KHAWTLANG HMASAWNNA ATAN

India hnampa Mahatma Gandhi khan “Greater the power of Panchayats the better for the people,” a ti a; a awmzia chu khawtlâng inrelbawlna chak zawk hi mipui tan a ṭha a ni, ti ila kan sawi sual tampui awm lo ve. Tunah phei chuan sorkar laipui ruahmanna angin village council ṭhuthmun apiangah Gram Panchayat Development Plan (GPDP) hmangin hmasawnna hna thawh mek a ni a, self-help group (SHG) buatsaih Village Prosperity and Resilience Plan (VPRP) pawh GPDP-ah hian bilhluh tur a ni nghe nghe a ni. GPDP kalpui danah hmasawn zelna tur tam tak a la awm bawk awm e.

Kan ramah hian pi leh pute aṭang tawha khaw tin mahni ram chin nei, chumi chhunga ram leilung pianken hausakna te theih ang anga humhalh ṭhin hnam kan ni a. He kan kalphung hi awmze nei zawka kan khawtlâng hmasawn zelna atan leh khawtlângin hma hun ṭha a neih theihna tur leh GPDP tiphuisui turin Village Forest Landscape Management Plan (VFLMP) hi khaw tinin nei thei ila, tih hi rawtna ni ta se la. VFLMP hmang hian a neitu thliar chuang lovin village safety reserve, supply reserve, YMA park, khawtlâng ramngaw humhalh dang, lo hmun (jhum area), mimal ram, thlai chinna hmun, mau hmun, phûl hmun, lui lian, lui tê, tui hmun hrang hrang (wetlands), mihring chenna hmun, leimin hlauhawmna hmun, etc. te enkawl tur a ni dawn a ni.

VFLMP hian ke hrang hrang a nei thei ang a. Pakhatnaah chuan, khaw ram china ram hausakna (resource inventory) hi GPS (Global Positioning System) leh GIS (Geographic Information System) hmangin chhinchhiah a, map pawh siam tur a ni a. He resource inventory-ah hian ram pum zau zawng, ramhmul khuh chin, mau hmun, lo hmun, mimal ram, khawtlâng/vantlâng ram (community forest), tuihna awmna, nungchate chen tamna, rambua, leilung luan ral chakna hmun, leimin hlauhawmna hmun, ram kâng chhuah hlauhawmna, etc, tarlan a ni dawn a ni.

Pahnihnaah chuan, khuain ram thlêng a neih chu a enkawl dan turah bithliah (zone) hrang hrang siam leh tur a ni.

1) Conservation zone — hei hi tuihna, awih bakbahai leh kham, ramngaw ṭha bik leh nungchate chenna humhalhna tur a ni a, hemi zone-ah hi chuan rikrum thilah lo chuan thing kih thlenga khap tlat ni se la.

2) Sustainable forest use zone — he huang hi chu awmze neia ram chawhmeh leh thing ni lo châkkhai dang lakna hmun, mau lakna hmun, khuai lakna hmun, chakai/chengkawl/sangha khawrhna/manna hmun, ramhmul damdawi lakna hmun, thing tuah lakna hmun, etc. a ni dawn a ni.

3) Jhum management zone — hei hi lo atana ṭheh thin ram enkawlna tur niin, ram bawh dan hunbi chhinchhiah thlap a, leilung luang ral chak lo tura chângkham uar inzirtir zel ni se la.

4) Agroforestry zone — hei hi chu mimal huan/ram bikah kalpui a remchang ang a, thei kung, thing, mau, hmunphiah, ran chaw (fodder) leh thlai dang a remchan dan anga chin kawpna hmun tur ni ta se la.

5) Restoration zone — hei hi rambua tak, ram ṭha pangngai taka siam leh tura enkawlna hmun tur a ni ang.

Pathumnaah chuan, khawtlâng/vantlâng ram mi tinin awmze neia an chhawr ṭangkai theihna turin VC-in Gram Sabha thutlûkna behchhanin inkaihruaina emaw, dân emaw a zam tur a ni a. Ran tlattir dan tur te, thingtuah lak dan tur te, mau lak/sah dan tur te, thing (timber) lak dan tur te, etc. ruahman tur a ni.

Palinaah chuan, tuihna humhalh hi nasa taka kalpui tur a ni a, a ruah dawn thlêng pawimawh lai humhalh a, chutah chuan thing kih leh ram tihkan phal loh bur tur a ni a, a theih phei chuan hung chhuah vek a ṭha a ni.

Panganaah chuan, ram kâng tur ven chungchangah Mizoram (Prevention & Control of Fire in the Village Ram) Rules, 2001 behchanin village council-te’n kum tin ruahmanna fel tak siam thin tur a ni.

Paruknaah chuan, khawltual mite’n anmahni hman tur vantlâng/khawtlâng ram aṭanga thing an zai dan turah hian ruahmanna fel tak siam a pawimawh a. Hei hi thing zai tur awm dan azirin gram sabha kaltlangin village council-te’n ruahmanna an siam a pawimawh a, thing zai apiangte thing pakhat kih aiah thing 10 phuntir zel ni bawk ta se la. Tin, thing zai tur hi a vâng em em tawh a, chuvangin, ‘commercial plantation’ te pawh hi uar tura infuih thar pawh a ṭha awm e.

Pasarihna atan chuan, ramngaw behchhana eizawnna awmze neia kalpui tura inbuatsaih a ngai a; chumi atan chuan ecotourism, khuai khawi, pa khawi, hmunphiah, ramhmul damdawi, thiamhnâng lam, etc. kan uar thiam a pawimawh. SHG, Farmer Producer Organization leh Farmer Producer Company thlengin hemi kawngah hian kan chhawr ṭangkai thiam a ṭha ang.

Aw le, kan khawtlâng tan ṭheuha VFLMP kan neih a, chu chu GPDP chhunga kan bilhluh thiam a, kan ram leilung pianken hausaknate awm ze nei zawka kan chhawr ṭangkai theih chuan khawtlâng leh khawtual mite tan hmasawnna tlo a awm thei dawn a ni.

- A.C. Zonunmawia