Khuallian CM t-shirt hà kha

Kan zah em em Pu DR Zirliana thuziak All India Radio (AIR) kum 90 tlin lawmna programme-a khuallian CM Pu Lalduhoma inthuamna, t- shirt nena hun hmang a sawi zuina thu ka lo chhiar ve a, han comment ve ka duh tlat mai; Pu Zira'n min lo hrethiam se.

Pu Zirliana thuziak, incheina zahawm leh ṭha zawk, a duh ulukna thu kha a ṭawmpuiawmin, Mizote rilrem zawng tak ni pawhin a lang. Kan ram hotu lu ber meuh, khatiang programme pawimawha chief guest meuh ni si t-shirt nena hun va hman kha, a ti mak ve deuh mah mah chu a ni. Mizote inchei uar leh duh uluk ve takte rilru nen chuan a inrem lo deuh tih loh rual a ni lo. Chuvang chuan Pu DR Zirliana meuh pawhin a rawn ziak ta kha a ni a. Pu Zira hian thu ṭha tak leh ziak awm tak a ziak a, kan CM chauh ni lovin, mi dang, hetiang programme la hmang turte tan pawh hriat reng tur ni awm takah ngai ang.

Amaherawhchu, thil reng reng hi thlir dan kawng khat chauh a awm lo va, ‘a lanna tlang dang’ tih te pawh kan neih fo hi. Tunah thlirna tlang dang aṭangin lo sawi ve thung ila. Khaw lum lai a ni a, coat suit nena inthuam hi a zahawm nâin a hahthlakna chin a tam a, in aṭanga chhuah a, hunserh hman chhung chauh ni lo va, nilenga a inthuamna tur atan chuan CM khan zângkhai deuhva a nilenpui tur a inthuam kha a duh a ni mai thei.

Mizote mit pakhat aṭanga thlirin khami nia CM inthuamna kha Pu Zira chauh lo, mi dang pawh ṭha ti lo an awm nual mai thei. Chutihlaiin, kan CM khan khua a lum a, vawiin chu zângkhai thei ang berin inthuam teh mai ang tih rilru pu a nih chuan eng nge a sualna, ti teh ang. A hun leh boruakin a zir ve hle bawk si. Khaw lum em em laia suit leh tie nena lo inthuam tlat mai te hi a hatu ai maha lo hah a awm theih a ni.

Mizote hian inchei kan uar tih kan pha awm lo ve. Vawi khat Mizo nu state danga hnathawk Mizorama lo insawn tir nen kan titinaah, "Aizawla kan lo chho tur kha kan lungngai a, incheiah Mizoram chu kan sang si a, kan huphurh em em a ni," a ti a. Kan ramah eng emaw ti mai maia inchei ṭhalaite zingah awm tho mah se, rual pawl ve tawk tawk tur pawhin ṭhenkhat tan chuan a hahthlak deuh a ni. Kan Chawlhni incheina te hi a hautak lam chu a ni ta.

Ni khat Aizawl khawlaiah kum 40 vel liam taa ka school kalpui nen kan intawk a, kan inngai hle mai a. Keiin, “Ṭhianpa, hei Aizawlah hian kan kohhran biakin a tam ta a, a eng berah nge i lawi, khawi vengah nge i awm?” ka ti a. Ani chuan, "Ngawiteh, hei kei hi ka nêp a, tun thleng hian zu pawh ka la thlah lo va, kohhran pangngaia lawi pawh kan thei lo, incheina te a sang si a, Chawlhni silhfen hautak lohna deuh Salvation-ah kan awm ta mai," tiin min chhang a. Ka lo ngaihtuah ve fo ṭhin chu nasa deuh maiin min ngaihtuah thartir leh ta a ni. Kan Chawlhni incheina te hi a sang lutuk deuh va, tute emaw leh keini duangte tan chuan phurrit a tling ta a ang khawp mai.

Mizoram kohhrante hian ringtu nih leh Pathian rawngbawl hi kan ti hautak em em ni tain a lang. Thawhlawm kan uar si, engah nge Mizote hian heti em ema Pathian rawngbawl hi kan tih hautak aw, tih hi ngaihtuah tlan a hun ta em le?

Kum 2018 khan London-ah Sap Upa leh Pu Buanga thlan chei thar hlanna programme-ah ka zu tel ve a, kan châm ni thumna Sunday-ah Haven Green Baptist Church-ah Memorial Service kan nei a. Member pathum group zai khan hun an hmang a, tlangval pahnih leh nula pakhat an ni. Kekawr an ha ṭheuh niin ka hre ta, pahnih kekawr hak kha chu an khup hnuai thleng ve ve chauh kha a ni. Mizorama kan kohhran upate chuan an incheina kha an pawm lo khawpin ka ring. Mahse, thiam leh duh takin an sa a, a ṭha hle.

Bengaluru-a MTh ka zir lain ṭum khat Sunday chawhnu Mizo Service-ah thu ka sawi ve a. Mizoram ai chuan a lum deuh bawk a, kamis pangngai ka hâ a, kawrchung tel lovin necktie ka suih a. Chawlhni leh Ṭhalai paper-ah chuan, "Kan Pastor ten kawrchung pawh ha lova Pathian thu an han sawi ta hi chu," tih thu a lo chhuak a. Ka mangang hle. Nu leh pate zing aṭang chuan ni se ka hrethiam ang a, a hrethiam ber tura ka ngaih ṭhalaite thlir dan kha mak ka ti viau mai.

Kan sawi kual ta zel a. Rawngbawlnaah kan lut a, Mizote hian Kristian nih leh kohhrana Pathian rawngbawl hi engtin nge hautak lo zawka kan kalpui ang, tih leh, engtin nge, mi rethei leh harsa zawkte pawh inthlahrung lova kohhran Pathian biaknaahte zalen zawka an tel ve zel theih ang, tih hi ngaihtuah tan a ṭha mang e.

- Rev. Lalbiaksang Chinzah