DISTRICT FUNCTION CHUNGCHANG!

September ni 1, 2008 ni-a chawhma dar 11:00-a Council of Minister Meeting chuan Khawzawl, Hnahthial leh Saitual te chu District Headquarter atan a lo remti in a tuk - Ni 12 Sept 2008 chuan Notification No. A. 60011/2/95-GAD/Pt hmangin heng khawpui pathumte chu District Hqtr. atan a lo puang fel ta a ni. 

He meeting-ah hian khatih hunlaia Mizoram sorkara mi pawimawh ber ber te chu an kim vek a, a hnuaia tarlan ang hian kal lo pawh an awm lo a ni:-

Pu Zoramthanga - Chief Minis­ter; Pu Tawnluia - Minister; Pu R. Tlang­hmingthanga - Minister; Pu Lalrinchhana - Minister; Dr. R. Lalthangliana - Minister; Pu H. Vanlalauva - Minister; Pu H. Rammawi - Minister; Pu K. Sangthuama - Minister; Pu ZH Ropuia - Minister of State; Dr. Lalzama - Minister of State; Pu K. Vanlalauva - Minister of State; Pu Haukhum Hauzel - Chief Secretary/ Cabinet Secretary te an ni. 

Tichuan, Heng khaw pathum chungchang hi agenda pakhatnaah neih a niin ‘District siam belh thu hi sawi ho a nih hnuah Cabinet chuan District dil mek Hnahthial, Khawzawl leh Saitual chu District pek a remti a, an ramri tur chu sawrkar siamfel tur a dah a ni’ tia pass a ni. Nimahsela, he Notification chhuah hnu lawk mai December thlaa inthlanpui neihah chuan MNF Sorkarna chu a lo tla leh ta mai si a, Congress Sorkar thar a rawn piang a. Anni lah chuan kutthlak an tum der bawk si lo a, hei hi kan hriat ṭheuh angin tun hun thlengin siam fel a la ni lo mai pawh niloin bawhzuina engmah ala awm lo a ni. 

District Implementation Demand Committee pawh din a niin vawi tam tak sorkar lam dawr a ni a. Nimahsela, tun, kum 9 hnuah pawh hian thu thar lam engmah hriat tur a la awm lo ta reng a nih hi. Saitual lam phei chuan huaisen takin 2017 Independent Day kha an boycott hial a nih kha! 

Kumin Inthlanpui ah pawh a bik takin Khawzawl leh Saitual te chuan District Capital chu campaigner te hnena an mamawh thlen lian ber niin candidate te ngei pawhin function ngei turin an tiam hlawm bawk a ni. Khawzawl (Tuichang) bialah chuan tuna sorkarna siamtu MNF hruaitu leh tuna Dy. Chief Minister, Pu Tawnluia chu a tling ngei bawk a. Hnathial lamah pawh Dr. R. Lalthangliana chu tlingin Cabinet Minister a ni leh bawk a, chutiangin Saitual-ah pawh Cabinet Minister ni phak R. Lalzirliana a tling leh bawk a. Campaign laiin anmahni ngei pawh hian an sawi uar bawk a, hetia sorkarna an chan phei hi chuan chhuanlam dang nei loa hna hmasa a an neih ngei pawh a rinawm. 

Congress sorkar khan tihpuitlin a tum lo hrim hrim tih a chiang a, ruahmanna engmah an siam lo a ni. Tun inthlan dawn hnaih lamah Treasury Office chu a han pe ve ngawt tak na a, chu pawh Saitual tel loin Hnathial leh Khawzawl chiah ala ni zui a, nimahsela a tu amah chuan an lawmthu an sawi chuang lo a nih hi. Vote tlak dan en phei chuan Hnahthial (South Tuipui) ah hian Congress Candidate hian MNF candidate hi vote 1469 laiin a pha lo a, Saitual lam (Tawi bial) ah pawh District function loh avanga Congress aṭanga bang ta R. Lalzirliana chu thlan tlin a ni leh a, Congress candidate hian vote 2310 laiin a hneh lo a ni. 

Chutiang bawkin Khawzawl lamah pawh Congress candidate chuan MNF candidate Pu Tawnluia chu vote 1975 laiin a pha lo a, pathumna a ni zui bawk a ni. 

Le, tunah chuan District capital-a puangtu MNF sorkar ngei chuan sorkarna fawng an chelh leh ta a, sawi thar leh ngai loin Khawzawl, Hnahthial leh Saitual te tan chuan Cabinet Minister kan nei ṭheuh bawk a, kan lo lawm nghal em em ringawt a ni. Sorkar tuk aṭangin Tlumtea thlir takin kan lo thlir tawh a, engtikah nge a tak ram kan hmuh ang? tih chu mitmu pawng zawr zawr khawpa kan thlir a ni ta. Campaign auhla atan chauha min hman sak loh kan beisei che u a, a bul min ṭan sak tawh ngei hi min tihpuitlinsak turin kan han ngen nawn leh che u a ni.