PATHIANNI CHAWHNU INKHAWM

Inkhawm hi a huhoa Pathian chibai kan buûna a ni. Mizote hi kan inkhawm tam tih hi sawi a awm fo va, chuti chu hnam dangte aia kan inkhawm tam zawk si chuan, hnam dangte aiin Pathian chibai kan bûk tam zawk tihna em ni ang? Kan inkhawm ṭhin hian Pathian nena kan inkarah eng angin nge hmasawnna kan neih, mahni ṭheuh inenfiah teh ang u.

Pathianni chawhnu hi inkhawm kan tlem ṭhin hle a, hei hi eng vang nge ni ang. Mi ṭhenkhat chuan, "Pathian ni chawhnua inkhawm ṭhinte hi rinnaa mi puitling chin an ni a, ti ve mai mai lo a, ti tak tak chinte an ni tlangpui," an ti fo a. Hei hi thu dik a nih chuan Pathianni chawhnuah hian han inkhawm ve teh, ringtu puitling chin inkhawmte chuan engtin nge Pathian chibai an buk a, an nunah entawn tur thilte kan nei em?

Mizorama kohhran lian ber Presbyterian kohhrana Pathianni chawhnu inkhawm hoah hi chuan, inkhawm zingah muthlu an tam thei em em a. Inkhawm zawng zawngte hi an muthlu zo vek ta a ni lo maw tih tur a ni tlangpui ṭhin a, Pathian thusawi uluk taka ngaithla an tlem hle ṭhin a nih hi. Hei hi rinnaa mi puitling chinte an nih si chuan an va buaithlak dawn ve aw, tih mai tur a ni.

Engtin nge Baibulah kan hmuh kha? "Pathian chu Thlarau a ni a, a chibai bûktute’n thlarau leh tih tak zetin chibai an bûk tur a ni," (Jn 4: 24) tih a ni. Pathianni chawhnu inkhawm boruak han thlir hi chuan, tih tak zeta Pathian chibai bûk dan tur chu a ni dawn em ni le?

Mizo Kristiante kan inenfiah a va ngai tak em. Mi hmuha mawiah kan inkhawm ve mai mai te hi a ni lo maw? Mahni tana chakai khawrh an tih ang deuhin, Pathian kan rinna kawngah hi chuan kan inrin kêp thei si lo va, mahni ṭheuh kan pawimawh. Mizo Kristiante hi rinna kawngah kan ngaihtuahawm viau a ni mai thei em?

Bible-ah hian ringtute leh Pathian inkar awm dan tur tihian min hrilh a, "Lalpa i Pathian chu i thinlung zawng zawngin, i thlarau zawng zawngin i hmangaih tur a ni.” Kristian intite chuan kan thinlung zawng zawngin kan hmangaih tur a nih lai hian runa Pathian Biak Ina Pathianni chawhnu inkhawma Pathian chibai kan bûk dan hi a dik lo deuh lo maw le. A huhoa Pathian chibai kan bûkna hmun ṭha ber chu Biak In hi a ni si a. Nimahsela, Biak Ina kal ṭhin zawng zawngte hi chuan Pathian hi thinlung leh tih tak zelin chibai kan bûk vek kher lo mai thei tih chu hriat sa a ni a. Nimahsela, rinnaa mi puitling chinte hi chuan tih tak zetin Pathian chibai kan buk tur a ni dawn lawm ni.

Mizote hi ringtu kan inti deuh vek a, nimahsela, Pathianni chawhnu inkhawm kan tlem ta lutuk hi a veiawm ta hle. Engvanga heti taka tlem mai nge maw kan nih le? Ringtu puitling intite’n kan intihthlaraumi danahte hian mite mithmuhah Isua hmel kan tihlan loh vangte a ni lo maw?

Hawh teh u, i ngaihtuah tlang teh ang u. Inkhawm tam lam ringawt ni lo hian, kan inkhawmah hian takna nen Pathian chibai kan bûk ṭheuh theih nan kan kalphung pangngai hi ṭha kan ti, ti ringawt lo hian i tidanglam ngam teh ang u. "He miteho hian an káin min chawimawi a, an thinlung erawh chuan min hlat si a. Engpawhnisela, an zirtirnaah mihring thupek an zirtir avangin an mi biak ṭhin hi a thlawn mai a ni (Mt 15:8-9) a tih ang hi kan ni hlauh dah ang e.

- Hausanga Hauzel