Seminar leh workshop kan hmang Ṭangkai lo
Kohhran leh pawl angin hun seminar buatsaih te, workshop emaw te kan buatsiah ngun ta hle. KṬP chhungah pawh zirhona eng eng awm a awm a, bial leh branch aiawhte kan intir
ṭhin. Hetiang atan hian sum tam tak kan seng a, hun kan seng hle bawk a, mahse kan hlawkpui tawk loin a lang a, a ṭangkai tur angin kan hmang ṭangkai lo.
Tun Synod Inkhawmpuiah pawh khan Social Media zirhona buatsaih tura rel a ni a, sum leh tha tam tak kan seng ang a, kan ṭangkaipui leh tak tak lo emaw, kan hmang ṭangkai thiam lo emaw a ni leh ang. Bial tin aiawhin, khawpui chhungah chuan kohhran tin aiawh kal tur kan ti ang a, kan kal khawm ang a, nilengin hun kan hmang emaw a ni leh ang a. Kan aiawha kan tirh ten Nilai zan inkhawmah report an pe ang a, kan ngawi leh vang vang ang a, kohhran mipui chuan hriat belh kan nei tlem leh hle ang.
A kalte hnenah TA kan pe ang a, sum tam tak kan seng ṭeuh ang a, ei tur nen, a hmun hma buatsaih nen, resource person tur nen, sum kan seng ṭeuh ang. Mahse mipui nawlpui chu sawi loh, kohhran committee pawhin an hlawkpui mang loh tur, a kal chinte pawhin a hnu rei vak loa an theihnghilh leh mai tur a ni dawn.
Hetiang hian kohhran leh ṭhalai pawl mai bakah, pawl neuh neuhah seminar leh hetiang lam chi hi kan buatsaih ngun tawh hle.
Kan hlawkpui tur anga kan hlawkpui lohna chhan chu khata kalten report an pekah kan duh tawkpui ṭhin vang a ni. Paper an zirho a, sawihona hun a kalten an hmanah kan duh tawkpui chuan awmzia a awm thui lo ang. Kohhran emaw, seminar-a aiawh tirtute khan a bawhzui dan an ngaihtuah a ngai a ni.
Kohhran huang chhung bik thlir ta ila. Kohhran aiawha kal report kan pektir bakah, an paper zirho aṭangin kohhran malin eng chen nge bawhzui a, tihhlawhtlin theih a neih tih hi ngaihtuah zui a nih loh chuan, kohhran committee zawng pawhin an hlawkpui lo ang.
Nilai zan inkhawmah emaw a tihdan tur sawi te, kohhran mipuite tel ve theihna turte buatsaih a nih zui lo chuan awmzia a awm thui lo ang. A bawhzuitu tur Kohhranin siam se, ṭhalai lama zirtir zui turin ṭhalai pawl lamah tih tur siamsak te, kohhran hmeichhia leh pavalai lama bawhzui tur kan insiamsak loh chuan holam taka sum senna a ni ang.
- Ramropuia