ZOFATE NGAIHLAI BANGLO CHUNNU Pi Lalsangzuali Sailo (L)

Rawlthar mai ka la ni a, Pi Lalsangzuali Sailo ai hian ka nu khan chatuân ramah min kal san hmasa zawk a, vawin ni thleng hian a hla ka la ṭahpui ṭhin chu, ‘Thiam zir tûrin thlangkawrvaia'n min lo tir e, kei ka chûnnu rihsang mual liam hnu ka ngai e, han dawn ve teh, i hrai riangte ṭahlai ka bâng thei lo,’ tih kha a ni.

Kan hnam tana a hla min hnutchhiah zozaite hian khawvel hi Pathianin a tihboral hma loh chuan kan sa ang a, kan sa reng dawn a ni. Mi ṭhenkhat ang rilru pu chu ni se la, zawlnei a inti hialin ka ring. Kan ṭhalai nun a thlirin a hmu fiah a, ruihhlo avanga nunna hlu tak kan chân nasatziate hlain a lo phuah chhuak dîm diam a. He hla mawlh mai hian kan hnam ral mek a phawk chhuak chiang mang e aw:

Setana dawihlo, kan ram hmelma lian,

Dawibûr kengin maw a vâk vel ruai a,

Ṭhalai hmel mawite tihmelhem zotu,

Zofa dawntuai a man a rap thlak e.

Sakruang kimtlang mawi,

thisen zûnzâm nên,

An chiu chhe zo maw, mi â an chang ta;

Thatchhiat, thinchhiat dawtsawi,

bumtu rukruk te,

Thlanmual leh hremhmun panin

an tlan mek e.

Heti taka ruihhloin kan ṭhalaite nun a suat mek a. Chhungkaw nu ber fate kilkhawi hman lo lekin, kohhrana an inhmang a, Pathian rawngbawl bik ta riaua an inngai a. Kohhrana inhman hi a ṭha lo ka ti lo ve, fate enkawl hi Pathian laka rawngbawlna pawimawh leh sang ber a ni tih hi i hre thar mawlh ang u.

Engmah a him lo, an chântir sumpai,

An râlṭi zo ta, i chun leh zuapa;

An thlir che maw hmangaihin,

i siamtu Lal nên,

Taksa thlarau thih hlenna pumpelh rawh.

Kan inkhawm a, kan ṭawngṭai a, a ṭha lutuk e. Kan rila rah, kan fate thlarau nun thlenga hremhmun pana an kal mek lai hian kan en liam zel dawn em? Lalpa’n fanau malsâwmna min pek aia thil dang, pawn lam mawina kan zawn luata kan mawhphurhna kan hai leh ṭhin a nih hi.

Chhungkua a na e, khawtlang a dam lo,

Ram pum a dam lo, kan ral zel ni tin;

Kan hmelma doral a huangtau lua e,

Ṭhian chhan thih ngam

Mizo fa thawh a hun e.

He ruihhlo chimawm zet hi, sorkhar nena kan ṭan rual a, khaw tin veng tin YMA na taka kan kalpui a ngai ta. Kut inthlak leh ngawt ṭhin hian a veng him zo lo va, a bul ber ruihhlo zuarte laka hian tun aia na zawka action lak a hun ta. Sorkhar muhil tho se la, tlawmngai pawlte’n mutmawh hnarmawha kan neih a hun ta e.

Ruihhlo zuartu aw, lo ngaithla lul teh,

Chungkhuanu leng leh zaleng i bum lo;

Kan ram, kan hnam hmelma

i lo ni nang ngei kha,

Eizawnna dang dap la i hlim zawk ang.

Ruihhlo zuartu, vawi khat chauh rilru fimin lo ngaihtuah ve ta che. I hnam, i ram hian a mamawh che a, chu chu khua leh tui ṭha ni turin a ni. Nang lo chu he ram hian chhuan tur a nei chuang lo asin. Kan lo tihsual tawh chu siam ṭhat leh theih a ni tawh lo va, mahse, vawiin a ṭangin, nun bul ṭan ṭha la, Lalpa’n hun ṭha min la pek lai hian ei zawnna dang dap a him zawk asin.

Aw le, Zofate Nu, i kalsan i ram leh hnam, i tu leh fate inhnêm tûr chuang kan awm lo va, i sulhnu leh i hmun ruak hi he khawvelah luah khattu an awm ngai tawh lo vang. I rin chhan Pathianin min awmpui ang a, kan hriat rengna che ata erawh thlân kan thleng hma loh zawng a reh lo vang.

Chuailo par pawhin chuai ni a nei a, kumtluang par pawhin kumtluang a daih lohna khawvela cheng kan ni si a. Lusun chhungte hnêm ṭhintu pawh hnem ngaiin kan awm a, vuitu pawh vui liama an awmna hring chan chhung hi a va rei lo êm. I hmangaih kuta i kaih ṭhin i tu leh fate, i hnam hian mittui nên kan thlah liam che a ṭul si. Hei hi a ni hringnun chu.

An châwl an chêng reng tawh ang. Hmangaih Lalpa chu fakin, chatuan thlengin an hlim fo ang a, a thla hnuai daihlim nuamah chuan, hrehawm lungngaih reng a hlau lo'ng, vân ṭingṭangte tumin, vân kawtthler an fang rual Lal Krista hoin, tih zingah i tel ta. Keini pawh kan la rawn kal ve ang.

- Zothansanga

Chhiahtlang Kawnveng.

Ph : 9612333536