Inrinnia power siam ziah hi

Power & Electricity Minister hoin tun hnaiah power shutdown a tlem theih dan tur an sawiho a. Hei hi thil ṭha tak a nih rualin, Inrinnia power khaihlak ziah hi chu a ninawm a, mipui min tibuaiin nunphung a hlaihlak nasa ṭhin hle a ni.

Power line chhe reng maite hi state dang hian an neih ve awm hriat a ni lo a. Sorkar pisa chawlh apiang maia chumi khami line siam a ngai a, power pek a ni lo ang, tih reng mai hi a zahthlak ta deuh e. Mipui hian êng kan chhit leh kan hman man hi kan chawi a, a thlawna hmang kan ni lo asin.

Kum 40 dawn mahni kea ding thei tura ngaih state puitling kan ni ve ta a, chuti chung chuan châwm hlâwm state kan la ni reng maite hi a zahthlak ta. Pu Ṭhenphunga hun lai khan Tlawng lui kha khuap hman se chu power-ah kan intodelh thei tur hi a nia, a hun a tawp ta si a. Tuirial Hydel Project leh Serlui Hydel Project pawh Pu Hawla'n a tharthawh leh a, power tlem tlem chu kan thar chhuak ve hram a.

Enga pawh chu ni se, Power & Electricity Department officer-te eiruk hnem luattuk vanga power supply khaihlak a nasa tih hi mi rin dan lian tak a ni. Engineer-te thawk lai leh pension tawh hausakzia hi sawifiah thiam pawh a ni lo.

He Department-ah hian quality control a awm ve lo a, bungraw supply-tu khan a quality ṭha lo leh man tlawm zet zet a supply a, chu chu Department-in a lo pawm hmiah hmiah mai zel niin an sawi.

Heti em ema power line chhe zing lutuk hi chu eirukna a nasat vangah puh loh theih a ni lo. Engineer-te chuan material quality ṭha leh ṭha lo an hre vek turah ngai ila, chuti chunga material quality ṭha lo supply-ah ei an nei ve ngei ang tih hi mipuiin kan ring mai a ni lo, a dik viauin a rinawm.

He Department-a engineer thawk mek leh thawk tawh hote hausak dan hi veng tinah kan hmu a. Heti em ema sorkar sum kal ralah hian mawh an phur lian hle ang tih a rin theih. Thubuai hlabuaiah han la dawn ila, evidence kan neih miau loh chuan eirua puh ngawt ngam an ni lo. Mahse, Pathian in an chungah ro a la rel dawn tih chu kan innghahna lian ber a ni lo thei lo.

Power line chhiat chhan tam ber leh chhe reng mai hi a chhan chu mipui vang a ni lo, an hmanraw lei a chhiat luattuk vang vek a ni. Rate sang tak takin supplier an supply tir a, a quality ṭha lo pawh engineer-te’n an lo pawm mai a, a hlawkna chu engzatin nge an insem ang le?

Power Minister hian dik takin kan engineer chhuanawm tak takte hi han hrual na deuh teh se. An hausakna mipuiin kan tawrh reng chhan tur a awm lo.

- Lalkhirhvela