VAWIIN

Pathian thil siam tam zawkte hi chu zingkar hma takah an tho ni ngei tur a ni. Chung zingah chuan hlobet leh thlai hring, pangparte leh sava, nungchate an tel ngei ang le. Hla phuahtu pawhin, "Zingah savate’n Pathian an fak a, pangparin a ropuizia a lantir fo, a thil siam zawngin amah an chawimawi, mihring chauh lo chu zirtir an ngai lo," a tia lawm.

Vawiin hi ṭangkai taka hman kan tum chuan zing karah hma taka thoin, bul kan ṭan ṭhat a ngai a ni. Chumi atan chuan thilsiam dangte chu an inbuatsaih ṭha hle mai a. Thawh pawh an tho hma a, thawh phan tûm beu buau pawh nei ve loin, sava leh thereng, rannung tereuhtê tê, thing kung leh leia awmte pawh, awrâwl chhuah chite chu an zing tho hi Pathian fakin an zai nghal chuah chuah mai a, an awte lah chu zing tho hlim ni mah se la, han râng deuh pawh awm loin, a fiah fai em em mai a ni.

Thufing chuan tihian min hrilh a, "Nang thatchhepa, fanghmir tih dante chhût la, fing rawh," (Thuf 6:6) a ti a. Vawiinah hian fanghmirte chuan eng thil nge an tih bik a, keini hian, kan zir tur chu ni ta ang le? Ngun takin i’n ngaihtuah teh ang u aw. Fanghmirte chuan an zing thawh hlim aṭangin an hna chanpual ṭheuh chu an thawk nghal mawlh mawlh mai a, an hnathawhpuite zingah ṭanpui ngai an awm chuan an ṭanpui zel ṭhin a ni. Vawiin hi an chhungkaw tan a ṭangkai thei ang bera hman an tum ṭheuh a. An taksa mamawh chauh an eiin an in ngei ang le; an tana ṭha lo tur chu an eiin an in miah lo ang a, ruihhlo te, zuk leh hmuam lam chi reng reng chu an tih hmel loh hle a ni.

Tin, sava leh phengphehlep te nen pangpar zu a tlanho dial dial ang a; he pangpar zu hi in dan tawk an thiamin, ni leng lengin zu hmunah an tâp ve lo ang. An zu inpuite hnenah phakar an chhuah lo ang a, mi dangte aiin an duham bik lo bawk ang. Heng an pangpar zu tlanpuite hnenah hian, an hnathawhpuite leh an chhungte pawh an rel ve zut zut miah lo ang. Vawiin hi a ṭha thei ang berin hman an tum ngei ang le. Chuvangin, vawiinah hian fanghmirte nunah mihringte hian zir tur kan va ngah tak em.

Hla phuahtu pakhat pawhin, "Pangpar angin ka chetzia lantir ang che," a ti bawk a. Vawiinah hian pangpar hi engtin nge a chet bik ang aw? A chezia chu ngun takin i thlir teh ang u hmiang. Pangpar chu zing kar hma takah a mawina famkima inbelin a tho ang a, a rim tui tak chu a chhuah rim nam chem chem ang a, nungcha tinrengte in turin a zu thlum em em mai chu a chhawp chuak liau dawn a ni. A duh apiangin a thlawnin an in luai luai ang. Vawiin hi a theih ang angin mi dangte tan luang chhuakin a inpumpek tawp ang a, mihringte chenna in leh biak in chhung leh a vel chei nan pawh a inhlan thei a, an dahna apiangah phunnawi loin a awm char char mai ang.

Pangpar chu mo lawm nan leh mitthite tan pawh, lawmpuina leh tuarpuina hmanrua atan a ṭang thei ve ve a, mi rethei inah leh mi hausa inah a mawi dan pangngai rengin a mawi ang. Mi rethei leh mi hausa a thliar ve ngai reng reng lo a ni. Ni lo chhuak chu tlang sang tial tialin, ni chu sa hle mah se la, phunnawi loin a tuar tluan chhuak zak mai ang a, thlipui leh ruahpui pawhin rawn nuai mah se la, inhumhimna zawng buai lovin a tuar mai zel ang. Amah tihnat tumtute lakah pawh tlanchhe loin a dawh mai ang a, thih thlenga Siamtu tana rinawmin a awm ṭhin a ni.

Heng thil siam pahnihte aṭang hian vawiina kan nun dan tur zir chhuah i’n tum teh ang u aw. Vawiinah hian tih ngei ngei tur kan nei laiin, tih miah lo tur kan nei tih inhria ila, vawiinah kan sawi ngei ngei tur a awm laiin, kan sawi miah lo tur pawh a awm a ni. Vawiinah kan ei leh in ngei ngei ngai a awm a, kan eia ka in miah lo tur pawh a awm. Vawiinah hian kan hmuh atana ṭha a awm a, kan hmuh atana ṭha lo pawh a awm a; vawiinah kan hriat atana ṭha a awm rualin, kan hriat atana ṭul lo pawh a awm bawk ang. Chuvangin, unau duh tak, vawin hi fimkhur takin hmang ang che aw.

- Hausanga Hauzel