Kum 5-10 leka tluchhe rup thei turin contractor-in a sa ngam!

Mizoram sorkar hnuaia Mizoram State Project Monitoring Committee (MSPMC) chuan June ni 9, 2026 khan Directorate of Economics & Statistics building, New Capital, Aizawla mi sak chhe lutuk avanga thuam chak mêk (retrofitting) chu an endik zo ta! He building hi New Capital chhuk thlaka thui vak lova kawng veilama ding kha a ni.

An report-te ka lo hmuhin ka rilru a na hle mai a, fiah leh zuala chhiar awlsama mipui nawlpuiin kan hriat theih nan ka rawn tuihnih ve leh a ni. Khawngaihin lo chhiar chhuak teh u khai.

Engvanga thuam chak vak ngai nge

Kum 2013-2016 chhunga sak a ni a, kum 2016-ah a satu hian a zo. Building lian pui, chhawng tam leh sang tak hi kum 2021 khan basement-IV hmun ruak chu DRDO-te tan bangte pinga siam belh tum a ni a, hemi atan hian Directorate chuan MPWD-te chutiang ti turin a him tâwk em tia endik an ngen.

MPWD (Quality Control Division)-te’n 19th May, 2022 khan non-destructive test, rebound hammer hmangin concrete strength test an nei ta a. Hetah hian a ban leh a liang te endik a ni ta a ni. Endikna result-ah chuan a chak zawng tehna a tling lo ta vek a ni.

"Approved Detailed Project Report (DPR)/ Specification ang chuan concrete chak zawng hi M20 grade tling tur a ni a. Nimahsela, test result aṭanga a lan danin heng bante hian M20 an phak lo nasa hle a, M10 grade hnuai lam vek an ni. Chumi awmzia chu he building hi a chak lovin a derthâwng hle tihna a ni," tiin MSPMC chuan an report ta!

A ban leh beam dang pawh a lo hlauhawm vek

Endiktute hian a chhawng dang ban leh beam te an endik ta vek a, building keng tura a chakna zât tur a pha lo em em ta vek tih hmuh chhuah a ni. Hei hi an luah aṭanga kum 5 âwrh a ni.

A hlauhawm thu hi E-in-C, MPWD chuan Director hnenah thlenin, IS Code bituk phâk lo vek a nih thu te, M20 & M25 a tlin loh bakah, ban (Column B2 leh C2)-ah chhiat mai theihna hnuhma hmuh a nih thu a sawi bawk niin MSPMC hian an tarlang a. Mi 119 thawhna leh sorkar file pawimawh tam lutuk awmna hi chhiatrupna thleng thei renga saka luah a lo nih chu!

Hetiangte a nih takah chuan DC, Aizawl beng a thleng a, ani Chairman, District Disaster Management Authority, Aizawl District-ho hian joint inspection neiin, thuam chak a ngai ta a ni.

Contractor hi court case siamsak phu a ni thei em?

MSPMC chuan contractor-in a duh dan danin a sa mawp mawp a, sak man bill pek dawnah teh emaw, endik pawh ni lova sum pek chhuah tawp niin a lang. Hei pawh hi kalphung dik lo a ni, an ti.

Design & Specification angin a tir aṭanga sak a ni lo hrim hrim a, contractor inthlahdahzia a lang. Thawm chak (retrofit) ni ta lo se building tlusawp mai thei dinhmuna ding a lo ni. Nunna 100 chuang zet derthawngin a siam a ni. A chhante:

1) Kawng hrang hrangah tehna a tling lo.

2) A chhawng hnuai lam pahnih – Basement IV leh V te hi a tira ruahman anga sa ta lovin, a bang pin loh leh chhawng ruak an ni.

3) MPWD-in an endik hmasak khan a foundation endikin, ground level-a a bante chu lailangin a len zawng a tling lo deuh vek. Hei hian tuna thuam chakna (retrofit estimate) pawh a tihtam phah ta a ni.

4) Hetianga project lian thuam chak leh chûk cûuk ngai hi thil thleng khât tak a ni.

Tu nge contractor

He building hi kum 2013-14 ah sak ṭan niin sawi a ni a, a satu hi Pu Robert Romawia Royte, MLA ta nia sawi ṭhin North East Consultancy Services Pvt Ltd (NECS) a ni. Original Structural Drawings a awm a, Architectural Drawing erawh MSPMC-in an endik ni hian hmuh tur a awm lo. Nodal department i.e. Economic & Statistics Directorate hian an kawl loh thu an sawi. Completion Drawings an nei lo bawk. Hei hi thil mak tak a ni a, thuneitute (authority) ngaihah pawh a dik lo va, sawrkar (department) tan pawh a mualphothlak a ni.

AG lamin hna chhia tih a tarlang

Accountant General (AG)-in 'sub-standard work' tiin NECS hna hi comment an pek thu report dawn a ni. 9th June, 2026 thlengin AG (Audit) para hi chinfel a la ni lo. Audit remarks hi a nih ang angin (verbal-in) he Inspection Report-ah hian tarlan a ni. He building sak a nih danah hian thil dik lo leh pawi tak a awmzia chu he Audit Remarks pawh hian a nem nghet a ni.

Hei hi kan rama thil thleng a ni a, kan ngawihbopui mai mai dawn em ni!?

NB: He thuziak hi document behchhan vek a ni a, document dik tak pawh a awm vek e.

~ Theo V. Kawilam, Freelancer