Central 8th Pay Commision din tawh

Central 8th Pay Commission chu November 3, 2025 khan Gazette Notification hmangin din a ni tawh. Chairperson Justice Ranjana Prakash Desai, Member Secretary Pankaj Jain a ni. Pay thar hman ṭan hun tur chu January 1, 2026 a ni. Pay & pension revise vek a ni dawn a, Commission hian stakeholder meeting a nei chho mek. Employee union, pensioner body te nen salary revision, fitment factor, allow-ance an sawiho mek a ni.

Commission hian report pe turin thla 18 hun an nei. Nov 2025 aṭanga chhiarin May 2027 velah report a chhuak ang. Hlawh pek hun hi report submit hnua Cabinet-in a pawm chauhvin pek chhuah a ni ang. A takah chuan 2027-ah hlawh thar an la dawn tihna a ni. Mahse, January 1, 2026 aṭanga retrospective-in arrears an pe dawn a ni.

Hlawh pun dan tur ruahman

Union-te’n 3.83x an dil mek a, govt lam aṭang chuan 2.6–2.85 vel a ni mai thei. Minimum pay tunah Rs 18,000 a ni a, 3.83x a nih chuan Rs 69,000 thleng a pung thei a, 2.6x a nih chuan Rs 46,600–57,000 vel a ni ang. Pension chu minimum Rs 9,000 a ni mek a, Rs 22,500–25,200 velah a pung ang.

DA hike Pay Commission nghah lai pawhin DA 2% hike April 2026 aṭanga pek a ni. Central govt employee-te hian 8th Pay Commission an la enjoy lo. January 1, 2026 aṭanga hman ṭan tur ni mah se, hlawh thar tak tak chu 2027-ah report a chhuah hnuah arrears nen an la ang. Tunah chuan 7th Pay Commission hlawh + DA an la la mek.

Mizoram state sawrkar hian 8th Pay a la hman ve ngei a ngai dawn a, mahse, tuna Mizoram sum dinhmun thlir erawh hi chuan a harsa viau dawn niin a lang.

Mizoram Budget 2026-2027 chu March 17, 2026 khan passed a ni a; vbc 17,469.91 a ni a, supplementary demand for 2025-26 vbc 3,724.25 a awm bawk. 2026-27 Mizoram budget pumpui cheng vbc 17,076.92 aiin kan leiba tlingkhawm tur pharh tel vbc 19,085.15 chu budget aiin vbc 2,008.23 zetin a tam zawk.

Hetiang hi state sawrkar dinhmun mek a nih avangin state sawrkar hnathawk leh pensioner te tan 8th Pay beisei hlawhtlin a huphurhawm dawn hle tih chu thil chiang sa a ni. Tun hnaia DA 4% leh 2%-a tihpun tâkte pawh kha phurrit a tling pha a. 8th Pay phei chu kum 2030-2035 FY velah hman a ni ve mahna tih chu suangtuahna inmun mek a ni. Ministry kal tawh zawng zawngah ZPM Ministry hnuaiah hian hmeithai zinga ‘englo’ zawn ang maiin sum lêngvâk a la vâng ber niin Zoram mipuite titi tui ber a tling mek lehnghal a. Chuvangin, state sawrkar hian state tan sources of income siam dan tur a ngaihtuah ran a pawimawh hle.

- Dr. C. Lalrampana