CHAW EI TUI

Mizote hian zing karah leh chhunah te kan inṭhen dawnin, induhsakna ṭawngkam mawi deuh mai kan nei a, ‘Chaw ei tui’ tih hi. Hetiang induhsakna ṭawngkam hi hnam dang hian an nei ve ang em le? Chaw ei tui, han tih takah chuan Mizo upain, ‘Ṭam tawk apiang hi a tui ber a ni," an ti ṭhin tak asin maw le.

Tun hma deuh, kan ramah motor kan la leklam lutuk hma khan khualkhua zin turte chu kein an kal ṭâng ṭâng a ngai ṭhin a nih kha. Vawi khat chu ka pain tihian a sawi a, "Ka ṭhianpa nen kan zinnaah khaw kar kawnga kan kal laiin kan ṭàmchhàwl a, kan chau em em mai a. Chutihlai chuan thlawhhma pakhat kan thleng hlawl mai a, vaimim kûng lo ding fur mai kan han hmu chu, vaimim kâwm chu kan han pawt thla a, a kâwr kan kheh sawk sawk a, vaimim chu kan ei ta bawrh bawrh mai a ni. A tui kan ti dun em em mai a. Tun hma khan kan lo va â em, vaimim hi a chhum te, a rawh tein kan lo ei kher ṭhin a, a hel pawhin a lo tui hle hi maw le, kan tidun bawrh bawrh mai a. Khua kan han lut a, zanriah ei khamin kan thlen innu chuan, ‘Vaimim kan rawhsak ang che u aw,’ a ti a. Keini ṭhian dun chuan, ‘A, rawh lo pawhin a tui tho asin,’ tiin rawh loin ei mai kan han tum a, kan ei thei ta reng reng lo a," a ti a. Mizo upain ṭâm tawk apiang hi a tui ber a ni, an tih hi a lo dik hle mai a ti.

Mihringte hian kan taksa chak nan chaw kan mamawh a, chaw ei lovin kan awm thei lo a ni. Kan taksa mamawh chaw hi tui ti taka kan ei a ngai a. Kan induhsakna ṭawngkam mawi tak pawh, "Chaw ei tui" kan ti ṭhin ang hian. Nimahsela, he kan induhsakna ṭawngkam ṭha hi dawng ṭhin mah ila, kan chaw ei a tui phah chuang lo mai thei a ni. Mi ṭhenkhat chuan, "Chaw ei tui leh tui loh hi chu a hmeh azir mai mai a lawm," an ti ve fo bawk a. A nihna chin chu a awm nameuh mai. Amaherawhchu, eng anga chawhmeh tui pawh hmeh ila, chaw ei tui thei lo tlat, taksa hrisel loh vang leh rilru hah leh thinlung na ngawih ngawih a awm theih. Chuvangin, chaw ei tui tia kan induhsakna ṭawngkam ṭha hian taksa natna leh rilru natna te nei lo tura induhsakna a keng tel vek awm e. Chutichuan, chaw ei tui le, kan tih hian rilru natna leh hahna nei lovin, chaw tui takin ei ang che aw, tiin duhsakna kan inhlan a ni.

Tunlai mite zingah hian ‘chaw ka ei thei lo, ka chaw ei a tui lo’ ti hi kan tam hle mai a; a bikin khawpuia cheng, chawhmeh tui ṭha ṭha, duh duh ei thei site pawh an bâng chuang lo a ni. Miin chaw a ei tui loh chuan a thinchhe tlangpui ṭhin a, chuvangin, chaw hi tui taka kan ei a pawimawh hle a ni. Chaw ei tui tak tak chuan a hmehah a buai ngai lo a, eng pawh hmeh se la, chi ringawt pawh liak mah se, a chaw ei a tui tho ṭhin a ni.

Vawiinah hian chhiartu duh tak, chaw ei tui turin ka duhsakna che a, a hmeh azir ni loin, rilṭam avanga ṭâmchhâwl chunga chaw ei tui pawh ni bawk loin, eng pawh hmeh la, i chaw ei tui turin ka duhsak che a, "Chaw ei tui le" tiin duhsakna ka hlan che a ni.

Tin, chaw i ei tui theih nan chuan tih ve tur leh tih loh tur i nei tih hi i hriat ve tho a ngai a nia. A hmasa berah chuan, zûk leh hmum tih chîn hi chaw ei tui lohna a nih avangin zuk leh hmuam lam chi hrim hrim hi ti ve reng reng suh; i lo ti ṭhin a nih pawhin bansan nghal daih ang che. Kuhva ei te, meizial zuk te, tuibur leh sahdah hmuamte hian chaw ei tui loh an ngah hle a ni. Nang erawh chu heng ang chi hrim hrim hi ti lo la, "Chaw ei tui le."

Chutichuan maw, zing karah emaw, chhunah emaw, eng hunah pawh hun remchang i neih hun apiangah hna thawkin emaw, awmhmunah leh kea kalin emaw thlan tla zawih zawihin, i taksa kha sawizawi ṭhin ang che. Chutichuan i chaw ei a tui mai ang. I chaw ei a tui chuan i taksa a lo hrisel ang a, i hmel pawh a lo ṭha deuh deuh mai ang. I chaw ei tui vang khan vawi khatah ei ṭeuh chuang suh ang che. Vawi khata ei ṭeuh hi kan taksa tan a ṭha lo a ni. Ei tlem hi, ei tamna tih hi hre reng ang che. Chuvangin, nang chhiartu duh tak, dam leh hrisel takin awm la, "Chaw ei tui le."

- Hausanga Hauzel