Rem thu leng rawh se
Kumtir lama dam rei nghah thil kan tih ṭhin kha tunah chuan kan lo thleng dawn hnai leh ta reng mai. A bik takin naupang leh ṭhalaite tan phei chuan Krismas hi a nghahhlelhawm zual ngei ang.
Mihringte kan fel viau emaw kan in tihlai hian court hrang hrangah chuan thubuai chin fel ngai chin fel sen loh a awm tel tul mai a nih hi.
Keini-ah pawh hian Kristian ṭha kan in ti viau na a, nupa inṭhen, chhungkaw keh chhia tamzia hi, keh chhe chiah lo, awm ho ṭha hleithei lo tamzia pawh hi i ngaihtuah ve ngai emaw. Hemi atan hian kohhranten counseling centre an siam ṭeuh nia. Unau inngeih tak emaw tih pawh hi engemaw hlekah chuan an bo-ruak a sang hluai a, mit khap kar loah an in hmelma thei mai nia.
Tun hma deuh te phei kha chuan chhung-khat/ unau, court-a thubuai nei, in khing uaih uaih hi sawi tur an awm nual ṭhin. Chhungkua leh unau ngei ngei te pawh kan inrem thei lo ṭhin hi a pawi hle mai.
Kawvelah hian sakhua a awm ṭeuh tawh a, chung zingah chuan keini Kristiante pawh hi kan tel ve a. Hunpui, ni serh, neuh neuh ang chi te pawh hi an nei ve nasa hle. Kristiante hi chuan Krismas kan tih hi kan hun pui ber leh hman nasat ber ṭhin a ni. A hman hun pawh hi a inang lo nual a, a ṭhen chuan January lamahte an hmang a, keini hi chuan December-ah kan hmang thung.
Krismas awmzia ber chu khawvel suala tlu tawh tun din leh nana Pathian fapa mihringa a lo channa hi a ni. He nausen lo piang hian nakinah sual a tlu tawhte tan a nun kross-ah a hlan dawn a ni. Pathian leh khawvel suala tlu tawhte inrem lehna tur a nih chu. Chuvang chuan Kristian zawng zawngte chuan uar tak leh ropui takin kan Lal Isua piancham hi kan hmang ṭhin a ni. Hemi ni aṭang hian khawvel hun chhiar dan pawh fel takin a lo in siam rem thlap a ni - B.C. & A.D. tiin.
Kan han sawi lan takte bakah hian a dang pawh sawi tur a la awm nual ngei ang, mah se lo duh tawk hrih mai ila. Thawnthu leh titi-ah te kan hre
ṭhin tawh ngei ang a, he ni, Krismas ni-ah hi chuan indopui lai meuh pawn sipai in ep ut tawhte pawn an silaite dah ṭha in hlim takin an hmang ho
ṭhin, an ti a ni.
Awle, keini pawn vawiinah kan thinurna te, lungawilohnate dah ṭhain kan thinlunga hremna thu len tirin, van zaipawl tena “…mihringte hnenah rem thu leng rawh se,” tih hla an rawn rem ang khan.
- Lalchhandama.Colney
Chaltlang,
LilyVeng