan leh chhawnchhaih dan lo danglam tate hi a va lawmawm em! Rualban lohna hi duh vanga lo awm a ni lo va, nu leh pate pawhin an duh vanga nei an ni hek lo. Pathian hnathawh a lanna tur a ni zawk! Pathian hna thawhpuitu, mi dangte tana malsawmna nih ṭheuh i tum ang u.

- Lalthanmawia,

Bawngkawn South, Aizawl

Contact – 9436141879