HUMAN GENERATION (Radio atanga Artificial Intelligence Khawvel)
"Ka puin radio a ngaithla. Ka pain television a en. Keiin computer hmangin internet ka browse. Ka fate chuan an hriat duh smartphone-in artificial intelligence an zawt."
He thu tawitê hian kum za chhung lek pawha technology khawvel leh mihring nun inthlak danglam nasatzia a sawi fiah hle. Radio aṭanga artificial intelligence (AI) technology hmasawnna hian mimal, chhungkaw nun, kohhran, khawtlang leh sorkar inrelbawlna a thlak danglam nasa hle. Mizoramah pawh generation hrang hrangte hi tunah kan la khawsa ho vek a, generation tinte hlutna leh an hun laia thil thlengte hriatsak hi lungrual taka khawsak ho nan a ṭul hle.
1. Silent Generation (1928–1945): Computer leh digital technology awm hma lama piang an ni. Senior citizen kum 80 chung lam an ni fur tawh. Typewriter, radio leh black & white television te hi an hun laia technology larte a ni. An hun laiin electric an hnianghnar lo va, radio hi hriatna bul ber a ni. World War II leh India independence an hre pha a, an hun tawp lamah digital khawvelah an cheng ve chauh a, tunlai technology an man pha meuh tawh lo. Harsatna tuar thei, taima, Mizo nun mawi vawng nungtu generation an ni. Tunlai mite angin an ngaihdan an sawi chhuak zen zen lo. Thuneitute zah thiamin ngawi rengin an thu an zawm ṭhin avangin Silent Generation an ti. Kohhran upa min, chhungkaw lu leh khawtlang hruaitu hlun ber an ni.
2. Baby Boomers (1946–1964): World War II zawh hnua khawvela nau piang an pun nasat laia piang an nih vangin Baby Boomers an ti. Tuna kum 62–80 mite hi an ni. Television leh moon landing generation an ni a, America an ngaisang hle. Mautam leh Mizoram buai an tuar nasa. Discipline leh community spirit an nei ṭha a, YMA, kohhran leh khawtlang hruaitu hmasate an ni a, kan khawtlang dinhmun siamtu pawimawh tak an ni. Colour TV, audio cassette, cinema en hmasatu an ni. WhatsApp hi modern technology an hman thiam a ni a, chhungkua leh ṭhiante nêna inbiak nan an hmang uar hle.
3. Generation X (1965–1980): Tuna kum 46-61 mite hi an ni. Hming hranpa an nei lo a, X (Unknown) an vuah. Analog leh digital khawvel inkâr generation an ni a, Mizorama cinema, smart TV, computer leh mobile phone hman ṭan hun an hre pha vek a, radio aṭanga internet leh AI thleng an hre phak. A taka computer, internet, e-mail, mobile phone, etc hmang hmasa ber generation an ni. (1970s–1980s)-a cassette player, black & white TV leh typewriter lar hun lai (1980s–1990s)-a Mizoram state kan nih hun (1986), (1990s–2000s)-a Mizorama computer zirna bul ṭan hun leh cable TV, colour TV, VCR leh walkman lar hunte an hre pha vek. Generation vannei ber tiin an sawi ṭhin. Office leh mimal hnathawh nan personal computer, Windows, mobile phone, email, internet & social media an uar hle bawk. Kum 2000 aṭanga vawiin thlenga technology chhuak tharte an hmang ṭangkai hle. Tunlaia office, school, college, YMA leh kohhran hruaitu tam berte hi an ni.
4. Millennials (1981–1996): Internet leh social media generation an ni a, tuna kum 30-45 mite hi an ni. Kum 2000 (millennium) velah an vanglai hun a thlen avangin Millennials an ti. Technology-ah tawnhriat an ngah hle: (1980s-2000s) computer, video game, CD player, internet leh mobile phone te, (1990s-2010s)-a Google leh social media revolution Yahoo, Facebook te, SMS, Orkut, Facebook, Blogging hmang uar ber berte an ni. Internet, Google, Facebook, smartphone leh Wi-Fi hmang uar berte an ni. Ddigital khawvel siamtu pawimawh tak an ni a, e-Commerce, online banking leh smartphone pawh an hmang thiam hle. Tuna teacher, doctor, engineer, entrepreneur leh ṭhalai hruaitu tam berte hi an ni.
5. Generation Z (1997-2012): Tunlai tleirawl leh ṭhalai rual kum 14-29 inkar, digital khawvela piangte an ni. Generation Y chhunzawm nan Generation Z an ti. Smartphone leh internet awm hnua piang an ni a; Mobile-First, Social-First Generation an ti bawk. Internet leh smartphone khawvelah an piang a, computer, smartphone, internet leh social media platform -Facebook, WhatsApp, YouTube, Instagram te hi an tan thil thar a ni lo. Social media hrang hrang an hmang nasa a, an zirnaah pawh e-Learning apps, coding bootcamps leh Gamified Education te an hmang tam. Thu chhiar aiin visual content, a bik takin meme, reel leh short video te an ngaina zawk. An nunphung chu social media, mobile applications, e-commerce leh digital payment-ah a innghat nasa hle. AI tools, influencer, online shopping, gaming leh cryptocurrency ten an chiah hneh hle. Privacy leh personalization an ngai pawimawh. Social media pressure, fake news leh screen addiction te pawh an hmachhawn nasa. Tunah hian college student, young professional leh youth leader ṭangkai tak an ni.
6. Generation Alpha (2013-2024): Generation Alpha hi ‘AI Generation’ an vuah. An pian tirh aṭangin smartphone, tablet, voice assistant leh AI an ban phakah a awm. An naupan lai aṭangin robotics, virtual reality (VR), augmented reality (AR), smart toys, YouTube Kids leh online classroom-te an hmang nghal a, an lifestyle chu digital a ni. AI assistant–Alexa, Siri te nên an inbe thei a, Roblox leh Minecraft te an khel a, homework tihna atan pawh AI chatbots an hmang. Generation Alpha te hi Metaverse, Web3 leh automation khawvelah an puitling dawn a, digital leh AI khawvela kan future siamtu pawimawh berte an ni.
7. Generation Beta (2025-2039) Human + AI Generation: Tuna nausen kum 1 leh a hnuai lamte hi an ni a, a tam zawk chu an la piang lo. Artificial General Intelligence (AGI) leh Quantum computing hmasawnna kara piang an ni a, mihring leh AI inpawlh generation an ni. AI teacher, AI doctor, smart city, driverless vehicle, AI classroom, smart agriculture, smart healthcare leh digital government, etc an hmachhawn dawn. Technology thiamna nen fimkhur taka enkawl an ngai ang.
Thurawn:
Mizoramah hian generation hrang hrangte hi chhungkaw khatah, kohhranah, office-ah, political party, kohhran, NGO leh khawtlang hmalaknaah kan awm ho vek a; generation gap vangin harsatna a thleng fo. Kan hun laia kan tih dan kha a la ṭha ber e tih ngaihdan pawm bur a, ṭhangthar mila inher rem duh miah lo te, aia upate mâwl leh ṭhing ti em emte hian generation inkâr an tichhe fo. Fing zawk nih inchuh aiin inzahtawnna leh inzirtir tawnna hi generation gap siamremna ṭha ber a ni.
Silent Generation leh Baby Boomers ten nunphung, zahawmna, kohhran nun leh harsatna hmachhawn dan an hre chiang. Generation X leh Millennials ten leadership, administration, computer leh internet an thiam. Generation Z leh Alpha ten smartphone, social media, AI leh digital technology an hmang thiam. Chuvangin, generation pakhatin a neih loh chu generation dangin a nei tih hriat a ṭul. Chhungkua, office, kohhran leh khawtlangah experience leh innovation, discipline leh digital skill te a inkawp rem chuan thawhona ṭha leh hmasawnna a awm ṭhin.
Mizoram hmasawnna hi generation pakhat chauh siam a ni lo. Silent Generation-in bul an ṭan a, Baby Boomers-te’n an tiphuisui a, Generation X-in an kaihhruai a, Millennials-te’n an digitalize a, Generation Z-in an chak takin kalpui a, Generation Alpha leh Beta ten an rawn chhunzawm zel dawn. Chuvangin, generation hrang hrangte inel lovin, inzah tawnna, inhriatthiamna leh inzirtir tawnna nen kan khawsak ho thiam chuan hmasawn duhawm tak kan hmu ang.
- Er. Chhungpuia Renthlei, Senior Technical Officer, NIELIT Aizawl