NEW MARKET BUILDING SAK THAR HI
Mizoram sawrkar department pakhat, Trade & Commerce-in New Market, Aizawla building an sak thar chungchang tlem azawng ka han tarlang ve teh ang.
Trade & Commerce Department chuan Aizawla New Market chhungah building hlui zawk chu ṭhiatin, a aia ṭha zawk leh lian zawk chu hun eng emaw chen aṭang khan sak ṭan hna thawk tawhin, tunah chuan an peih ta a tih theih.
MNF leh Congress hun laite kha chuan tender chhuah chang awm ve bawk ṭhin mah se, induhsakna a uchuak em em ṭhin a. New Market building ngei pawh hi dawr kua (compartment/stall) luahtu tur tak takte kha chu a thlabi luah man tlemte chawi tura thlan kha an lo ni daih tawh ṭhin a, a luah hun chhung (term) pawh awm lovin an duh chen chen an luah ta ṭhin a ni. Hei hi a pawina em em chu–dawr inkhâr chhâwnsak tih te, man man zawka inluah chhawntir te a awm bakah, tender chhuah lo renga a awm hian sawrkarah revenue-a luh tam loh phah a, mi dang tan luah vena hun ṭha a inhawng ngai lo a ni.
Millennium Centre, Aizawl hi kan hre vek ang a. He building hi PWD enkawlna hnuaiah society pakhat MC Authority chuan maintenance leh a ṭul dang tam tak a buaipui a. An inrelbawl dan (administration) leh an kalphung (system) a felfai em em a ni. Dawr kua eng emaw zah MC Authority hnuaia awm hi a la awm ve a, hengte hi term neiin kum thum emaw, kum nga emaw, luah theih turin tender an chhuah ṭhin. Entir nan, mi pakhatin dawr thla khatah luah man atan Rs 2,000-in kum 3 atan chhangin a chhang sang ber a. Tah chuan a dawr luahna kum 3 chhung luah man hmun ruka ṭhen hmun khat kha security deposit-ah dahtir a ni a (36 months x Rs. 2000 = Rs. 72,000 divided by 6 = Rs. 12,000). He security deposit Rs 12,000 hi a term tawpah lak chhuah leh vek tur a ni. Mahse, dawr luahtu khan rokhawlhna avangin thla khat lek pawh dawr luah man kha pe thei lo ta se, security deposit Rs 12,000 aṭang khan dawr luah man Rs 2,000 emaw, security deposit zawng zawng emaw kha a chàn theih vek bakah, a dawr luah lai thlengin an chhuhsak thei a ni.
Hei hi a ṭhatna em em chu, dawr neitu sumdawng kha marketing lamah ṭan a la ang a, dawr luah man bakah hlêp tam zawk nei turin hma a lak phah dawn a ni. Hemi aṭanga GST lut aṭangin sawrkarah tluang (constant) takin takin pawisa a lut bawk ang. Dawr luahtu term hi a tawp hunah tender kha a hma aia sanga chhan ngei ngei a ngaih dawn avangin term lo awm leh tur aṭang pawhin sawrkarah sum a luh tam phah leh sauh dawn bawk.
Ex-Minister pakhat thusawi ka hriat reng chu, “Mi pakhat kan tih lawm chuan mi dang 20 vel tihlungawih loh an ngai," a ti a. Hetiang hi a ni chungin ZPM kalphung thar sawrkar hi New Market dawr luah chungchangah tuna ka sawi tak system ang hian kal ta se la, kalphung ṭha zawk na nâ nâ chu lungawi lohpui ngam leh vui ngam an awm dawn em ni, ka ti a ni.
- Joshua H. Thangliana