AW HMANGAIHNA KA HRIL THIAM LO
Mi fa duh lai leh duat em em, an nu leh paten keh thei dawm taka an dawm, an enchim lohte chu, An han tleirawl a, hmeichhia leh mipate chu, an pianphung leh kimtlang mawina chuan a inthlakhlelhtir a, An duhawmna leh ngaihnobeina zun zamah chuan, in-uai tawntirin, an inhmangaih ta em em mai a, chu hmangaihna eng mawi leh chak tak mai chu, thim pawhin a hliah zo lo a, eng anga kulhpui sang pawh ni se, a thlawh khum ta zel mai a, eng anga meipui sa pawhin a kang dai zo lo va, eng anga khâm sáng leh tuipui thuk pawh a paltlangtir ta zel mai a ni. He hmangaihna mak tak hian, an thinlung ngaihtuahna chu a luah thuk ta hle mai a, A tel lo chuan hringnun hi a kimin a hre tawh lo va, an nun tifamkimtu ni tlatin an hria a. An nu leh pa te, an thisen zawmpuite zawng zawng ai pawhin an invei ta zawk mah a ni. Vankhama pawhin, "Mim ang kan piang hmun ta si lo, Chi leh kuang kan inhnaih hek lo, I chunnu leh ka zuapa lah, Lai an innat kan hre hek lo, Engti zia nge nang mi hrang hian, Duhlai tia min koh mai le?" a tithlawt alawm. Hei hi, tu remruat nge ni ang a? Tu duan chhuah nge ni ta ang le?
Pathian thua kan hmuh angin, hmeichhia leh mipa, nula leh tlangval inhmangaihna thuk tak mai, Pathian remruat dan chu, hei hi a ni :- Tin, Lalpa Pathian chuan, "Mihring amah chauhva a awm hi a ṭha lo ve, amah ṭanpuitu tur a kawppui awm mi ka siamsak teh ang," a ti a. (Gen 2:18) Tin, Adama chuan, "Hei zet chu ka ruh ang ruh nei a, ka tisa ang tisa nei ngei chu a ni, mipa laka lak chhuah a nih avangin hmeichhia tih tur a ni ang," a ti a. (Gen 2:23) Hei hi Pathian remruat dan, nula leh tlangval inkara lo thleng ṭhin chu a ni a, mihringte dan theih pawh a ni lo a ni. Nimahsela, Mizote zingah chuan, he inhmangaihna hi theology pawn lam thilah ngaiin, rinna tidal theitu, ringtute tan chuan hawisan ngai, khawvel thil hliah hliaha ngai kan awm ṭhin ni tur a ni. Lengzem hla sak chungchangah pawh a chhuanchhe zawnga sawi lui tlat kan awm ṭhin hi, a pawi a ni! He hmangaihna hi a ni, Kristian chhungkaw dinna tur hmanraw ṭha em em mai, a bul inṭanna chu, Nupa nihna tura a ken tel tlat, Pathian remruat ril leh thuk tak mai chu. Israel Pathian hnam thlante chuan, a thukzia leh rilzia an hre chiang a, An lengzem hla pawh, Bible-ah Hla thlan khawmte tiin an telh hial a ni.
Mizo upa pawhin Pathian samsuih an tihte chu, Nipui sensa tak hnuaiah thlan tui luang zawih zawiha hnathawk dunin, an la nui dun har har thei a. Hei chauh pawh hi a la ni lo, furpui khaw hnawm, thosi leh vangvat karah pawh, an Duhtakte nen chuan hrehawm ti reng reng loin, hna an thawk dun thei a nia. He nun hi, khawi College-ah leh University-ah nge an zir chhuah a, eng finna aṭanga an hmuhchhuah nge ni ta ang le? Khawvela finna leh thiamna nei hmasa Rom mifingte hmuhchhuah em ni ang le? Amaherawhchu, he hmangaihna mak tak changtute hi, hnam tin, chi tin hnam mawl leh fingte pawh an tel vek mai a, Chuvangin, hmangaihna zun zamin a phuarte chuan he nun ze mak tak hi an chang vek si a nih hi. Hei hi hria ila, Engkim siamtu Hmangaih Pathianin ama anpuiin mihring a siam a, mipaah leh hmeichhiaah a siam a ni.(Gen 1: 26) tih a ni. Hei hi mihringte nula leh tlangval inhmangaihna lo pian chhuah dan bul zawk chu ni e.
Han thlir ve teh, zan thla eng tak hnuai a, nula leh tlangval inthlahlel em em maia kut insuih chunga muang fan raih mai a, kal dunte saw! An va hmuhnawmin an va duhawm tak em, hmangaihna thianghlim taka inhmangaihte hi, Van lam pawh khian, hmuhnawm an ti ve ngeiin ka ring a ni. Sawi thiam a harin, hril thiam pawh a har hle mai. E he! han hawi zau deuh teh, zanin zet chu, hmuh tur a tam hle mai. Saw, In nuam tak mai chhunga awmte saw, nupa tuakthar an ni ngei ang le, an va hlim dunin, nuam an va ti dun teh reng em. Hei lo liama dam lai pialral dang hi, a awm chuang dawn em ni le. "Thinlai chhum ang zing a kiang zo ṭhin, Zai nema biahthu tinkim hril dunin, Nang ang renga thinlai min hnem thiam hi, An awm lo'ng vanhnuai he lei chhinah," an ti dun a ni ngei ang le. Aw, Siamtu hian Kristian chhungkua dinna tura nula leh thlangvalte inhmangaih tura a lo ruahman dah hi, a va ropuiin, a lo va ril tak em. Aw hmangaihna ka hril thiam lo, tih mai loh chu sawi dan tur pawh ka thiam lo a ni.
- Hausanga Hauzel