THE BIBLE SAYS SO!

Kan thupui atan "A ṭha zawk e thih ni, pian ni aiin" (Thuh 7:1) tih ni teh se, tun ṭum chu. Thla tam fe chhuṭi hnuah ka rawn lang ve leh ta hlawl a. Tun ṭum chu study ni vak lo, ka thil tawn leh chuta ṭanga lesson tlem ka rawn theh chhuak a ni. Pian nî hi kan lâwm ṭhîn a, thih nî erawh chu kan lawm lo viau mai, sûnna nî ni a kan ngaih avangin a hlimawm lo a ni. Mahse tun ṭumah chuan Thuhriltu-in a sawi angin pian nî aiin thih nî hi a ṭhat zawk theih dan kan lo en hlek dawn a ni.

Pian nî aia thih nî a ṭhat zawk theih dan lo en ila. Nau a lo pian hian Eden bawhchhiatna ânchhe phûrin hah taka hna thawk tur leh hrehawm taka nun a tawpa lungngai taka thih leh hmabak a ni. Pian nî aṭang khan thihna kawr ruam chuan a melh rûn sa mai. Khawvel Setana thuhnuaia kûn rengah hian thlansa phul kaiin a sur a sa hnuaiah natna hrehawm tak tak sawisaka awmin, a tawpa hrehawm taka thih kha a hmaa ruat sa a ni.

Pian nî aia thih nî a ṭhatna chhan ve thung chu, Krista Thisena silfai mi piangtharte tan chuan lâwmna leh hlimna hmun Lal Isua ângchhunga vana awmna a ni. Tichuan kan pianthar leh kan pianthar loh azirin Thuhriltu thu: Pian nî aia thihni ṭhat zawkna chu a lo lang dawn a ni. Piang thar lo tan chuan thih nî chu chatuan lungngaihna, chatuan meidila luh ṭanna a ni. Piangthar tân erawh chuan chatuan lawmna leh hlimna luhna a ni thung. An va inang lo teh lul em! Nang khawiah chuan nge i kal ang? Tirhkoh Paula chuan pian nî aia thih nî a thlan zawk zia a sawi a "... thih pawh hlawkna a ni...kal chhuaha (thiha) Krista hnêna awm...a ṭha zâwk êm êm si" (Phil 1:23,24) a ti.

Amaherawh chu thih hi thil ṭha leh hlawk zawk a nihna chu mi piangthar kan nih chu a ngai e. Keini piangtharte tan bik han sawi zel ila. Pian nî aia thih nî kan tana ṭha zawk tur chuan Bible sawi anga van lama ngaihtuahna dah mi kan nih a tul. Kolosa ringtute hnenah chuan Paulan "Chung lama thil awmahte chuan in rilru nghat tlat rawh u" a ti (Kol 3:2). Paula hi chuan a rilru hi chung lamah khian a nghat chiang khawp a, van khua leh tui a inti zu nia (Phil 3:20). Vawi khat evangelist thahnem ngai tak hian kawnga a mi tawh hnênah chuan "Unaupa, i thih hunah vanrama kal i duh em?" a lo ti chawt mai a. Chu pa chuan "E, unaupa, chuta ṭanga lo kal chu ka ni alawm!" tiin a chhang e an ti. Piangtharte khua hi chu van a ni a,"...in nunna chu Pathianah chuan Krista hnena thuhruk (hidden)in a awm si a" tih a nih kha (Kol 3:3). Thih nî hi pian nî aia a ṭhat zawk theih dan chu a thi-a kha piangthar a nih a ngai. Piangthar a nih loh chuan thihna hi hun rapthlak tak, hremhmun kawngkaa hruai luttu a ni! Mi piangthar a nih erawh chuan Lal Isua hnena luhna kawngkhar a ni.

Thih nî hi, piangtharte tan a lo ropuizia tehkhinna atan keima thil tawn ngei ka han sawi ang e. Thla sawm ngial Vellore damdawi ina kan inenkawl hnuin ka nupui duh tak Vanlalhruaii chuan June ni 20 khan min kalsan ta. Ani hi taksa lamah chuan nu âwm nêm tê, mi rilru tihnat duh lo mi, Bible chhiar peih, ṭawngṭai peih, diary ziak ve char char, kohhran Hmeichhe lama bial President etc ni ve thin, rawngbawltu/tual Upa ni lai a ni. Pasalte thuawih em êm si leh fuih thiam em em a ni a. The Layman's New Testament Commentary kan buatsaih dûn lai pawha "Nang hi chu Pathian mi ruat, mi bîk i ni a" ti hiala min fuih chaktu a ni a. Peteran "Nangni nupuite u, mahni pasalte thu thuin awm rawh u (I Pet 3:1) a tih hi zâwm ṭha pawl chu a ni ngei ang ka ti thin. A pasal hi min hmangaiha a chak loh hle hnu pawh khan kan fate hnenah "I pa kha enkawl ngun rawh u, a kum a tam tawh si, a chau khaw lo ang e etc" a ti a ti thin a. Hetiang nupui te hi chu tu pasalin nge hmangaih lo vang!

A dam chhuak dawn lo tia doctor-ten min han hrilh chuan rilru a baihvai duh hle mai. Mahse a ṭawng theih tâwp lamah chuan, a beng bula ka zawhna chu chhangin "Lal Isua hnenah thlamuang takin kal dawn e" a han tih chuan nasa takin ka rilru rihna chu min chhawk ta!

Chutiang chuan, piangtharte thihna chu khawvel hrehawm tuar tura pianna nî ai chuan a va ropuiin a va ṭha zawk êm! Hetiang hi a nih avangin piangtharte thihni chu Lal Isua hnena vana kalna ni a ni a, piangthar lote thihni erawh chu chatuan lungngaihnaa luhna a ni. Chuvangin Thuhriltu thusawi Pianni aia thihni a tha zawk a tih hi a lo dik em em a ni. Thih nîah hian insûnna lam hian kan rilru hi a luah tam zawk thin niin a lang. Piangtharte thih nî hi chuan thawmhnaw dum ni lova thawmhnaw var puan var–vanram kai nî leh hnehna nî a nih lawmna hi uar nachang i hria ang u.

IN LOVING MEMORY OF MY BELOVED WIFE VANLALHRUAII WHO LEFT THIS WORLD ON 20th JUNE 2026 AT CMC, VELLORE

- F. Lal Thanzuala, 9436141242