In saka geologist rawih leh site development
Ni 13.12.2016 Vanglaini Vol. XXI No.302-a Chhiartute Thukhawchang tiha ‘In sakah Geologist rawih’ tih thupui hmanga Lalsanglura ziak kha
ṭha ka tiin, ka thlawp hle mai a; tuihnih pahin thil tlem a zawng han belh hlek pawh ka chak deuh.
Kan khawthleng leh hmunhma in a zir loh avang te, khawpuiah mihring kan pun chak em avangte in In sakna hmun atan a rem leh rem lo te, a hlauhawm leh hlauhawm loh te pawh kan thliar hlei thei ta lo. Ram leh hmun a pung ve si lova, mihring erawh kan pun chak em bawk si avangin a theihna apiangah In sak kan tum ta a. Khawpui huam chhungah phei chuan AMC phal chin sa thei tura hmalak kan tum deuh vek ta mai.
Chutiang a nih avang chuan kan In design tura Architect leh Engineer-te kan rawn bakah hian a hmunhma him leh him loh te, kan duh ang dawl zo turin a innghahna leilung a rinawm tawk dante enfiah hmasa tura hetiang lama mithiam, Geologist-te rawn leh hman ṭangkai nachang kan hriat a va hun ta em!
In lian deuh leh sakna hmun bik a zirin AMC hian Geologist rawn ṭul tihna a nei a, hei hi hmasaawnna pawimawh tak chu a ni phawt mai. Hemi piah lamah hian kan duhdan a zira bithliah siamin Geologist-te tel ve ngei ngaihna dan hi awm se a va ṭha dawn em. Chu bakah chuan tun anga Department hrana mithiamte va rawn ve ngawt lo hian AMC ah ngei hian Geologist engemaw zat hi awm ve thei se; ṭhalai mi thiamte chhawr ṭangkaina a ni ang a, ṭul lova sum sen ralna a nih loh hmel khawp mai.
In sak dawna AMC Building Regu-lations zulzuia ruahmanna bakah hian a sakna tur ruahmanna (site development) hi Dan chhungah rin luh thuai ni se. A sakna tur ber ruahman lovin In a sak theih loh a, chutiang a nih avang chuan a senso (estimate) ah pawh hei hi telh ngei ngei ṭhin a ni.
Site development pawh hi building construction process pawimawh tak pakhat leh a hmasa berte zinga mi a ni. Building Regulations buatsaih ṭantirh aṭang khan he ngaihdan hi chak tak leh lian takin a awm reng a, eng engemaw avanga telh rih loh mai a la ni. Chumi avanga Aizawl khawpui hmun hrang hranga vanduaina kan tawh te, mipui vantlangin kan tawrhna leh harsatna thleng thei te chu sawi tam ngai lovin kan hre ṭheuh awm e.
In satute reng reng hian keimahni chauh in ngaihtuah lovin, mipui vantlang leh kan ṭhenawmte ngaichang chungin hmalak thiam a ṭul hle. Dan zawm mai piah lamah hian kan khawsak hona atana ṭul leh pawimawh tak tak kan In sak danah hian a inrawlh ṭeuh tih hre thar leh ila. Chumi piah lamah chuan tui dawn mumal tak siam te, tuichhia leh ruahtui paihna mumal tak siam leh lirthei dahna tur ngaihtuah telte hi i ngaipawimawh ang u. AMC leh kan mithiamte lam aṭangin a pawimawhna leh a ṭulzia te, chutiang kan tih loh chuan kan hmunhmain a tawrh theihziate kan hre fo ṭhin a; mahse kan zawm lem lo niin a lang.
Kan khawpui nawm leh nawm lohna te, a him leh him lohnaah te hian kan zavaiin mawh kan phur ṭheuh a, mahni tihtur pual ṭheuh hlen thei turin i ṭang sauh sauh ang u khai.
- Dr. Lalbiakmawia Ngente