AI leh Mizo hla: Originality humhalh hi kan mawhphurhna

Artificial intelligence (AI) hmasawnna avangin hla siam leh music siam danah thil thar tam tak a lo piang a. AI hmangin hla voice tihdanglam, tune siam thar, singer aw ang, remix leh reproduction te rei lo te chhungin a tih theih ta. He hmasawnna hian music industry tan hmasawnna tam tak a siam a. Hetihlai hian, hla phuahtu, music composer leh singer chanvo leh an Intellectual Property (IP) humhalhna lamah harsatna nasa tak a thlen mek bawk.

Eng dan hmanga humhalh nge?

India ramah Copyright Act, 1957 (amended) chuan hla leh music literary work, musical work leh sound recording angin a humhalh. Hla thu (lyric), thluk (tune), music leh recording ownership humhalhna hi Copyright Act, 1957 hnuaiah a awm vek. Hla pakhat lek pawh ni se, AI hmanga siam danglam tur chuan copyright owner phalna emaw, licence emaw a ngai. Hemi tel lo chuan copyright infringement a ni thei. Dan bawhchhiatna a awm chuan hremna pawh a awm thin.

Copyright Act hnuaiah, miin hla emaw, music emaw owner phalna lova reproduce, distribute, commercial-a hmang emaw a nih chuan thla 6 atanga kum 3 thleng lung in tàn theih leh Rs 50,000 aṭanga Rs 2,00,000 thleng pawisa chawitîr theih a ni. A ti chhunzawm a nih chuan court-in hremna sang zawk a pe thei bawk. Tin, website, social media platform leh streaming service-ah upload a nih chuan an account tihtawp, content tihbo leh compensation pek tura thupek pawh a awm thei.

Tunlai hian AI hmangin Mizo hla hlui leh tharte chu owner phalna nei lovin an siam danglam a, voice an copy a, an remix a, Youtube-ah an upload a, sum hmuh nan an hmang ṭhin. Hei hi technology hman sualna mai ni lovin, hla leh music siamtu thawhrimna leh an chanvo tihchhiatna a ni. Chuvangin, Mizo Song Writers Association (MSWA) leh music lama pawl hrang hrangte’n originality humhalhna kawnga hma an la hi a lawmawm hle.

AI hmang emaw, hmang lo emaw, a hla leh music owner phalna lova internet-ah upload leh sem darh hi Copyright Act, 1957 bawhchhiatna a ni. Copyright owner-in complaint a thehluh chuan YouTube, Facebook, Spotify, Instagram leh digital platform dangte chuan India dan leh an community policy angin content an remove thei a, account an suspend emaw, an terminate thei. Offence nasa zawk a nih chuan court-in Copyright Act hnuaiah lung in leh pawisa tam tak chawi theihna a ni tih hi kan hriat thar a ṭul.

Engtin nge dan anga kan humhalh theih ang?

India ram dan angin, Copyright Act, 1957 hnuaiah hla leh music literary work-te hi siam chhuah a nih veleh copyright registration tih kher ngai lovin, automatic copyright protection a nei nghal. Mahse, Copyright Registration Certificate a awm chuan ownership prove a awlsam. Registration nei lo pawhin court-ah hian heng evidence dang hmang hian an prove thei:

1) Original handwritten lyrics

2) Computer file (Word/PDF)

3) Audio demo original

4) Studio recording file

5) Email-a thawn record

6) WhatsApp message date

7) Witness (studio engineer, producer, singer)

8) YouTube/Facebook upload date

9) Hard disk metadata

Hetiang evidence chiang a awm chuan registration nei lo pawhin thiam an chang thei.

Dan bawhchhiatna (Copyright Infringement)

1. AI hmanga Voice Clone: Phalna lova AI hmanga mi dang aw hmanga AI hla thar siam.

2. AI hmanga hla thlûk modify: AI hmanga hla thluk awm sa siam danglam.

3. Lyrics copy: Hla thu copy a, siam danglam.

4. AI cover version: AI hmanga original singer voice siam danglama upload.

5. Commercial use: Owner phalna lova YouTube monetization, Spotify, Facebook Reels, Advertisement, Movie, Drama atana hman.

6. Music sampling: Music intro, guitar, piano, drum lak chhuaha remix.

Hremna (Punishment)

Copyright Act, 1957 Section 63 hnuaiah thla 6 aṭanga kum 3 lung in tàn leh Rs 50,000 – 2,00,000 chawi. Offence nasat dan azirin Court chuan hremna a pe thei bawk. Tin, Civil Punishment kan tih mai–video delete, song remove, royalty pek, compensation pek, profit zawng zawng owner hnena pek leh, tun hnua upload khapna court-in order pe thei. Tin, IT Act hmangin internet hmanga infringement-tute platform–YouTube, Facebook, Spotify, etc an suspend thei bawk.

Humhalh dan step by step process

Step 1: Word file, Notebook, PDF, audio demo, studio track, etc hmanga original file vawn.

Step 2: Date Proof (eg. Lyrics 10 July 2026, Demo 15 July 2026, Studio 20 July 2026).

Step 3: Mahni Gmail-a thawn hi date proof a ni.

Step 4: Cloud Backup–Google Drive, Dropbox, OneDrive, Digilocker-a dahṭhat.

Step 5: Copyright Registration–India Copyright Office-ah register tur; hei hi ownership proof awlsam ber a ni.

Step 6: Publisher Agreement–singer, producer, music company nen written agreement siam.

Step 7: Licence siam–mi dangin cover version an siam duh chuan permission letter pek.

Step 8: Digital Distribution–Spotify, Apple Music, YouTube Music te-ah upload ISRC (International Standard Recording Code) hman.

Step 9: Watermark–demo file-ah, "This is Copyright Protected" tiin voice watermark dah.

Step 10: Evidence vawn–Studio bill, payment, contract, chat history, email, invoice, photo, video zawng zawng vawn ṭhat.

Copyright Registration Process (India)

Step 1: Lyrics leh music original siam.

Step 2: Original file evidence khawl.

Step 3: Agreement siam (singer/composer/producer)

Step 4: Copyright office hnenah online application thehluh.

Step 5: Fee pek.

Step 6: Diary number dawn.

Step 7: Objection period (normally 30 days) nghah.

Step 8: Examiner-in document endik.

Step 9: Certificate dawn.

Step 10: Certificate, diary number leh original evidence humhalh.

Entirna (Practical Example)

Zorock chuan 2026-ah hla thar a siam a, a thluk pawh a siam bawk. Studio-ah demo a record a, Word file leh notebook original a vawng a. Gmail-ah amah hnenah a thawn a, Google Drive-ah a backup bawk. Chumi hnuah Copyright Registration a dil bawk.

Thla hnih hnuah mi pakhat chuan AI hmangin a voice copy a, tune chu a modify a, YouTube-ah monetization nen a upload ta a. Zorock chuan original lyrics notebook, Word file metadata, Gmail timestamp, Studio master recording, Copyright Registration Certificate leh YouTube upload evidence te chu Court-ah a thlen ang. Court chuan a ownership a hre chiang a, infringer chu video delete turin thu a pe a, compensation pek turin a ti bawk. Offence azirin Copyright Act, 1957 hnuaiah criminal hremna (lung in tàn leh fine) thleng pawh a awm thei.

Rawtna

Mizo hla leh music hi kan hnam nunphung leh kan thlarau ro hlu ber zinga mi a ni. Kan hla leh music humhalh hi hla phuahtu, musician, zaithiam, producer, social media user leh mipui tan a pawimawh. Mizo Song Writers Association tan chuan member zawng zawng hla leh tune te copyright registration, ownership database, digital timestamp, leh AI misuse monitoring system siam a ṭangkai hle ang. Hetiang system a awm chuan, AI hmanga hla leh music ruksakna laka hla phuahtu leh musician te humhalhna kawngah nasa takin a pui thei ang.

Kan zaithiamte leh musician-te hian hla pakhat siam tur hian hun, thiamna, rilru leh sum tam tak an seng a. Internet leh social media an khawih thiam ve hmain mi ṭhenkhatte’n an lo upload avangin kan zaithiam C. Vansanga, Zorock leh mi thenkhatte’n an mahni hla ngei pawh Youtube-ah an upload thei lote hi an zahawm lutuk. Youtube leh social media kaltlanga ngenna an siamte hi zahsak a ṭha. Dan hmanga chinfel kher ngai lovin, Youtube-a phalna neilova upload zawng zawngte’n remove vek se a ṭha hle ang.

- Er. Chhungpuia Renthlei, Senior Technical Officer, NIELIT Aizawl