Mangṭha le, ziaktu ropui...!

I ziak lawk a, khawvel i la mangṭha hun tur i thlir a; i hun chu a inher chhuak ta a nih hi! Mahse maw, keini chu ṭapin kan rûm a, nang erawh chuan engmah i hre tawh si lo. Kan tha a khur a, nguiin kan ṭap a nih hi. Mahse, khualzin, haw leh tur kan nih miau avangin heng hun hi a la thleng ang tih kan hria a, a tak thleng lo se tih erawh kan zavaia duhdan a ni reng a, a thleng a; a thleng zel dawn a nih si hi.

Kan zinga awm reng turin kan duh che a, min kalsan darkarah chiah khan ruang zuiin hmun hla tak ka pansan che a. I ruang bulah mittui far chhung chauh ka awm a nih kha. Kha mi Ni khan zin kawng khawharthlak ka zawh a ngai a, ipikna khawvelah hruai luhin ka awm a, hrehawm ka va ti tehlul em! Ka thlahna thu che hian i ruang a umzui tlai deuh tih hre mah ila; rei tak ui phu leh ui tlâk mi bik i nih miau avangin hmanhmawh lo taka nangmah sunna thu ziah hi ka inthiam lo hran lo! 

"Mafaa chanchin i hre tawh em?" "La hre hauh lo, eng nge ni ta," tia ka zawh letna thu chhanna chu, "A kal ta!" tih thu a ni. Min peih lohsan thu hmanga kaihthawh ka nih lai khan, ka ngaihtuahna hi a va vak kual nasa tehlul em! Suntu leh uitu che an tam turzia ka ngaihtuah zui nghal a, a dikzia chu vawiin i thih aṭanga ni rei lote a liamah hian a va chiang si em! 

Van aṭang khan lo en teh, i ṭhalai pui tam tak i vel a, an mittui i koh chhuah nasatzia hi. Mizoram mai ni lo, Tuipuiral a Zofate thlengin nangmah vangin an tlan khawm a, an mittui a tla a nih hi. Khatia ruang zuia ka kal khan, thingtlang khaw hrang hranga Putar te, Paho te, Nuho leh ṭhalai tam takin, "I thianpa i vui hman ta si lo," tih te, "Mafaa chu ka ui em!" tihte leh, "A la hun lo mang e aw," titein i hmingin min lo chibai hlawm a nih kha. An hmel ka en a, i thihna thu hi an va la thu tak hlawm tehlul em!

"I thu leh hla avanga Mizo mipuiin an la mamawhna che avang tal pawh hian i la dam zel a ngai, chumi tur chuan i ṭan a ngai," tia i chungchang thu ka hrilh ve lai che khan, i bawp ding lam thuthlenga hlang kai pahin "Ni e, a dik alawm" tiin min chhang a, thu tak fêin kan titi zui a nih kha. Nang meuh fuih ve khanglang tura ka insum theih loh chhan kha, i thu leh hla ngainatu he ram mipuite vang a ni tih i man thiam a, chu chuan min ti lawm a ni.

Nang leh ṭhian dangte nena "Kaphleia Memorial Trust" tia kan pawl din, ziaktu ropui, hniak tam lam zuitu hmasa Kaphleia'n, "Kan dam rei leh rei lohte hi kum te, thla te hian a hril love, kan thu leh kan thiltihin a hril ber zawk a ni," tia a lo sawi kha min kalsan darkar aṭang khan a inhril ve ṭan ta a nih hi. I thu leh hla hian kawlkil a thleng ang a, chhuan thar awm leh zel turteah pawh ring takin a la tlangau zui ngei ang tih hi bân ding lam vai meuhin ka nemnghet ngam a ni.

Ka tan i tlanchhe ngai lo a, i taksa chu bawrhsawmnain tuam mahse; i chakna sawm chhuakin i lo pen chhuak ṭhin a nih kha. 

ZONET Cable TV progra­mme atana programme pawi­mawh leh hautak zet, "HAMLET LEH A CHANG­TUTE" puala hun kan hman dawn pawh khan, i taksa a chak lo a, mi zinga awm pawh nuam i tih loh lai a ni tih hre chungin i tel kha a ṭula a ṭul miau avangin ka sawm lui che a, "Nangin i tih chuan tlanchhe thiang ka ni bik hleinem," tiin min hnem a, ka thaw kha a veng hawk a sin. I hoin anni nen hun hlimawm leh pawimawh tak kan hmang ho ta kha a nia, mipuite pawhin min hlutpui hlein ka hria. A dang pawh sawi tur ka va ngah em! I hnena ka lawmthu hi i beng hriatah ngei vawi tam sawi hman mah ila, i thlarau hnen thlengin ka lawmna thu hi sawi nawn ka duh a nih hi, i phu em alawm mawle! 

En teh Mafa, i tel loin kum thar kan hmang a ni ta reng mai! Kum thar a nih angin Mizorama chanchinbu darh zau ber Vanglaini chanchinbu pawhin zin kawng thar zawhin a khawl a tuai vir leh dawn. Zirtawpni a lo thlen apianga i thu leh hla khawvela zuang lut a, thu leh hla hmanga i awih tlei ṭhin i Mizopuite hi kan khua a va har dawn tehlul em! A phek kan keu ang a, i huang kan en ang a, chutah chuan i thlalak leh i kutchhuak ropui tak takte chu kan hmu tawh lo ang. Zirtawpni chhuak tur Vanglaini chanchinbu lo thlen leh hun hmasa ber hi ka va hmu huphurh tehlul em! Mahse, ka lo inti pachang ang e.

Hei hi ka thlahna hmasa che ni phawt rawh se. 

Mangṭha le, ziaktu ropui!