LAWM HLAWH LO ZIAKMI

Kan Mizo pa chhuanawm RK Lianzuala khan ti hian a lo ziak a, "Mi tam tak chuan, 'Aw, — e' tih theih zel hi mi ṭha nihna emaw kan ti ṭhin hian ka mang an ti-ang ngawt mai, ngaihdan nei lo emaw, sawi tur hre lo hrim hrim kan nih chuan thu hran ni se, a hnua phun leh tur siin a sawi hun laia ngawih hi mi ṭha nihna niin ka hre lo. Sorkar thu a ni a, ni mai mai teh se, tihte hi khua leh tui ṭha nihna niin a lang lo, hotute hian engkim an hre kim vek bik lo va, thil dik lote siam ṭha turin kan aw kan chhuah ve tur a ni–kan ram kan hnam kan society hi kan ta ve tho a nih vangin. Ram tam taka siam ṭhat hna lo thawktute hi thuneitute’n an vau beh zawh loh, thih huama thil ṭha lo lo do ṭâng ṭângtute an ni. Mi ṭha nih duh vanga ngawih hi mipui rorelna ramah chuan a pawi thei. Mihring hian hmangaihtu, zilhtu, thununtu, thurawn petu kan mamawh vek a, zilhtu nei ṭha chu an mawi thin," a ti.

A dik viau a ni. Suddam Husein, Muanmar Goddafi, Basar Al Ashad te leh Adulf Hitler te khan thurawn petu leh khalh ngiltu an nei lo va, mahse, an hun tawp dan leh khawvelin a hriat reng dan chu ropui lo tak a ni. Hruaitu fing chuan mi thurawn a la thiam a, sawiselna pawh chak nan a hmang thiam ṭhin.

Mafa Hauhnar ve thung chuan, "Pi Hmuaki leh Socrates-a te hun aṭang tawh khan hla phuahtu leh thu ziakmi nih hi tih namai a ni lo, dinhmun ṭihbaiawma mahni leh mahni indintirna a ni. Khawvelah hian lehkha ziaktu sang engzatin nge vau leh rîkrâp an tuar ang a, za engzatin nge tihduhdah tuar ang a, nun hloh phah hial nana hmang engzat tak awm ang maw; mahse, vawiin ni thleng hian ziakmite chuan an la sim duh chuang lo.

January 1, 1960 khan Thanpuii Pa chuan 'Kan mizia' tih essay a ziak a. He essay hian ngaimawh a hlawh hle a, khatihlaia MZP-te pawh khan thuchhuah siamin, "He thu ziaktu J. Malsawma hian Mizote hnenah thu dik lo a ziah vang leh kan hnam a chhuanchhe zawnga a ziah avangin thupha chawi rawh se," te an ti a. He essay ngaimawhtute’n an ngaimawh deuh ber nia lang chu heti hian han dah khawm ta ila. "Hnam hnufual em em, mahse, hnam fing anga lan tum lui tlat, neih zawng zawnga tuallai lêng, inpenparh mi, buh leh bâl leh sumdawnna kawnga pachhe hle si, khawsak rel thiam lo ber, neih nei hlei lo, ren hlei lo. Pathian thu hriltu inti si, sual lawm mi, rilru taka sakhua hmang si lo, vantlang ngaih chauhva sakhaw ngaihsak, rilru fei si lova puan chang tivar, mi dawihzep, awm hmuna inhrosak vak vak ching, min ṭhelhtu an awm chuan pâwngpawrh túr túr, ṭhenawmte hmangaih hle anga lang a, an chhiatna zawng ngar ngar, miin ka mei rap se, chu ila tih duh vek kan ni,” tiin.

Sermon-tute’n an sawi ṭhin, "Khawvel mihringte hi lung, rem taka a awm ang hian thiam zawng, theih zawng leh tui zawng inang lo mi hrang hrangte inṭanpui tawnin khawvelah kan cheng ho a ni. Kan eizawnna kha kan tui zawng a ni vek kher lo ang hian, kan tui zawng pawh kan thiam zawng a ni kher lo thei. Khawvela lehkhabu hralh kal ber ber ziaktute hi mi fing leh a zir sang ber berte an ni hauh lo. Mizo zingah ngei ngei pawh kan univarsity-a profesor ropui tak takte khu Mizo literature chawisangtu leh kan kan social influencer neih ṭhat ber berte an ni hauh lo tih kan hre awm e. Chuvangin, thu ziakmi (writer) hi zir san hnua luh chilh chi a ni hran lo va, hria inti leh fing intite ziah an ni hauh lo va, lehkhabu thuhmahruai zawng zawngah hian a ziaktute insitna thu a chuang vek awm e.

Heng a hnuaia thu ziakmi (writer/journalist) ka ngaihsan deuh deuhte pawh hian dik lo leh fel lo an hmuh an ngawihbopui mai theih loh avangin an nunna hialin tuar dawn mah se, dik lo chu an do ngar ngar mai a ni; mi dangte zilha fuih turin kei hi ka fingin ka fel tawk a, chuvanga he siam ṭhat hna hi thawk an ti bawk hek lo. Writer an nih miau vangin dik lo chu dovin huai takin an ziak mai a ni.

JAMAL AHMAD KHASHOGGI

2nd Oct 2018-ah Syria rama Soudi Consulate bula a ruang an chhar, Saudi journalist huaisen Jamal Ahmad Khoggi (50) kha, Saudi mi hausa Adnan Khashoggi fapa a ni a, New Yourk Times reporter hna thawk a ni. Ani hian an ram hruaitute dik tawk lohna avanga an ram retheihna ata chhan chhuak tura a beihna thinglung kha ropui ka tiin ka ngaisang em em a ni.

Ram danga cheng Mizote’n an awmna ram aṭanga Zoram an rawn vei ang hian, Khashoggi hian a awmna hmun nuam tak America aṭangin a ram, Saudi Arabia chu a vei em em a. An ram lal King Salman Bin Abdulazia khan a mah eptute apiang a thah mai ṭhinzia te, dik lo taka chhiah a lak dante a hai hauh lo. An rama mi hausa leh rethei kar zau lutukte chu a ziak nasa a, an ram siam dik leh siam ṭha tura a thuziak ngialngan tak takte avangin vauna pawh vawi tam tak a dawng.

Saudi sorkar intelligent-te’n an veh nasat dante pawh a hria, a nun chhanhim nan ram dang dangah a tlanchhe kual a, mahse, englai pawha veh rengtute lakah a fimkhur zo ta lo va, Syria rama Saudi Consulate office a tlawhna hmunah Saudi Intelligent-te’n an lo dahṭha ta. Saudi sorkar chuan zêp a tum zet a, mahse, America President leh German PM, French Foreign Secretary Jean Yves Lee Drian te chuan Saudi sorkar hnenah Khoggi thih chhan dik tak sawi chiang vat turin an nawr a. Ram pariat palai aiawhte’n Saudi Consulate an endik hnuah misual kut tuar ngei niin an ngaih thu an sawi.

A thih hnua Washington Post-in a thuziak an chhuahah chuan, "Arab khawvela press mite nun chêp lutuk hi a ziaawm hunah chuan Arab ram sorkar inrelbawlna thûk zawk mipuite’n an hre ve tawh ang a, Arab ram khawvel hmasawnna kawngkhar puanzar pawh a rawn inhawng ve tawh ngei ang," tih a ni.

MARIA RESSA

Phillipine journalist huaisen Maria Angelite Ressa hian Nobel Peace Prize pawh a dawng tawh a, Repple webside CEO, CNN correspondent, Phillipine leh American journalist ni kawp a ni.

Maria Ressa hian an ram President Benigo Aquino leh sorkar miliante’n an rama foreign company inbunte hnen aṭanga chhiah dik lo taka an inei tawn dan te, chanchinbumite’n ram roreltute dik lohna hai lang ṭhin mah se, judge hote nen thamna an inpek tawn ṭhin avangin thiam loh an chang tak tak thei lo. Chung thil tenawm tak takte chu mutmawh hnarmawha neiin a chhui ngar ngar a, an ram leh hnam tan theihtawpa a beih laiin 30th June 2024 khan kum 60 mi niin a thi. Khawvela journalist ṭha ber pawla chhiar a ni a, a chanchin pawh internet-ah chhiar tur a tam hle.

ALEXEI NAVALNY

Russia President Vladimir Putin-a rorel dan sawiseltu langsar ber, Russian opposition party Liberal Democrat Party President leh New Yourk Times reporter ni bawk a ni. Tunlai khawvel thiamna chi hrang hrang leh dawi thil thleng pawha a dam rei theih dang zawng ngar ngar, a dam chhung hun Russia President nih tumtu Vladimir Putin sawiseltu ber a ni. Kum 2014-a Putin-a'n Ukraine a rûn pawh kha ṭul ti lotu ber a ni a, Putin-a'n a lal reina tur dâltu nia a hriat apiang a thah mai ṭhinziate puang chhuaktu a ni.

A ram leh hnam a hmangaih avanga sorkar thil tih dik loh a sawisel ṭhin vangin Russia sorkar chuan a tlanchhiatna apiangah thah tumin a ûm a. Kum 2020 khan New York-ah narve gas hmanga hrai a nih avangin a thi ṭep a, rei tak enkawl a nih hnuah kum 2013 khan an ram Russia-ah a haw a, Russia intetligence-te’n lo man nghalin, sorkarin a tàn hun chhung a pawhseisak zel laiin, 16th Feb 2024 khan a tànna jail-ah a thi ta. Sorkar chuan thisen sang vanga thi niin a puang a, mahse, khawvel chuan Putin-a thahtir niin a ngai tho.

PADMA NABHAN

India rama eirukna scandal lian bera an ngaih, kum 2018 vela Tamil Nadu state-a Hudkha Company hnuaia eirukna lian tak hai chhuaktu The Hindu Magazine Editor Mukud Padmanabhan kha sorkar miliante thil tih dik loh a chhui ngar ngar avang khan atan hlâwkna pakhat mah a nei dawn lo tih inhre mah se, journalist a nihna zawnah a hna rinawm leh huaisen taka a thawh avangin ka ngaisang em em.

India rama Hudkha siamna hmun lian ber MDM Manufacturing Company, Tamil Nadu state-a bun luah phênah chuan sorkar phal loh thil dik lo inphûm lian tak leh chu company chuan sawisel tawk ṭhin mah se, tihchhiat hleih theih a nih lohna chhanah sorkar milian tam tak an inrawlh nia rinna Tha Hindu chanchinbu chuan a nei a, an chhui ngat ngat mai a ni.

A tawpah heng sorkar milian tak takte thil tih dik loh chu he Editor, a sakhmel ropui lua bik lem lo leh nun tlâwm tak hian chhui chhuakin Supreme Court-ah a thlen a. Thiam loh chang tate chu–Health Minister C Vijay Basker, Chief Secretry PS Rama Mohana Rao, Police Commissioner, IRS officer, Custom Food Safety leh State Tax Dept te pawh an thuneihna dik lo taka hmang tih hriat a ni. Tichuan, MDM Manufacturing Company chu titawpin sorkar milian hote pawh a hling zui ta nghe nghe.

NAGUIB MAHFOUZ

Egypt mi Writers huaisen a ni. Pension thak thlenga sorkar hna thawk ani a, lehkhabu 34 lai a ziak a, a lehkhabu ziah The Thief and tha Dog tih leh Children of Gebelawi tih ah chuan Egypt sorkar inawp dan fuh tawk lo te, mipuite suk thlek fuh tawklote leh Inslam sakhaw dan tha tawklo nia a ngaihte a ziah a vangin an ngaitheilo hle a, mahse a thu ziah chu a thulh phah chuang lova kum 1988 khan Nobel Prize a dawng a, Arab tawnga thi ziakmite zinga Nobel Prize dawng hmasa ber a ni.

TASLIMA NASREEN

Banglades ziakmi huaisen a ni a, US-ah lehkha zirin, US aṭang chuan an ram veina leh siam ṭhat a duhna te, Islam sakhaw dana hmeichhe dah hnuaihnunna a vei thute a ziak ṭhin. Lehkhabu 40 vel lai a ziak a, Amar Meybela a ziah chu a ram Bangladesh mipuite’n an huat em avangin case pawh awrhtir hial a ni. An rama awm tur pawhin an duh lo va, mahse, heng Sakharox Prize (Europe), Human Right Award leh UNESCO Award te a dawng.

SALMAN RUSHDIE

Indian mi, English-a lehkhabu ziaktu lar hi TV advertisement agency-a thawk ṭhin a ni. A thuziakahte hian India leh Pakistan rama Islam sakhaw vuantute insiamṭhatna tur lam a ziak uar hle. A hmuh phak khawvela dik lo leh fel lo nia a hriat chu a nunna thâpin a ziak lui ngar ngar a a ni. Iran President Ayatillah Khomeini khan fatwa dan hmangin thahna thu pek a chhuah a, mahse, a ziak lui zel tho. The Setanic Verse tih a ziah chuan Bookker Prize lawmman a dawng a, Mosolman hovin haw hle mah se, Rushdie chuan, "Kei chu lehkhabu ziaktu ka ni a, ka hna chu ziah a ni,” a la ti fan tho.

Kan Zo-hnahthlak ziaktu lar L. Keivom khan, "Writer-in a thil hmuh dan leh ngaihdante tlang taka a sawi ngam tawh loh chuan writer a ni tawh lo," a lo ti a. RK Lianzuala vek pawh khan, "Hmingṭhat te, chawimawi te, hamṭhatna leh ṭhutna ṭha beiseia thu kan ziah chuan writer kan nihna kha kan hloh daih tawh a ni," a lo ti ve bawk.

Writers chuan a chang chuan a zêldin thu te, a suangtuahna te, a duhthusam ramte a ziak ang a, a chang chuan a nuna a tawn te, a ngaihmawh leh a vei thilte pawh a ziak thei. Alexander Dumas-a’n ‘Count of Monte Cristo’ a ziah khan huat deuh deuh mi pathum a nei a, chung mite laka a phuba lak duhna kha he thawnthuah hian a phûm niin an sawi. William Skakespeare-a’n ‘Romeo & Juliet’ thawnthu a ziaha Juliet-i a thiha a pa Lord Caputed-a ṭahhla pawh kha William Shakespeare an a fanu boral a sûnna, a ṭahhla a chham niin an sawi. Ziaktu chuan tih chhan neiin thu ziak pawh ni se, a phênah a dah ṭhin. Chutiang lo inngaihbel a, huata lo la an awm a nih chuan chumi chuan Principle of Criticism a man lo hle tihna a ni ang a, buichhia laih lohvin a inpuang tihna a ni ang. Constructive criticism pawh inngaihbela haw ṭhin kan nih chuan mahni kan inmualpho tihna a ni ang.

Nangni lehkha ziaktute u, in chung a pik e (Mat 23:15).

- Sangtea Khawlhring