Opposition party-te leh Mizotaxi app
Mizoram Transport Department ruahman angin NIT - Digiride Technologies Pvt. Ltd ten an siam Mizotaxi online application chu hman ṭan a ni ta niin a lang. Tun hnaiah taxi ka hman loh avangin eng ang takin nge an zawma zawm loh tih lam chu ka hre lo.
Mizotaxi apps-ah hian taxi chi hnih leh auto rickshaw an vaiin sang khat vel chu an inziak lut tawh niin an sawi. App download tawh chu 13,000 chuang an ni âwm e.
Thuneitute sawi danin, Mizotaxi apps hmannaah hian lirthei hman man aṭangin platform fee 6% lak a nih tur a ni a, platform fee chu minimum Rs 5 leh maximum Rs 10 a ni. Platform fee hi app siamtute hnena lut tur a ni a, chumi piah lamah chuan app aṭanga hlâwkna a awm a nih chuan Transport Dept leh NIT ten zat leh zatin an insem dawn a ni.
Transport Director chuan, Mizotaxi app atana registration fee leh platform fee chu sorkar sum báwma lut tura lak a ni lo a, app inenkawlna atana lak a nih thu a sawi.
Mizotaxi app hi mipuiin commercial passenger vehicle (mihring phur chi sumdawnna lirthei)-ah hman man sawrkarin rate a siam ang tak an chawi theihna tura ruahman a nih thu sawrkara hotu lamte chuan an sawi ṭhin. Aizawla taxi-te hi rate dik tak aia sang fêa an tlan ṭhin avangin Mizotaxi app siam a ni hi lawmawm ka ti hle. Lirthei neitute leh khalhtute'n hun rei tak chhung anmahni hmangtu mipui an lo rawk tawhna tihtawp theihna tur hmanrua a nih avangin mipui tan chuan a lawmawm em em a ni.
Opposition party lam lah erawh chuan Mizotaxi app chu sawrkar sawisel nan an lo hmang ve mek thung. Opposition party hruaitute hian India rama taxi/cab app hman lar Uber, Ola, Rapido, tihte hi an hmang ve tawh ṭhin ngeiin ka ring a. Taxi/cab neitu/klahtute'n app neitu (Uber, Ola, Rapido, etc)-te hnenah bithliah sa angin pawisa an pe ṭhin a ni tih pawh an hre ngei ang.
Uber, Ola, Rapido, etc ah platform fee a awm ṭhin tih hre chungin, Mizotaxi app platform fee chu an sawisel bik ta tlat a; 'chhiah' ti zawngin an sawi lui tlat zu nia! Hei hi chu 'sawrkar hmalakna sawisel an tum hrim hrim vang' tih bak chu chhan dang a awm thei lo.
Taxi neitute thlavâng hauh ni âwm takin an ṭawng chhuak a. Mahse, taxi hovin hun rei tak rate aia sang fê fare laa mipui an lo rawk tawhnaah hian mipui thlavâng hauha taxi pute dema vawi khat pawh an ṭawng chhuah ka la hre lo. An ti mak hi ka ti ve thlâwt a ni. Taxi pute chu political party an ni ve lo a, sawrkarna siam an tumnaah an khingpui leh elpui an ni ve tlat lo alawm.
Opposition party hovin Mizotaxi app avanga sawrkar an beihnate hi taxi pute duhsak vang ni lovin, sawrkar beih an tum ngawr ngawr vang a ni tih hi ka ngaihdan nghet tak a ni.
- Zoramchhana