Sorkar thar kan beisei sang

Pathian kaihhruai­na zarah kumthar kan lo chuangkai leh ta a, MNF sorkar thar kan nei bawk a; kan sorkar thar lakah mipuiten beiseina sang tak kan nei a. Zoram mipuite tan an hnathawh tur chu kan lo thlir reng dawn a ni. 

MNF sorkar hma khan mipui tana an hnathawh tur engemawzat an ziak a, chung zingah chuan mirethei khaichhuahna tura an duan Social Economics Depelop­ment Programme (SEDP) an tawktar a, Congress sorkarin NLUP a kalpui a, cheng nuaikhat an tawktarh laiin SEDP chu nuaithum an tawktarh a ni. 

Chu chuan sorkarna a chantir a ni pah a, miretheite'n kan lo thlir reng dawn a, mirethei chhanchhuah nan he SEDP hi an hman ngei pawh beisei phawt mai teh ang. 

Chief Minister thar Pu Zoramthanga chuan an sorkarin Congress sorkar hnathawh chhunzawm tlak an chhunzawm tur thu a lo sawi tawh a, kha 

ṭawngkam mawi tak kha mipuite pawhin kan lo thlir reng dawn a. Sorkar hmasa hmalakna titawp mai loa hmalakna ṭha an chhunzawm tur chu ram leh mipuiin kan nghakhlel hle a ni. 

Aizawl traffic jam tih ziaawm nana kawng chhawng an siam tur pawh mipuiin kan nghakhlel viau mai, engtin tak kalpui ang maw. An sorkar hmasak hunlai khan Upper Khatla Sabinga Lungphun bul aṭanga Khatla kawn chunga kalin Assam Rifles gate bul vela chhuak tur kawng chhawng (fly over bridge) rua­hman a ni a, khatih laia Defence Minister George Farnandes-a khan a lungphum a rawn phum thlak a, mahse a chhehvel khawtlangin an duh loh avangin a pamṭul ta kha a ni. 

Tuna kan CM zahawm takin kawng chhawng siam a rawn sawi thar leh hi dodal (object)-tu an awm leh ngei ngei dawn tih a chiang reng mai. Engtin tak sorkar hian kalpui ang maw... 

Traffic jam tih ziaawm nan kawng chhawng chu kan mamawh viau a, CM-in a mitthla anga kawng chhawng kan neih phawt chuan traffic jam chu a ziaawm ngei tura rin a ni a, hei pawh hi mipuiin kan nghakhlel em em dawn a ni.

Kan Chief Minister mai bakah Minister fel leh viak ṭha tak tak kan nei a, ni reilote sorkarna an chan aṭang khan hman an la nghal char char a, kan Minister-te hmalakna hi kan lo thlir reng dawn bawk a ni. Minister hmasain department hotute nen ruahmanna an lo siam tawh pawh a pawnga puia hnualsuat mai loin, her rem ngai her rem hreta ruahmanna ṭha tak kalpui theih a rinawm a, chumi tur pawh chuan kan lo beisei sang hle.

Kum 10 Congress sorkar kan hrawn ta a, tunah MNF-in hneh taka sorkarna an rawn lak taka chuan Congress sorkar tih dik loh a lo awm pawhin hailanga in­tihmualpho ringawt tum loa siamṭhat ngai siamṭhaa hmalakna ṭha zawk an kalpui i beisei phawt mai teh ang u. Mizoram hi Mizote ta a ni si a.