KUM THAR CHIBAI!

Kum thar 2019 chu kan han chuang kai leh ta a, a lawmawm ngawt mai. Kum thar chibai! 

Ni thar leh kum thar kan la hmuh ngai loh leh kan la dai ngai loh chu hmuin, kan han dai chho leh dawn a, eng tin tak kan nun leh hun te hmang chho leh hlawm ang i maw. Tu tan pawh kum ṭha leh kum duhawm, malsawm kum a nih beisei ang. 

Pathian hnenah lawmthu sawi theih­nghilh lo ila; a khaw­ngaihna leh a hma­ngaihna, a malsawmna kan dawn avang zawk chauha kum 2019 hi chuang kai a, hmu thei kan ni si. Kum hluiin a liam pui tawh a, an lo kir leh tawh dawn lo a, siam ṭhat leh theih pawh an ni tawh lo. Chuvangin, kum 2019 hi i tan kum chhinchhiah tlak a nih theih nan a ṭha thei ang bera hmang turin han inbuatsaih phawt mai teh. 

Kum hlui khan i nun dan leh ka nun dan dik lo zawng zawng her liam pui se, kum thar 2019 hian i nun leh ka nunah nun dan thar a lo her chhuahpui theih nan theihtawp i chhuah dun ang hmiang. 

Kum hlui kha nang leh kei atan pawngpaw liam ringawt lo se - sawngsawhlawtna awm loin. He kum thar hi kum thar satliah ni lo se - rah ṭha chhuah tel lo chuan. 

Kum hluia kan nun leh kan hun hman dan ṭheuh en letin, chhut let ila. In siamṭhat kan ngaihnaah in siamṭhat tum ila, he kum 2019 ah hian, kan nuna sim tur kan neihte sim ila, bansan tur leh kalsan tur kan neih ang ang te bansanin kalsan ila. Kan fellohna leh sualna zawng zawngah te fel leh ṭhat zir ila, kawng dik lo kan lo zawhte tawp sanin kawng dik zawh tum ta ila. 

Kum hluiah khan ka hnaah ka lo rinawm lo emaw, ka kawppui lakah ka lo rinawm lo emaw, pawl sum leh sawrkar sum eiruk ka lo ching ṭhin a nih chuan kum tharah hi chuan chung ang thilte chu bansain, rinawmna nun neih tum tlat ila. 

Kum hluiah khan hun ka vawng dik lo a nih chuan kum tharah hi chuan hun vawn dikte zir ta ila, nikum lamah khan ka lo thinchhe viau a, ka lo zaidam lemlo a nih chuan kum tharah hi chuan thinnel leh zaidamte zir ta bawk ila. 

Kum hluiah khan ka lo tlawmngai vak lo a, midang hmangaihna leh lainatna, khaw­ngaihna thinlung ka lo pu lem lo a nih pawn kum tharah hi chuan tlawmngaihte zir thar ila, midangte chungah rilru dik tak leh thianghlim tak put tum ta bawk ila. 

He kum thar 2019 hi i tan leh ka tan kum thar satliah ve mai nih tir i tum lo teh ang - a ṭha zawnga kan danglam kum, kan nuna dik lo leh fel lote kan bansan kum, sual kawng kan zawh mekte kan bansan kum te lo ni se. Chhungkuaah, kohhranah, khawtlang leh ram tana kan ṭangkai kum te leh kan ṭangkai lehzual kum lo ni se. Dikna, rinawmna, taihmakna, huaisenna dik, tlawmna, thuhnuai rawlhna, midang hma­ngaihna,' kan neih ṭan kum lo ni se. 

Kum 2019 hi Mizo­ram sawrkar thar tan pawh kum dang zawng aia hmasawnna nasat kum, rethei leh pachhe zawk tena leirem an rah ṭanna kum lo ni se. Kum chhinchhiah tlak lo ni se. Ei leh bara kan intodelh ṭan kum te, kawlpethaa kan intodelh ṭan kum te, kawngpui kan neih ṭhat kum, ram hruaitutena hna an thawh ṭhat ber kumte lo ni se. 

Kum 2019 hi kum ṭha, malsawm kum lo ni mawlh teh se.