MPSC hna lakah Ex-Servicemen quota-ah qualification tling lo an awm fo

Mizoram Ex-Service-men Reservation Rules, 2019 Rule 5.8-ah hian matriculate + kum 15 service nei chu group B post-ah pawh an dil thei ti a inziak. Mahse, MPSC recruitment dan nen a inkalh avangin MPSC lam hian insiam ṭhat an ngai.

Kan entawn ber Central Govt Rule-ah chuan Govt of India, Dept of Personnel & Training leh Staff Selection Commission ten an hman dan a chiang hle.

Rule 5.8 angin: "A ma-triculate ex-serviceman (which includes an ex-serviceman, who has obtained the Indian Army Special Certificate of education or corres-ponding certificate in the Navy or the Air Force), who has put in not less than 15 years of service with the Armed Forces of the Union shall be considered eligible for appointment to the reserved vacancies for ESM in Group C posts."

"For group B posts, they must possess univer-sity recognised degree."

Chuvangin, group B dila exam thei chin chu sawrkar pawm university aṭanga bachelor degree nei ngei a ngai. Diploma, ITI certificate ang hi chu an nei tlangpui a, chutihrualin, a ṭhenah chuan Diploma/ITI + bachelor degree tih a tel zel. Bachelor degree nei lo chu qualified an ni lo tih a chiang viau.

Pawl 10/12 pass + sipai graduation certificate hi group C dilna atan chiah pawm a ni. SSC/Bank/Central sawrkar hnuaia exam-ah pawh dan hi hman a ni. Group B dilna atan a tling lo a, tling tur chuan bachelor degree neih ngei a ngai.

MPSC-ah erawh a dang daih. MPSC-in ex-servicemen under graduate-te group B dilnaah a pawm tlat avangin, tun hnaiah pawh bachelor degree nei lote ex-servicemen quota aṭangin an tling fo mai. Unreserved seat-ah thi leh thau pawlh a, zan mu mang loa an beih laiin, qualification tling lote ESM quota aṭangin an lo tling ṭhin hian ṭhalai tam tak rilru a tinâ a, inelna dik leh merit system a awm lo tih a lang chiang hle. Qualification-a tling lo group B exam-ah an tling a, qualification neite’n an tuar tihna a ni.

Hei hi ex-servicemen-te thîk vang a ni lo. Ex-servicemen quota an neih hi kan lawmpui a, an chanvo chu an hmu ngei tur a ni. Mahse, chanvo pek an nih pawhin, Central-in rule a siam sa, India rama group B/C hna la bertu SSC-in an hman, fel taka a duan sa a awm a; hei hi MPSC hian zawm ve mai se, Zoram ṭhalaite min tibeidawng suh se.

Ex-servicemen-ah hian bachelor degree nei an awm chuan exam se, an tlin chuan lawm takin kan pawm ang. Ex-servicemen-ah recognised university degree nei an awm lo a nih chuan, hna kha ex-servicemen aṭang dil thei an awm lo tihna a ni ang a, unreserved lam post ruakah kaltir mai tur a ni. University degree nei lo chu form fill-up-ah reject mai tur a ni ang.

Chuvangin, MPSC leh Mizoram sawrkar hnena kan ngenna chu, ESM Recruitment Rules, 2019 hi siamṭhat leh ni rawh se. Group B dilna atan hian Central Rule angin recognised university degree nei ngei tura dan siam ṭhat a ngai a. ESM-ah degree nei an awm loh chuan quota ruak chu unreserved-ah leh mai ni se.

Ram leh hnam tana an inpekna avangin ESM-te kan zah em a. MPSC hian Central rule hi zawm ve se, dan thar siamin, group B hna ESM under graduate-te’n an dil theihna hi hnâwl tawh hrâm rawh se.

- Lallawmkima,

MPSC Aspirants Group