Kal dan dik leh mawi

Motor awm ta lo chuan kan kawngpui zauzia pawh a tilang chiang hle. Christmas dawn Bazar tam lai taka mipui hahdamna tur ngaihtuahin ‘No-Vehicle Zone’ kan siam kum tin ta mai a. Siam loh ai chuan hlawk zawkin kan hria ni ngei tur a ni.

Mahse, kan ti teh ang, kaldan leh inpelhna lam takngial pawh kan hriat si loh chuan, kan kawngpui zau tak motor awm bawk si loah, handam taka kal del del tur kan nih laiin hah hrepin in kan thleng leh ṭhin dawn a ni.

Bazarpui panna Zion Street kawng-puiah chuan chhuk zawng leh chho zawnga kalte chu an lo in nawr buai luih luih a, chutih lai chuan patling fel tak tak lokalin hruizen an rawn pawt mar a. Chhuk zawnga kal vei lamah, chho zawnga kal vei lamah bawk aurinna nen mipui an han zirtir a, awmze nei mumal lova kal buai nuaih nuaih te chu kar lovah a fel duak duak ta mai a ni.

Khawi ram leh kawngah pawh kal ila mi kan pelh dawn chuan veilamah kalin dinglamah mi kan pel ṭhin tur a ni a, kawngpui lian leh kawng te takte footpath emaw feh kawng tia lek leka zimah pawh nise, a
ṭha deuh deuh zawk a ni. Motor pawh chak takin an tlan a, dan dika an tlan chuan an insu buai mai maih lova, mahni tlanna tur lo lama tlan an awm zeuh chuan an insu palh nge nge ṭhin.

Motor tel lo, ke-a kan kal avanga duh lam hawi hawia kal chu thil dik a ni thei lo, chuvangin kal dan dik kan hriata kan ngaih pawimawh loh chuan eng anga kawngpui zau leh lian pawh nei ila, a hlawma kal tam lam apiang an nihlawh a ni mai.

Duhlam hawi hawi-in an kal leh dum dum ang a, vawk lal lenin an leng a ni ber; a hlawma kal ve lote chuan kan hel dawr dawr a ngai leh dawn a ni.

Theih nise traffic police emaw khaw-tlang hruaituten mipui kawngkal zirtirin min thunun deuh sela a ṭha in ka hria.

Kalkawnga kal dan sawi chhuah takah chuan kan pian phung leh fuke in a zir ngang lo a nih loh chuan kal mawi te pawh hi zir ve deuh a ṭha. Kak deuh deuha kal te, kephah hnuai lei hruta kal te, zau deuh deuha pen a, sabengtung kal ang maia bu nghut nghut te, muang leh zawi, thatchhe fahrana kalte kan awm nawk mai. Ka sawi loh lam hi mawi ka tih zawk chu a ni a, chak pangngai phur hmel taka kal hi hmuh an nuam ber.

- H. Lalthanzama