Zebra crossing siam chhan Kea kalte'n an zawm a ngai e
Kumin June thla tir aṭangin Aizawlah chuan traffic police-te'n zebra crossing-ah motor-te ding lo turin a tak takin hma an la ṭan a, a lawmawm. Zebra crossing awmna apiangah langsar takin hriattirna an târ deuh vek a, a ṭha hle. Hei hi mipui lam pawhin kan zâwm ṭha viau a, a lawmawm. Bakah, zawm loh ngam pawh a ni lo, traffic police hlauh ai mahin, lehkha intar reng chunga zebra crossing-a la ding chut chut nih chu a zahthlak ve hrim hrim a ni.
Zebra crossing awm chhan te, a nihphung leh hman dante chu a hma pawhin kan hre fur ang a, mahse, mipui hian a taka zawm kan tum lo mai mai a ni. Zâwm lo ṭhin zingah traffic police-te ngei pawh an tel ṭhin mai thei e. Tunah chuan a takin, tihluihna ang deuh rohin kan hmang ta a, a ṭha em em a ni.
Zebra crossing bulah zebra crossing-ah ding lo tura inhriattirna thuziak tarte hi traffic police hian an tar reng kher lo ang, lak sawn hun a la awm ngei ang. An târ tawh loh avangin din an phal leh ta tihna a ni lo tih kan hriat lâwk a ṭha. Tuna thuziak an târa kan tih ṭhin ang tho hian, an târ loh hunah zebra crossing-ah din loh tur a ni tih hi lirthei khalhtute'n kan nunphungah kan lak luh ngheh a ngai a ni.
Hetihlai hian, kawngpuia kea kalte pawhin tih tur leh mawhphurhna an nei ve bawk a. Lirthei khalhtute lakah zebra crossing nihphung zâwm tura kan inphûta kan innawr viau lai hian, kea kal, kawngpui kân turte pawhin zebra crossing hi kan zawm ve a ṭul. Tunah chuan zebra crossing ni loah, mahni duhna leh remchanna hmun apiang kawngpui kan mai an la tam hle a ni.
A nihna takah chuan, zebra crossing hi motor tihdinna tura siam a ni lo a, kea kalte'n kawngpui an kânna tura siam a ni zawk. Siam a nih chhan dik tak ang hian, kea kalte'n zebra crossing-ah ngei kawngpui kân zel ṭhin ila a ṭha. Aizawlah hian, a bikin commercial area chin bikah phei chuan zebra crossing a tam thawkhat bawk a (a tam mah mah emaw tih mai tur zawk a ni), kawngpui kân turte'n zebra crossing pan zel hi kan tih tur a ni.
Zebra crossing ni lo, mahni duhna leh remchanna hmun apianga kawngpui kan hi motor khalhtute tan an ninawm ṭhin hle a; intihpalh a hlauhawm bik bawk. Chuvangin, zebra crossing nihphung zâwm tura motor khalhtute kan beiseia kan nawr rual hian, kea kalte pawhin zebra crossing siam chhan leh a hmanna tur hi kawngpui kânna tur a ni tih hriain, a nih dan tur dik takin i hmang tlang teh ang u khai.
- Zoramchhana