2 NIGHTS

Kum khatah zân tam tak a awm a; nimahsela, hêng zan hnihte hi an danglam bik a, fimkhur a ngâi bik hle. Chûng zân hnihte chu Ur lâwk Zân (24 December) leh Kum Hlui Thlah Zân (31 December) te hi an ni. Hêng zânte hi Mizote chauh ni lo, khawvêl pumpuiin an ngaih pawimawh a nih avângin zân bengchheng leh zân zalên a ni.

Hei vâng hian zalenna hmang thiam lo hringfate hian ur lâwk zân leh kum hlui thlah zânte hi a nuam thei ang bera hman tumin‘It’s my life, Just do it, It’s ok’ tih thupuia neiin kan sapa tâl
ṭhin. Hâlpuah, hâlmâwi, ei theih, in theih ruih theih thil chi tinrêng leh sex nên hman kan tum ṭhin. Mi tinin hêng zân hnih kan hman ṭheuh dân zawng zawng dik taka ziak a, a bu-a chhuah ni ta se hralh a tlain chhiar a hlawh ngawt ang. Hêng zânahte hian kan fimkhur a ngâi hle.

Krismas ur lâwk zân

Krismas ur lâwk zân hi khawvel Chhandamtu Isua Krista lo piang tûr lo ur lâwkna a ni a, Krismas lo thleng mai tûr avângin kan hlimin kan phûr a, kan zalên tlângpui bawk. An hlim loh palh an hlauh avângin nu leh pate paw’n an tu leh fate an thlah zalên ṭhin. Thihna lak ata min chhandamtu pianchamphaphâk nghâk-hlela kan phusa nasa a nih chuan thil tih âwm tak a ni ang. Nimahsela, kan hlim leh phûr chhante hi Lal Isua vâng ni loin he zân boruak zalên tak thlâkhlelh vâng mai mai ni zâwk a lang. Chuvângin, he zân zalên takah hian kan fimkhur a ngai hle.

Zalenna hmang thiam lo tân phei chuan ruihtheih thil leh mipat hmeichhiatna thlengin a hmankhawloh theih a ni. Tûn hma phei chuan Krismas ni aṭanga thla 3 a liam hnuah sâwn pâi an tam thu sawi a lo ni fo tawh a ni. Tum lâwk rêng vâng pawh ni loin zalen luat tuk avâng zâwkin thil ṭha lo tleirawl leh ṭhalaite hian an ti palh thei a, hei vâng hian nu leh pate paw’n zân dang zawng âiin hêng zan hlimawm leh zalênah hian an tu leh fate an enkawl uluk deuh a pawimawh khawp ang. Enjoy ve mai mai rawh se tih hi a awl a; nimahsela, a sawhkhâwk erawh hi chu beisei âiin a buaithlâk zêk ṭhin.

Tleirâwl ât lâi tih ṭawng-kamte hi hman fo loh a ṭha. Ur lâwk zân phûr tih avânga chak deuh deuha lirthei khalh ang chite hi thil atthlâk tak a ni. An phûr luat avâng hian chhungkua, kohhran leh khawtlângin harsatna kan tawh phah thei tih hriat a ṭha. He zân special tak hi Setana chuan ‘golden nite’-ah a lo puang ve bawk a, kan zalen nasat ṭhin avângin thlêm thlûk tûr a lo zawng nasa hle a ni. Ur lâwk zânah hian fimkhur a ngâi hle mai.

Kum hlui thlah zan

Ur lâwk zân âiin kum hlui thlah zân boruak hi a sâng fe zâwk tih hretute vek kan ni. ‘It’s my life, Just do it’ tih thupuia neia kan sapa tâl zân ti ila a sual tam lo ang. Kum hlui thlah zâna pawisak nei lo ang maia kan khawsak
ṭhin avângin ṭhangṭharten an entawn a, rual u zâwkte hman ang bawkin an rawn hmang chho zel a, vawiin thlengin kum hlui thlah zân hi zân Sodom leh Gomorra anga ngaihna a lian hle. Nu leh pa leh pi leh pu tam takte lah chuan hun hlimawm leh zân zalên alâwm tiin an tu leh fate an thlah zalên tlat mai si.

Kumhlui thlah zânah hian naktûk aṭangin nun thar nên tih rilru kan put ṭhin avângin pawisak kan nei tlêm deuh
ṭhin niin a lang. Thil ṭha lo eng pawh ni se naktûk aṭangin ka sim tawh ang tih rilrua a awm tlat avângin he ngaihdân dik lo tak mai hi Setana chuan a lo hre kar mai a, inthlahrung miah loa thil ṭha lo ti tûra min beihna hmanrua atân a lo hmang ṭangkai fo rêng a ni. A nihna takah chuan kan hun hman mêk bâk hi chu innghahna atân a hman theih loh. Kum thar aṭangin nun tharin ti si, kum thar chuangkâi zo ta si lo an tam ngêiin a rinawm. Kum hlui thlah zâna kan khawsazia leh kan rilru puthmangte hi thlâk a ṭha khawp mai.

Chuvângin, kum hlui thlah zânte hi fimkhur zân atân hmang ta zâwk ila a duhawm hle. A thu hrimah kum hlui thlah hi thil ṭul ber pawh niin a lang lo. Thlah kher loh paw’n amahin a her liam ve mai. Kum thar pawh zân lâia lo hmuah kher a ṭul ber lo. A lo thleng ve mai. Kum thar tûka kan tho har thei lutuk te hi a ṭha lo. Kum hlui thlah ziah avâng leh kum thar lo hmuah ziah avânga hlâwk ta viau sawi tûr an vâng khawp mai. Kan ti duh ṭal a nih paw’n chhûngkuain ti ila a tâwk viau. A hun pawimawh ber Krismas leh Kum thar nite hmang ṭha hlei thei lo khawpa a behbâwm leh chhehvêl boruaka kan inhmang da ṭhin hi chu sim a ṭha hle.

Tlipna

Kum dang zawng âiin kumin 2016 Krismas ur lâwk zân leh kum hlui thlah zânahte hian nasa lehzuala kan fimkhur a ngâi ang. Chutih rualin, hêng kan zân zalên sawi tâkahte hian kan hlimin kan phûr tûr a ni a; nimahsela, Pathian châwimâwi zâwngin kan hlim tûr a ni. Krismas ur lâwk tia Krista rêng rêng ngaihtuah miah loa kan lo phusa ve vak vak a nih zawngin thil atthlâk tak kan ti a ni ang. Kum hlui pawh kan thlah duh ṭal a nih chuan rilru thianghlim tak pu chungin kan thlah tûr a ni ang. Tleirâwl, nula leh tlangvâlte châkna a sosâng dâwn a, nu leh pate mawhphurhna pawh a sâng dâwn.

Hêng zânahte hian riah botir emaw lenchhuahtir loh emaw hi a fuhin a rinawm. Kan chhûngte nên Krista duh dânin hêng zânte hi hman i tum ṭheuh ang u.

- Miltona, Vaivakawn